當日超蓮率隊探訪老人院,三十幾度高溫,一身 casual的她同班義工將一袋袋物資搬上樓。

名人動態

搞慈善 何超蓮除下千金光環 做阿四

贊助商連結

貴為賭王三房千金的何超蓮,卻非不食人間煙火的富二代。搞慈善,甘願紆尊降貴,貼地落區服侍老人家,仲要棄千金光環,搬搬抬抬做阿四。

搬抬幾轉一身汗

活在無憂米的何家三房,何超蓮卻常被發現過貼地生活,坐港鐵,甚至幫襯平民美甲店,家姐超雲會到街市買餸,近期她接母親陳婉珍的棒,發起慈善組織「 Smile with us HK」。
富二代身嬌肉貴,做善事大可舒舒服服捐吓錢,做吓指揮。但上週四( 29/6),超蓮率領年輕義工到老人院,幫一班「老友記」剪個靚髮。她跟同行義工將多箱物資抬上樓,擔擔抬抬乜都要做。熱辣辣天氣,來回幾轉搞到身水身汗,直至男義工趕到,粗重嘢才交俾男士負責。當日義工團還有她的胞姊何超雲,及另一富二代曾昭怡。




三太陳婉珍做過東華主席,何超蓮亦步母親後塵,瞓身做慈善。


當日參與義工的,還有賭王三房大小姐何超雲及當了人母的富二代曾昭怡。


為探訪老人院,超蓮前一晚親手製曲奇。為善事,經常入廚房。





拒做慈善大花筒

何家千金做阿四,全因超蓮堅持慳開支。「 Laurinda(何超蓮)次次都係落場做統籌兼幫手 set埋嘢。呢個組織佢係自己攞錢出嚟做營運推廣,之前有人叫佢搞晚宴或大騷募捐,但 Laurinda都 say no,因為唔想啲捐款花喺大量行政費用上,被七除八扣,佢想全都落喺受惠者身上。佢覺得做過億項目,都不及幫到基層咁滿足。」一名義工說。




搬搬抬抬走幾轉,超蓮由統籌到雜務都一腳踢。


當日超蓮帶埋自製曲奇送俾一班公公婆婆,又安排髮型師為他們剪頭髮。





搬到身水身汗,又跟一班「老友記」玩得投入。 做掌舵唔俾分心

二十八歲的超蓮,被公認為何家最索千金,觀音兵車輪轉,不過自前年底跟台灣藝人吳克羣斬纜,及去年與方力申瞬間火花後,感情至今冇着落。原因是她奉母之命做三房掌舵,要專心打理江山。去年三太安排超蓮入局澳門勵駿,委任為非執行董事,返工之餘,亦不時飛去澳洲,為母親旗下酒店翻新工程視察進度。起步做三房女當家,唔准分心,惟有封盤搏殺。




起步做當家,超蓮要一早就返工開會,又頻頻飛澳洲視察旗下酒店翻新進度。


有米又有樣的超蓮,大把觀音兵,但接棒做三房掌舵,惟有封盤搏殺。


超蓮跟四房大女何超盈感情不錯,近年超盈亦在母親培育下,搞藝術拍賣行。

撰文、攝影、攝錄:娛樂組

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()