新車激試

泰國廚•日本餐  Honda CR-V Turbo

贊助商連結

近年 SUV當道,尤其德國牌子嘅大包圍式攻勢,型號多到車迷都記唔晒!反觀日系 SUV,車款冇咁多選擇唔算包羅萬有,但都唔代表日系 SUV吸引力已走下坡。最新 Honda第五代 CR-V,其全新外型設計、改以七座位佈局、以及全新 1.5公升 turbo引擎,裡裡外外都有新鮮感,而且設備一啲都唔弱,質素更媲美歐洲中型 SUV。加上$349,880車價已經得到一架中型七座 SUV,難怪由 2016年 12月推出至 2017年中,暫時成為全球銷量最佳嘅 SUV型號!

新一代 CR-V成為全球銷量最佳 SUV,但其實其銷量仲未見頂,因為首半年嘅銷量只包括北美同東南亞,暫時 CR-V仍然未喺日本同中國內地推出,所以 CR-V銷量仍有深不可測嘅空間!所以最新到港嘅 CR-V Turbo,其實屬於東南亞版本,全由泰國廠房負責生產,不過車迷對泰國生產嘅型號相信都唔會陌生,早有 2003年嘅 Accord以及近年嘅首批小型 SUV Vezel都由泰國廠方負責,其質素同日版無異。有心換架七座 SUV,新 CR-V Turbo絕對係唔錯新選擇!

共用十代 Civic底盤

除咗首代 CR-V生產周期長達六年之外,之後每代嘅 CR-V生產周期都只有四年,轉款速度非常之快。全新第五代 CR-V Turbo,與同樣喺 2016年推出嘅第十代 Civic共用全新「 Honda Compact Global Platform」底盤,所以新 CR-V外表,尤其是車頭都參考咗十代 Civic嘅全新家族式面譜,以突出其共用底盤、血脈相承嘅身份。
CR-V Turbo嘅新底盤採用咗 56.5%高拉力鋼,底盤剛性比上代增強 37.2%,採用新底盤同時令 CR-V Turbo車身尺寸比上代有所增長。 4,590mm長度比上代多出 40mm,全數增加喺 2,660mm軸距之上,另闊度同高度都有 35mm同 5mm增加,以容納今代首次增加嘅第三排兩個座位。不過相比同級嘅中型七座 SUV對手,好似 Nissan X-Trail同 Land Rover Discovery Sport, CR-V Turbo車身長度同軸距都屬三者中最短,高度亦都最矮,闊度就喺兩者之間,究竟空間分別大唔大?睇埋落去就知!




頭燈組包括射燈,都統一用 LED款式。


尾燈改為左右 L形設計,中間加入電鍍裝飾左右貫穿。


配備 17吋雙色合金輪圈及 Dunlop Sport Maxx車胎,尺寸為 235/65 R17。


採用隱藏式金屬行李頂架,令 CR-V Turbo外形更瀟灑。 設備一步到位

今代 CR-V首次由五座位增加至七座位佈局,廠方以「 5+2」方式描述呢款七座佈局,原因係廠方只建議車主長期摺下尾排座位,有需要時先至反起載客,因為尾排座位空間唔算充裕。廠方咁誠實,筆者非常欣賞,筆者亦試過迫入 CR-V尾座,其實唔係想像中咁地獄,空間只比 Discovery Sport窄啲啲,腿部空間差唔多,反而 CR-V地台低少少,坐姿係半踎半坐,而 Discovery Sport係踎!如果需要坐喺尾座成個鐘,筆者唔會拒絕,起碼人道過坐 Porsche 911嘅後座,而且 CR-V喺中排同尾排座位加入四個車頂冷氣出風口,更有風力調校,炎炎夏日都唔怕焗到暈低。
今代 CR-V中控台佈局同上代差唔多,但為咗配合全新外形,今代 CR-V改用更硬淨、更具時代感嘅設計,而且更新用 7吋 TFT彩色屏幕表板,中央屏幕亦升級至 7吋 TFT輕觸式,更內置 Apple CarPlay、 Andriod Auto以及導航系統,全車亦都有四個 USB充電插頭,加上全景式天幕車頂以及「 Honda LaneWatch」盲點顯示鏡頭,設備絕對齊料。梗係啦!代理引入屬東南亞頂級版,所以只有一個型號選擇,而且只有七座版。







引擎容積細咗,但仍然使用雙出燕子喉增強跑味。


中控台加入仿木紋裝飾,幸好唔算大面積,感覺唔老土。


尾排坐姿還可以,腿部空間比車身更大嘅 Discovery Sport優勝。


中排座椅可以前後滑動,滑到最後時腿部空間更達行政房車級數。


電動調校前座加入咗兩組記憶功能,高級!


即使打開尾排座位,尾廂空間都唔太差,起碼放到一架嬰兒車。


尾排及中排座位可以摺低,變成全平尾廂空間。 更強 Turbo新引擎

近年 Honda非常積極應用低容積 turbo引擎喺 MPV之上, Stepwgn同 Jade就係最佳例子。今次 Honda將呢一套方程式應用喺 CR-V Turbo之上,屬廠方第二次應用喺 SUV,第一架係更小型嘅 Vezel!今代 CR-V配備編號為 L15B7嘅 1,498c.c.直四 turbo引擎,最大馬力 193匹,峰值扭力 24.8kgm。輸出已超越上代 2.4公升直四自然吸氣引擎,單係馬力已經多 3匹,但容積就細咗 900c.c.,最重要係平!牌!費!
不過要留意,容積細咗唔代表慳油咗, CR-V Turbo由上代 5速自動波轉用 CVT無段變速波箱,喺同樣配備四驅系統底下,耗油數字為 13.3km/L,而上代 2.4型號為 12.8km/L,細容積反而耗油大咗少少,原因可能係車重比上代增加咗 67kg有關。駕駛方面,新款明顯感到底盤扎實咗,隔音亦都有進步,令新款有更加高級嘅感覺。




除咗用實體按鈕控制冷氣,更可用輕觸式屏幕控制。


中排座位除咗有頂置冷氣出風口,仲有前手枕出風口,風口下方更有兩組 USB充電插頭。


位於中排座位以及尾排座位上方嘅頂置冷氣出風口,如果吹向中排座位,就會吹正乘客頭頂,呢點要留意。


同級所有對手都有天幕車頂, CR-V當然唔可以缺少。


前座手枕內有 USB連接插頭,要用 Apple CarPlay就要插線用。


特定 apps可以直接喺屏幕使用,當中以 Google Map最實用!


「 Honda LaneWatch」盲點顯示鏡頭位於左後鏡。


全新 7吋 TFT彩色屏幕表板,除咗轉數同速度外,更可作導航及四驅系統出力分佈顯示。





好多車迷都會問,係咪即係 Stepwgn、 Jade同 Vezel嗰副引擎?其實細心留意,新引擎多咗 2c.c.,所以唔算一樣,但都係 L15系列引擎。


CVT波箱配合新引擎都唔會有力不從心嘅感覺。 

Honda CR-V Turbo Spec.
引擎: 1,498c.c.直四 turbo
馬力: 193ps/5,600rpm
扭力: 24.8kgm/2,000-5,000rpm
傳動:無段變速自動、附+/-模式
車身: 4,590× 1,855× 1,690( mm)
軸距: 2,660mm
車重: 1,667kg
耗油: 7.5L/100km
車價:$349,880
查詢:合群汽車( 2380 2231)

同級七座對手

CR-V Turbo升格為中型七人 SUV,同級對手即時少咗好多,若以差唔多車身大細嚟講,同級只有以下兩款!




同級最平

Nissan X-Trail
同樣號稱「 5+2」座位佈局嘅 Nissan X-Trail,車身大少同設備都直迫 CR-V Turbo,不過 2.0公升引擎輸出只有 144匹,但車價屬同級最平。車價$280,800




越野堅揪

Land Rover Discovery Sport 7-Seater
除咗㗎仔同鄉,另一對手就係英國血統嘅 Land Rover Discovery Sport 7-Seater。 Discovery Sport車價接近 50萬,同 CR-V比其實已經係另一個層次,而且擁有一定越野能力。車價$499,000起

撰文:黃德禹
攝影:葉偉豪

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()