next1.jpg


身在瑞士拍廣告的黃心美,電話回應戀情時表示 Brian是好朋友,當日帶男方返家是因對方想買樓,才讓他來屋企睇間隔及 clubhouse,答案有些牽強,但連對方買樓都關自己事,感情不言而喻啦!

娛頭

同台灣老公離婚 黃心美撻着保釣烈士細仔陳安立

贊助商連結

馬國明女友港姐心穎 BB(黃心穎),樣貌同身材都有番咁上下,就好多人都知,但原來他們黃氏四姊妹心美、心妙同心慧,個個都係靚女級人馬,真係一門四美。
大家姐黃心美係 viuTV台花, 15年底同台灣老公離婚,一直未有新戀情,就連已經搵到筍盤馬國明的細妹黃心穎,都替家姐着急,聯同豹哥(單立文)安排相睇飯局,但有樣有身材的黃心美根本唔 dry,同 viuTV同門師弟、保釣烈士陳毓祥細仔 Brian陳安立,已經秘戀兩個月, Brian更上埋心美位於油塘的 Ocean One寓所,入屋見晒家長。

鍾意高大男

三十五歲宅男女神黃心美( Scarlett),因為同台灣前夫 Thomas分隔兩地,導致感情轉淡,一五年底正式離婚,結束四年多婚姻生活,回復單身的心美亦專心發展事業,對感情毫不心急,即使身邊不乏狂蜂浪蝶,追求者有專業人士亦有富二代,但心美都睇唔上眼,但原來她最近揀了比她細五年,高大靚仔的 viuTV新寵 Brian陳安立。
二十九歲的陳安立原來大有來頭,父親是香港保釣烈士陳毓祥,母親劉舜卿是教育機構校監,父親的一班好友梁錦松、朱培慶、麥潤壽、曹貴子醫生更加係睇住 Brian成長,而受父親經歷影響, Brian亦比同齡的年輕人思想成熟兼有責任感。
講過鍾情高大猛男的心美,前夫 Thomas已經高人一等,比她高出成個頭,所以六呎一吋的 Brian,啱晒女神杯茶。




落街放狗已成二人日常拍拖節目!


Scarlett不時含情脈脈望住 Brian。


心美踎低抱狗,好身材乍現。 唔要贍養費

「 Scarlett(黃心美)唔隱瞞,一早已經話明揀男友一定要高大靚仔,當年佢同前夫都係一見鍾情,但結婚之後, Scarlett留香港發展,工作愈嚟愈忙,同住喺台灣嘅老公見面時間愈嚟愈少,最後都要分開,但 Scarlett好硬淨,佢由細到大都唔鍾意靠男人,所以離婚佢亦唔要贍養費!佢覺得自己賺錢自己使先有安全感!」黃心美友人說。
由於與 Brian同屬 viuTV旗下,兩人去年開始經常孖住工作,日見夜見擦出愛火。
「好多時收工,佢哋都一齊食飯,加上佢兩個都鍾意講英文,大家同聲同氣特別啱傾,最初佢哋都成日搵埋經理人掩護先約出街,但依家已經三人行變咗二人行!」知情者說。




黃心美樣靚兼身材索爆,是近期網絡風頭躉。


前夫 Thomas是台灣生意人,同屬高大猛男! 一早入埋屋

上週四(六月八日),黃心美與 Brian在旺角出席完活動,同坐經理人車返回心美位於油塘的 Ocean One寓所,落車時, Brian更好有風度幫女友開埋車門。
兩人一同返上寓所,大約一小時後再度落樓,今次就帶埋心美的兩隻摩天使狗仔,似足一家四口到樓下拍拖!
拖住狗拍拖的確幾浪漫,兩人行行吓更加突然同狗仔追逐係咁跑,兩人亦忍唔住笑到咔咔聲,相當 sweet!其間兩人路過地產鋪,更加停低研究,本身已經有兩層樓喺手的黃心美,唔通咁快就想同 Brian一齊築愛巢,更手指指似乎對其中一個樓盤好有興趣。




兩人放完狗,由黃心美拍咭返入屋苑。


路過地產鋪,兩人睇樓盤有商有量!


坐經理人車返家, Brian一落車就先幫女友開車門。


經常拍檔做主持,黃心美同 Brian早前就一齊訪問過校長譚詠麟。 一門四美


黃氏一門四美隨住心穎 BB與家姐黃心美爆紅,四姊妹都被大起底!

一屋四美的黃氏姊妹花,四姊妹感情要好,可能同闖娛樂圈關係,心美同四妹心穎就特別投契,由於二妹心妙長居澳門,三妹心慧又是空姐關係經常四圍飛,心美心穎就經常孖公仔一齊去街。
比家姐遲入行的黃心穎,就曾公開表示家姐傳授唔少做主持經驗給她,令她初次做主持亦無咁大壓力。
畢業於英屬哥倫比亞大學的黃心美,操得一口流利英語及普通話,加上樣子甜美擅於執生,已成近期當紮主持,每月平均都有超過十個主持工作,收入不俗,難怪一三年能以一千二百萬買入現居的 Ocean One物業連車位,去年再以四百二十萬,與細妹黃心穎一同購入加拿大一個住宅單位連車位。

計劃搬走

同家姐一樣有驚人潛力的黃心穎,上月亦斥資八百多萬買入啟德新盤天寰一個兩房單位升呢做業主。
「依家心穎同兩個家姐一齊住喺油塘,雖然間屋有三間房,但同馬明拍拖之後,心穎都想有自己私人空間,拍拖都方便啲,所以收樓之後,都會搬出去住!」知情者說。
除了在娛圈發展順利的心美心穎,已經嫁人的二妹黃心妙,老公是澳門銀行界富二代,即使已經是三個小朋友媽咪,身材一樣索爆,一四年黃心妙啱啱生完二女,因為撐洗米華老婆 Heidi出席活動,剛坐完月的她穿著性感晚裝艷壓全場,至於三妹心慧,一樣是航空之花,身邊不乏追求者,男友亦揸開篷 Audi經常接載心慧,果然個個咁搶手!




心穎 BB成功溝掂筍盤馬國明,更火速置業準備搬離家姐屋企。


被揭戀事, Brian和心美都只肯承認對方是好朋友,但 Brian坦言以前住西環時,心美住在同一大廈,當時已經覺得對方好靚女!


黃心美同妹妹心穎因為同樣在圈中發展,所以感情特別好。


早前出席活動,黃心美難得同老死洪永城及細妹男友馬國明碰頭。


父母不時加港兩邊飛,但一家人總會爭取時間見面。


父親是著名中醫師,更難得是黃氏四姊妹個個省鏡。 保釣烈士父親

年僅 29歲的陳安立,其父親為 21年前,香港保釣烈士陳毓祥, 96年 9月 26日,保釣運動領袖陳毓祥,於釣魚島宣示中國主權,而不幸在海中被繩索纏住及被船隻撞傷頭部而遇溺身亡,遺下太太及一對年幼子女,而陳安立當年只得 8歲。
12年,陳安立參加 nowTV舉辦的「 CEO選拔賽」獲得兩獎而入行,曾主持 now觀星台及芒果台,去年正式加入 viuTV簽約成為藝人,並於劇集《三一如三》中飾演健身教練,大晒胸肌。陳安立亦實現父親生前遺願,自組了一隊籃球隊 Hero。




保釣勇士陳毓祥 96年在釣魚島海域遇溺身亡,由陳太劉舜卿一手湊大兒子陳安立及女兒陳安然。


陳毓祥於 96年在釣魚島海域,為中國宣示主權時不幸壯烈犧牲! 四千金

心美心穎的父親黃沛霖行醫多年, 95年舉家移民到加拿大,繼而回流返港,四位千金自小生活無憂。



黃心美 Scarlett(大家姐)
現年三十五歲的黃心美,於英屬哥倫比亞大學畢業,早年於溫哥華讀書,被發掘當電視節目主持, 06年,回流返港簽約東亞做歌手,可惜被派到無綫任娛樂台主持,發展不順利;現時她在 nowTV及 viuTV主持節目,不時參與廣告拍攝,加上樣子甜美,被網民視為「宅男女神」;感情方面, 11年與拍拖五年的台灣男友結婚,可惜二人經常分隔異地, 15年離婚收場。



黃心妙 Shelby(二家姐)
34歲的黃心妙, 09年嫁澳門商人,誕下兩子一女,並定居澳門,其丈夫龔偉鵬於澳門人脈甚廣,開設 Ritz Entertainment Production,主辦演唱會、運動事業活動,黃心妙一直相夫教子,不時與丈夫現身 ball場,過住闊太生活。



黃心慧 Shirley(三家姐)
現年 31歲,為國泰空姐, Shirley一樣樣靚身材正,熱愛旅遊,卻不愛成為公眾人物,不時於網上大晒旅遊照。



黃心穎 Jacqueline(孻女)
年僅 28歲, 12年香港小姐亞軍入行,拍過不少電視劇,近年人氣急升,主持《學是學非》,又拍《東坡家事》、《與諜同謀》等電視劇,套套擔正女二,受無綫力捧。

撰文:娛樂組
攝影:陳亦龍、李溢敏

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()