探熱針

儲定老婆本深井買愛巢 鄧健泓自爆年尾娶硬石詠莉

贊助商連結

鄧健泓( Patrick)四年前因合作舞台劇而與前女子組合 Freeze成員石詠莉( Sukie)撻着,去年三月鄧健泓終於肯擺脫浪子,當眾向 Sukie求婚, 29+1嘅 Sukie梗係即刻飯應!但係已經過了一年多時間,他們仍未有所行動,等到鄧健泓買埋樓,又簽約新經理人,他終於實踐承諾,自爆年尾會註冊正式拉埋天窗!

求婚一年都未行動

自從同石詠莉拍拖後,從前女友名單厚過本電話簿的鄧健泓終於肯修心養性,拍拖初期已經公開認定對方俾晒名分,謝絕其他飛來蜢埋身!為了圓女友歌手夢,鄧健泓更不惜傾家蕩產自資為 Sukie出碟同搞演唱會,簡直出心又出力!去年夾啱女友獲得 IFPI十大銷量廣東碟,鄧健泓更同主辦單位夾計,當眾跪地嚟個驚喜求婚, Sukie當堂感動到喊晒,鄧健泓成功抱得美人歸。
雖然落實結婚,但鄧健泓都希望事業上有點成績,而且希望可以俾老婆 Sukie一個安樂窩,所以他早前豪擲五百七十萬,買入深井豪景花園做婚後愛巢,為儲多啲老婆本,鄧健泓狂接幕後工作同頻頻到內地登台搵真銀,離開無綫有一段日子的他,近日更泊到碼頭,正式簽約俾蕭定一旗下出碟做歌手重新出發。




鄧健泓去年向石詠莉求婚成功,早前二人到加拿大影婚紗相。


鄧健泓同準老婆石詠莉現身銅鑼灣拍拖行街,其間鄧健泓電話響唔停,石詠莉扁晒嘴抗議。


見女友扁晒嘴,鄧健泓當眾挨落石詠莉氹番佢。 行街攬到實

一切都準備就緒,他們落實今年年尾拉埋天窗,二人最近除咗忙着籌備婚禮,都不忘偷閒拍拖享受二人時光,早前鄧健泓就同準老婆現身銅鑼灣一間餐廳醫肚,一向身形 fit爆嘅石詠莉似乎並冇特別為婚禮節食,在男友面前將漢堡包大啖大啖咁咬,實行醫飽個肚最重要!叉足電之後,二人隨即轉戰商場行街。
其間鄧健泓電話不停響, Sukie見男友掛住講電話唔多理佢,終於忍唔住扁晒嘴抗議,一向錫女友錫到燶嘅鄧健泓立即收線,並當眾成個身挨落 Sukie度氹番佢,真係寃氣!二人又再轉戰其他商場, Sukie睇女裝時,鄧健泓好識做咁企喺門口幫眼,又笑晒俾足意見,超級廿四孝男友囉!
後來記者上前問到鄧健泓婚事籌備嘅進度時,鄧健泓笑住回應:「我哋年尾會註冊,詳情遲啲我哋會公布,食飯擺酒嗰啲就再遲啲先算。(同對方家長見面傾大禮未?)我哋拍咗四年幾拖喇,你覺得見過未啊?過大禮嗰啲就好易話為啫,擺酒對我來講係請大家食餐飯啫!(會大搞?)唔會喇!我個人不嬲都低調。」




去年鄧健泓當眾跪地求婚,石詠莉感動到喊晒。


為咗俾老婆一個安樂窩,鄧健泓去年豪擲 570萬買入深井豪景花園做愛巢。


石詠莉入鋪頭試鞋,鄧健泓好有耐性企喺門口幫眼俾意見。


石詠莉喺男友面前將漢堡包大啖大啖咬,似乎佢並無特別為婚禮節食。

撰文:娛樂組
攝影、攝錄:陳亦龍、蕭敬漁、楊紫

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()