Fascino Bespoke最受歡迎的是花紋和圖案多多的 Flash Lining內裡西裝款,內斂又帶型格,毫不沉悶。每套售$2,460至過萬不等。

創業通

玩 detail賣花紋內裡西裝 吸年輕客人

贊助商連結

西裝給人成熟穩重的感覺,男士穿上西裝後,頓時加多 20分!今年 27歲的 Benjamin,因畢業後從事保險業,他經常穿西裝見客,營造專業形象,而慢慢對西裝款式愈來愈講究。他覺得傳統西裝師傅的手工十分了得,但卻未能緊貼時興的韓國、英國及意大利的西裝款式,例如花紋豐富的內裡、沒膊墊的優閒風設計、拿坡里袖及彎領邊等。於是, Benjamin與修讀時裝設計的 Yen,連同朋友 Arnold決定打年輕人市場,開設 Fascino Bespoke西裝店,與老師傅合作推出新式的西裝,打破傳統西裝的框框,引入新的潮流。

採訪當日, Benjamin、 Yen和 Arnold開設的 Fascino Bespoke西裝店剛搬到尖沙咀約 500呎的新鋪,鋪內有不少西裝及布辦, Benjamin說:「我哋最好賣嘅係唔同花紋圖案嘅 Flash Lining內裡布西裝,內裡布主要喺英國及意大利入貨;另外,我哋仲有羊毛布、防水布、防皺布及適合婚禮用嘅閃布料,總共有過萬款布畀客人揀。」
西裝的內裡通常是淨色,但 Fascino Bespoke的裡布布料有很多不同的花紋,包括足球圖案、啤牌圖案、腰果花、彩色波點及外國海報圖案都有,選擇包羅萬有, Benjamin還說客人可以自備布料來造西裝。




Benjamin穿的這套西裝比較正式,適合開會及見客用。 Ariston Wool Suit with Flash Lining$5,000起


Benjamin親身示範的一套,內裡用了彩色波點,「因為西裝本身係格仔,所以用深藍底嘅彩色波點冇咁搶。」


內裡的布料,有外國海報款式,色彩奪目。 VBC Flannel Wool Suit with Flash Lining$4,500起


Flash Lining布料的款式色彩較鮮艷及誇張,適合年輕人,顯示有活力的形象。 參考歐洲時興款式


Benjamin(左)、 Arnold(中)和 Yen不時會開會,討論各布料的特性,如夏天將至,他們打算推出一系列採用麻質透氣布料的西裝。

Fascino Bespoke的西裝,每套售約$2,680起,至過萬元都有,全是度身訂造。所有西裝款均參考英國及意大利的時興款式為主,深受不少年輕專業人士歡迎, Benjamin說:「好似意大利嘅款式走 casual風,自然啲冇膊墊,同埋顏色花紋夠大膽,格仔都有好多款,睇起嚟會有新鮮感。」 Benjamin表示這些款式在香港比較少見,而萌起創業的念頭,全因當時自己的需要。
11年, Benjamin在城市大學旅遊系畢業,他曾當領隊及在旅行社工作,之後他從事保險業,「我自細就鍾意留意時裝潮流,喺做保險時,成日要見客,有訂造過幾套西裝,自然有留意西裝嘅潮流。雖然訂造嘅師傅手勢好好,但仲係會放膊墊,衫身比較闊。外國興緊用好多花紋嘅內裡布,叫 Flash Lining嘅設計,感覺 young啲、精神啲,覺得好適合年輕人,於是就諗,不如自己做。」

找師傅合作


現時 Fascino Bespoke搬到尖沙咀約 500呎的樓上鋪,店中展示了不同款式的西裝,亦設有試身室, Benjamin表示:「平時一般放工後,約 6pm起開始多人上嚟。」

Benjamin聯同從事時裝設計的 Yen,落手嘗試。 Flash Lining所用不同花紋的內裡布大多由英國入貨,但就設計及西裝製作方面,雖然 Yen有設計男裝的經驗,但西裝始終是一門傳統手藝,故他們決定找老師傅合作,「想跟師傅學嘢,希望日後可以傳承做西裝嘅手藝。」
然而,在找師傅合作方面,對他們來說可謂一波三折, Benjamin說:「我哋首先去唔同嘅鋪度觀摩,又去自己平時訂西裝嘅鋪頭同師傅溝通,初初係咁俾人潑冷水,啲師傅通常會話:『咁後生做咩西裝呀?』、『做唔到嘅。』」
最後他們找到一位手工非常好的師傅,他們便誠意拳拳邀請他合作,「佢覺得我哋係 3分鐘熱度而拒絕,但我哋成日上去同佢傾偈,買月餅畀佢食,希望感動到佢。前後都俾佢拒絕咗 10次,最後佢都畀我哋嘅熱誠打動到而肯教我哋同合作。」

新式西裝大不同


雖 Yen以前有從事製作男女裝,但對西裝的度身及製作程序未太熟悉,故師傅教她的度身程序及技巧十分有用,「西裝要度得好準確,背、袖長、坐圍、腰圍、褲頭及褲長等,全部數字都要精準。」

與師傅合作後, Yen坦言有不少需要磨合的地方,「意大利興嘅拿坡里袖,肩位冇膊墊,採用流水式嘅摺位會比一般袖難整;另外,英式嘅領口會高啲,同埋彎身,但傳統係用直邊,師傅要用人手挑先做到彎身。師傅最初都質疑會唔會有人買,同埋覺得咁造唔 work,但當我哋講番客人嘅好評畀佢聽時,佢好開心,大家嘅信心都大咗。」
與師傅合作時,師傅教他們度身及分辨不同的布料, Benjamin說:「好似高支數嘅布料如 100'S、 130'S就係好;佢仲會教我哋度身要度背、袖長、腰圍、褲頭及坐圍。」開業初期,他們還未有實體鋪, Yen表示經營這門生意挺辛苦,「當時自己仲有正職,放咗工就拖住個喼去幫人度身。」這樣的情況維持了 1年,雖然辛苦,但為他們儲了不少熟客,令他們有意轉做全職及開實體店。

客人變拍檔

Benjamin表示當時的客人以保險同事、會計師及銀行客為主,年齡多為 25至 40歲,其中一位拍擋 Arnold是他的保險同事及其中一位客人, Arnold說:「佢哋嘅西裝質量好好,可以媲美中環嘅級數,但價錢平一半有多,好實惠。知道佢哋想開實體鋪,我都有興趣參與。」
3人為更有效率營運實體鋪,故會仔細分工, Arnold負責財政、 Benjamin負責市場營銷, Yen則負責生產和與師傅溝通。 16年,他們在尖沙咀開設只有約 70呎的樓上鋪,最近更搬到 500呎鋪位。
現時 Fascino Bespoke月賺約 2萬,每月約賣出 60至 80套西裝。他們主力在網站、 facebook和 ig宣傳, Benjamin說:「我哋會定期 update一啲穿搭意見及新產品,西裝一年會分為冬夏兩季,每季會推出 4至 6款主打,嚟緊夏天主題係『 Fabulous』,我哋會推薄身、透氣及麻質布料嘅西裝。」

facebook@fascinoBespoke




某些西款式還有特別的設計,如這款有腰袋設計,十分方便。


Yen表示傳統西裝多用直邊,新款西裝則裝採用了彎領邊,師傅要用人手挑才可造到彎身,觀感較自然。


他們都會為每季拍攝宣傳片, Benjamin說:「我哋每一季都會有主題,嚟緊夏天係『 Fabulous』。」


這款西裝用了 Fresco防皺布料,適合外遊用。袖子用了拿波里袖設計,流線形感重,自然又穩重。 Hardy Minnis Fresco Wool Suit$6,500起


Yen表示這款西裝外套將在夏季推出,「採用 Linen silk,麻質透氣之餘,絲綢會比較滑身,着上身會舒服啲。另外,西裝冇膞墊,襯牛仔褲及優閒鞋,望落會自然啲。」 Ariston Single Linen Jacket$5,000起


除了西裝外,店中還設有其他配件,如眼鏡、領帶、袋巾及皮鞋。





Shibumi Tie$980


The Bespoke Dudes Eyewear$1,300 客人  Timothy

我做保險業, Fascino Bespoke造嘅西裝好啱身,細位可以執到滿意為止。由於老闆都係年輕人,會知道最新時興嘅款式,唔會死板。我買咗灰色格仔孖襟西裝,好輕身舒服,唔易撞款。

開業成本

租 金:$80,000(三按一上)
入 貨:$80,000
器 材:$20,000
裝 修:$130,000
總投資:$310,000

每月收支

營業額:$350,000
租 金:$20,000
人 工:$55,000( 3位老闆+1位師傅)
入 貨:$235,000(+雜費)
宣 傳:$20,000
盈 利:$20,000

撰文:霍芷晴
攝影:林文樂
部分圖片由被訪者提供

 

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()