新年假期, Joey孖住劉浩龍東京放電,四日三夜,回港時前後腳出閘。

探熱針

Joey出錢 師兄出力

贊助商連結

三月即開 side track騷的容祖兒,趁住農曆年放假,孖住男友劉浩龍去東京拍拖放電。四日三夜行程,坐商務機位,入住位於銀座區的五星級酒店,全部入 Joey數。
女友出錢,師兄出力。回程當日, Joey拉住手提行李,輕輕鬆鬆出閘,負責做阿四的劉浩龍,推住三大喼,再加一個大紙箱,緊隨其後。

咬手扮少女

去到東京, Joey同師兄急不及待打咭,師兄仲話要拍一輯「日本風情畫」。
男友操刀揸機,三十六歲容 Joey馬上變少女,咬晒手指扮 cute,連 fans都嚇親留言:「會唔會太可愛呀?」
天后去旅行,食住全部五星級。來回商務機票,每位約一萬八千蚊;在當地入住位於銀座區的 Andaz Hotel,望正東京鐵塔,每晚房租約港幣四千蚊。五星級享受,當然全部由天后包辦。

 




劉浩龍鏡頭下的 Joey,又咬手指,又扮 cute,連 fans都忍唔住留言話:「會唔會太可愛?」


劉浩龍 Harry Potter上身,氹到 Joey鬼咁開心。


二人入住於銀座區的 Andaz Hotel,望正東京鐵塔,好好 feel。 逆水行舟

上週二(二月七日),二人坐夜機返港。紮孖辮、戴住口罩的 Joey,拉住手提行李先出閘,等行李呢類要擔擔抬抬的操重功夫,由師兄負責。
相隔十五分鐘,便見師兄推住三大喼行李,再加一大箱戰利品出閘。有男友做咕喱,同一時候, Joey已經安坐保母車,篤住電話等。
為免天后女友久等,師兄同記者打個招呼,已摩打腳推住行李衝去停車場。見男友一上車, Joey開籠雀般講唔停,仲不時露出冧笑。女尊男卑又如何!願打願捱, Joey同師兄逆水行舟,眨吓眼,就五年!




上到車,二人雞啄唔斷傾唔停。


劉浩龍負責等行李, Joey就安坐保母車篤電話等。

撰文、攝影、攝錄:娛樂組

 

, , ,
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()