張秀文同前經理人 Victor打得火熱,早前二人一身街坊 look齊齊行超市買餸。

探熱針

懶理無綫棒打鴛鴦 「咪神」封盤 張秀文願做破產男「煮飯婆」

贊助商連結

新一代「咪神」張秀文憑住 34D驕人胸器成功俘虜無數宅男,不過去年「咪神」被爆與當時的經理人仇耀斌( Victor)日久生情,仲發展到同居關係,為怕「咪神」地位受影響,大台即時棒打鴛鴦調走 Victor,避免拖累女方。
儘管男友曾經破產,但講心唔講金的張秀文一啲都唔介意,最近男方成功轉工,撇低工作衝突後張秀文同男友就愈愛愈高調,早前,二人就孖住現身將軍澳拍拖買餸,再返愛巢玩煮飯仔。

 


拍拖買餸
一五年底,張秀文斷正同當時經理人 Victor喺九龍城劏房同居而令戀情曝光,事後二人堅拒認愛,直到去年初二人再被爆齊齊搬去日出康城,男方仲日日管接管送,為保飯碗,張秀文繼續擘大眼講大話表明自己單身,可惜紙包唔住火,最後公司決定調走 Victor,實行棒打鴛鴦!
最近 Victor成功轉工到「星夢娛樂」,感情穩定的張秀文和 Victor懶理公司壓力,戀愛大過天二人仲愈愛愈高調, Victor除了經常在自己社交網上晒合照兼寫深情論文晒自己正印男友地位外,仲毫不避忌孖住出巡拍拖。
早前一身街坊打扮的張秀文就孖實男友現身將軍澳厚德邨超級市場拍拖買餸,一入到超市男友做阿四負責推車,張秀文就一支箭去睇肉類食品及熟食,在旁的 Victor任由張秀文決定今晚食乜餸,最後俾完錢就齊齊搭小巴返回日出康城愛巢,就咁睇, Victor已經成功將「咪神」私有化為「煮飯婆」。

Victor任由女友張秀文負責揀「今晚食乜餸」。

最後二人齊齊坐小巴返回日出康城愛巢玩煮飯仔。
男友個底「花碌碌」
現年四十三歲的 Victor,大過張秀文十四年,早年擔任張秀文無綫經理人時,日對夜對而擦出愛火花,據知, Victor父親是一代香港足球名將,有「亞洲鋼門」之稱的仇志強,而 Victor自己就喺九六年參加過新秀溫哥華區選拔賽贏得亞軍,之後在連卡佛做過 sales,不過與張秀雯戀情曝光後,就被爆○八年曾因涉嫌管有危險藥物而惹上官非,○九年更申請破產。
「 Sammi(張秀文)其實一早就知 Victor個底咁花,但佢一啲都唔介意,因為喺佢自己事業啱啱起步嘅時候, Victor真係好幫佢好照顧佢,而家 Sammi搵錢能力高咗,佢都唔介意同 Victor分擔吓租金,之前公司入面曾經都有個男仔以為 Sammi單身就發功追佢,但 Sammi好快就同對方表明自己有男朋友,一大個檸檬塞俾人食!」知情人士透露。

早年, Victor擔任張秀文經理人時近水樓台得到「女神」芳心,儘管無綫打壓,但二人最近愈愛愈高調。

 

去年張秀文有多張身穿三點式泳衣的私密照外洩,事後張秀文直認是由 Victor操刀。

擁有 34D殺人胸器的張秀文唔介意晒咪冧宅男。

今年初, Victor在 ig大晒同張秀文合照,兼寫長文表示二人踏入第五個年頭,感激對方的愛同包容。

張秀文在 2010年參加香港小姐而奪得亞軍。
撰文、攝影、攝錄:娛樂組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()