梁雁翎喺《像霧像雨又像風》 MV裡面,有呢個自創招牌動作,估唔到廿幾年後,一班港女自拍都仲用緊呢個 pose。

探熱針

神隱廿三年經典再現 梁雁翎想當年:淨係分紅都七位數字

贊助商連結

三十歲以上嘅香港人,應該冇乜邊個未聽過「飛圖天后」梁雁翎首《像霧像雨又像風》,當年晚晚電視洗腦式播 MV,令到原本一個不知名國內歌手,出第一隻碟就賣到雙白金(十萬隻),打低唔少當時偶像歌星。
自從九四年出完最後一隻唱片後,梁雁翎便逐漸淡出香港歌壇,仲嫁埋做醫生太太,估唔到二十三年後,梁雁翎突然復出開個人演唱會,神隱多年的她寶刀未老,再次重新演繹經典都仲依然咁爆。

寶刀未老

五十一歲的梁雁翎絕跡香港樂壇二十三年,突然宣布五月舉行首次售票個人演唱會,咁耐冇見相信大家都好想知道梁雁翎究竟變成點樣,本刊就搵了她重新演繹當年經典卡拉 OK MV情節,俾大家集體回憶。
以前嘅卡拉 OK MV通常都係去沙灘行來行去交行貨,但係梁雁翎第一首主打歌《像霧像雨又像風》就飛到去荷蘭同西班牙拍攝,非常揼本,本刊就冇 budget帶梁雁翎飛去歐洲,惟有去充滿歐洲色彩嘅赤柱頂檔,冇對鏡頭做戲多年的梁雁翎,估唔到一埋位,一聽到自己首歌就上晒身即刻入晒戲,唔使熱身就做番晒 MV中招牌動作,扭晒身 un晒腳, fing完頭又順勢撥頭髮,樣樣做齊,非常專業,其間更有途人認出她,細細聲講:「佢咪係飛圖嗰個卡拉 OK天后!」




51歲梁雁翎表示自己從來冇打過 Botox,冇後天加工。


九十年代嘅 MV又點少得,漫無目的行來行去,同不停華麗自轉呢一類畫面。


梁雁翎表示自己年紀大,所以演唱會上唔會跳舞,但係呢日佢重做快歌《你歌我歌》嘅舞蹈,都仲跳得吓。 轉行賣保險

冇見咁耐,梁雁翎樣貌同身形都唔算有大轉變,而她亦好自豪表示自己唔使後天加工,「你睇吓我個樣一啲都唔膠純天然㗎,皺紋都唔係好多,我覺得唔可以太瘦,如果太瘦就好容易有皺紋。」
講番當年洗腦式晚晚播 MV策略,成功捧紅飛圖股東之一的梁雁翎,亦令她財源滾滾,她說:「一隻卡拉 OK LD賣二千幾蚊,我哋啲碟銷量好好,記得有一年淨係分紅都有七位數字,不過因為後期盜版猖獗,生意跌得好厲害,咁我哋惟有將公司賣咗出去,咁我覺得都係時候要停吓,同埋嗰年(九四年)啱啱結咗婚,想陪吓老公,點知一停就停咗廿幾年。」
淡出香港歌壇,梁雁翎轉行考了保險經紀牌,分別在香港同北京都有賣保險,但現在大部分時間都係陪老公環遊世界。




當年梁雁翎曾經同葉玉卿阿哥,即係飛圖老闆葉志銘傳過緋聞,她表示因為係生意拍檔關係,經常一齊出現,被人誤會都唔出奇。


梁雁翎一心要入娛樂圈, 85年參加過第一屆亞姐,之後又參加過第四屆新秀。


梁雁翎第一張唱片就賣到雙白金,當年仍是舞蹈藝員的謝天華,都要幫她伴舞。

撰文、攝影、攝錄:娛樂組

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()