黃意雅老闆范振鋒寵幸

贊助商連結

廿四歲嘅新人黃意雅(Cynthia),出道前曾經做過無數商場表演,唔單止精通中西樂器,又識作曲、填詞同埋後期製作,所以舊年索性自資出唱片,後嚟佢又喺演藝搞咗兩場mini-concert,即被范振鋒賞識收歸旗下,幫佢推出新碟《Before 23》。

日前,東姑去咗上水打波,咁啱就見到Cynthia拍緊新歌〈You're My Everything〉嘅MV。當日劇情講述受失戀打擊嘅佢,決定將所有信物用冰封起保存,希望等到冰溶化後,呢啲傷心嘅回憶都會被順勢帶走。拍攝當日,雖然天氣炎熱,但要揸住啲冰塊成幾粒鐘,Cynthia表面望落幾疏乎,實情有苦自己知。難怪當佢拎起結他彈時,東姑就見到佢打晒冷震,睇見都心寒呀!

去到尾聲時,老闆范振鋒仲親自嚟到現場探班,更大送零食同飲品畀Cynthia打氣,更難得當日係范老闆嘅生日,咁大日子都嚟支持,Cynthia梗係開心到彈起,仲把握休息時間同老闆jam歌,毫無隔閡。東姑仲八到,當日個MV拍到成凌晨三點,前後拍咗足足九粒鐘,不過事後Cynthia就話:「今次個故仔概念好新鮮,而且拍出嚟嘅視覺效果又正,所以都幾enjoy。」獲得老闆寵幸,梗係人都精神啲啦!

當日, 導演用咗人造雪營造飄雪嘅效果,感覺逼真之餘,望落都幾淒美。

 

未埋位前,范老闆不忘同Cynthia彈吓結他、jam吓歌,交流音樂心得,毫無架子。

 

拍攝當日適逢老闆范振鋒嘅生日,但佢都百忙中抽空嚟探班,仲送上大批零食同飲品慰勞一番,令Cynthia好感動。

 

上月Cynthia生日,范老闆都有送上印有Cynthia卡通樣嘅生日蛋糕畀佢,事後女方亦禮尚往來,喺社交網留言答謝老闆。

 

范振鋒生日後數天,Cynthia同一大班同事大搞生日派對,幫老闆慶祝,大家關係融洽。

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()