錢小豪歎殭屍咖哩雞

贊助商連結

打星錢小豪喺七十年代拍過唔少動作戲,到八十年代,佢開始接拍一連串「殭屍」系列電影,仲成為咗大部分香港人嘅集體回憶;一三年,佢憑麥浚龍導演嘅電影《殭屍》翻身,再食住條水,拍多咗三部殭屍片,早前連佢本人都話:「真係要停一停,拍吓其他題材先。」

話雖如此,但東姑日前去浙江橫店影城參觀,就咁啱撞正錢小豪拍緊新戲《新殭屍先生》。當日,佢一身天師袍,揮刀舞劍,先後同殭屍、蛇妖等妖魔鬼怪搏鬥;期間,更有一幕同師妹嘅親熱戲,咪以為佢可以享受溫柔鄉,結果被對方咬到一頸「咖哩雞」,大玩港產殭屍艷情搞笑片橋段。

事後,錢小豪同東姑講:「今次除咗同以往一樣要捉殭屍之外,重加埋泰國嘅降頭術同泰國妖精落去,都幾新鮮。而我所飾演嘅天師,就要拆解泰國降頭術,徐小明嘅囝囝徐沅澔就做我徒弟,用咗我三十一年前拍《殭屍先生》嘅角色名『秋生』,連導演都係《殭屍先生》嘅劉觀偉。而最過癮係,因為我普通話麻麻哋,講親對白都令班國內演員笑爆嘴囉!」佢又補充,套戲製作成本都唔嘢少,屆時會先喺網絡平台發佈,繼而會喺戲院上畫,更打算賣埠到東南亞。睇嚟五十有四嘅錢小豪,仲有大把殭屍可以打噃。

一三年,憑麥浚龍導演的《殭屍》翻身後,錢小豪現正喺浙江橫店拍緊新戲《新殭屍先生》。

 

打足近四十年嘅錢小豪,當日做天師捉蛇妖,依然有心有力,打得有板有眼。

 

戲中,錢小豪因與失散多年嘅師妹重遇,兩人纏綿期間,佢被女方飛擒大咬,成頸都係「咖哩雞」,趣爆!

 

片名叫做《新殭屍先生》,錢小豪捉殭屍嘅場面當然唔少得。

 

徐小明﹙中﹚嘅囝囝徐沅澔﹙左一﹚,戲中飾演錢小豪的徒弟「秋生」,拍攝期間,徐小明都有嚟探班;而幕後方面,就由資深導演劉觀偉﹙右二﹚執導同元寶﹙右一﹚任武指。

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()