長期測試

近期力谷  Lexus NX200t Ultimate

贊助商連結

日本車廠雖然都有唔少 SUV車款,不過比起歐洲車廠出品,總係差緊一啲「卡士」,當遇上有能力付得起車價嘅車主時,競爭力往往唔夠歐洲車。 Lexus已經算係最豪華、最有代表性嘅日本豪華汽車品牌,產品自然有媲美歐洲車質素。最近向代理借嚟最入門嘅 NX200t Ultimate版本長測四日三夜,更適逢代理為其度身訂製「 Lexus Connect」分期供款計劃,月供$6,115就可以做車主,代理用意明顯不過, NX200t就係近期力谷對象。




Ultimate版嘅車身包圍冇 F Sport版咁誇,但都一樣吸引。

Lexus NX200t Ultimate Spec.
引擎: 1,998c.c.直四 turbo
馬力: 238ps/4,800-5,600rpm
扭力: 35.7kgm/1,650-4,000rpm
傳動: 6前速自動、附+/-模式
0-100km/h: 7.3秒
車身: 4,630X1,845X1,645(mm)
車重: 1,700-1,790kg
車價:$479,500
查詢: Crown Motors( 2820 4020)

齊料吸引

NX車系係 Lexus家族中最細部 SUV,不過講到豪華程度及設備配置,就算係中等級別嘅 NX200t Ultimate都可以媲美更高一級嘅 RX!測試車嘅前座座墊竟然有三段式冷/暖功能,而且駕駛席有三組位置記憶,高級!此外,好多只出現喺豪華房車上嘅設備如 Auto Hold功能嘅電子泊車手掣、停車自動熄匙、三種行車模式及電動尾門都有!不過種種設備都唔及天幕車頂吸引,雖然只係一個固定玻璃頂,但由於面積大至覆蓋後座頂,又冇支架阻礙視線,令車內空間感極強,加上後座靠背可以調節角度,輕鬆觀賞雨景或星空,相信冇乜人唔 buy。因為 NX200t採用前輪驅動,後座地台冇傳動軸凸槽,腳部空間充裕,中間位乘客都唔投訴。




尾廂容積都幾大,放四件手提行李一定冇問題,加上後座背可 60:40分割摺疊,令空間可以靈活擴展。


後座地台冇凸槽、上方又有巨天幕,令空間感可媲美大房車。


前座完全電動調校坐姿,而且座墊仲有冷/暖功能,豪過唔少歐洲車。


玻璃天幕頂雖然唔可以打開,但都有一塊電動紗布遮光。


雖然車價只係$479,500,月供只係$6,115,但車廂都有大量真皮包裹裝飾,用料十足。 力量充沛

NX200t雖然車身唔大,但用上硬朗線條,令外表十分剛強,而事實用上 238匹馬力、 2.0公升 turbo引擎,都真係有好好嘅出力表現,單睇引擎扭力輸出比唔少同級歐洲對手都大就知,低至 1,650rpm就有成 35.7kgm扭力,筆者喺雨天下用較大油門起步,已可令 18吋輪胎發出投訴聲音。不過用車四日三夜得出嘅耗油表現話畀我哋知,大力係要付出代價,多日共行 297km,行車電腦計算平均耗油量為 12.1L/100km,如以無折扣汽油價格$15.09/L計算, NX200t耗油達$1.83/km,須知已經採用 6速波箱、唔係四驅、又有停車自動熄匙及冇乜激烈行車,所以真係唔算慳油。




引擎輸出 238匹馬力及 35.7kgm扭力,比好多小跑車更大力。


行車模式扭掣安排喺波棍旁邊,操作更加就手。


配上 18吋輪胎,外表係就係有型,但有明顯彈跳感覺。


6速+/-模式更可於軚盤背嘅撥片操作。

撰文:袁國基
攝影:葉偉豪

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()