next1.jpg

娛頭

TVB追還騷錢 拍劇受侮辱 苟芸慧被鬧:再肥 16:9都放唔到!

贊助商連結

因為甲狀腺病,令原本人人讚靚的苟芸慧變成「肥苟」,抗病三年,最近終於邁向成功,身形縮細了兩個碼,回復靚爆「苟索」,被網民封為當今 TVB最索花旦,不過,其實她去年十二月已正式同大台脫離關係。
之前幾年的人生低潮,苟姑娘面對過無數人情冷暖,試過拍劇被導演當眾辱罵:「你再肥啲, 16:9嘅電視機都放你唔到!」又因為身形暴脹,冇人吼接唔到 job,冇收入之餘更要賠錢給無綫,生活艱難要朋友接濟。
經歷過高山低谷,瘦咗又靚番的苟姑娘,決定唔再收收埋埋,計劃今年推出寫真集,到時泳衣水著一定唔少得,保證噴血,請準備紙巾!

肥原來是罪

據講苟芸慧體重最巔峰期是一百八十磅,但時至今日,頂多只有一百一十磅左右,面尖尖之餘,身材線條玲瓏浮凸,完全是樣靚身材正的人辦!不過當事人仍未滿意,自覺仍有進步空間,希望可以重回○九年選「華姐」時,一百零五磅至省鏡期。
「係邊間報紙報導(一百八十磅)?絕對唔啱!我有問過醫生,自己控制唔到自己,見到啲衫要不停咁換,大咗兩個碼,但醫生話唔使睇數字,唔需要因為數字影響情緒,形成一種無形壓力,所以不如唔好知(體重)。」苟姑娘說。
肥到被封「肥苟」,但更令苟姑娘無法接受的,是在拍劇時被導演當眾羞辱!
「嗰陣我拍緊一套劇,可能大家(開工)攰,情緒比較唔好,我其實冇做錯嘢!做好自己角色,但嗰刻導演突然講咗句:『你再肥啲,你再肥啲 16:9嘅電視機都擺你唔到。』其實真係幾 hurt!喺鏡頭前需要有自信心,但呢句說話真係令到人好難過。」重提舊事,苟姑娘仍然難過。




苟芸慧拍劇時,被導演黨眾侮辱, 15年見她拍最後一部劇《 EU超時任務》時,她在片場都心情麻麻,唔使埋位時,自己企埋一邊睇電話。


13年苟芸慧被指介入郭富城同熊黛林之間,導致二人分手,背負住第三者指控,苟芸慧壓力爆錶,更導致甲狀腺病,身形開始暴肥。


苟姑娘話曾經有諗過離開娛樂圈,但最後諗通咗,唔想做一些將來睇番,會覺得自己冇勇氣的行為。 黎瑞恩雪中送炭

苟姑娘的人生低潮又豈止被人當眾奚落!因為甲狀腺病令她身形暴脹,品牌賺錢商業活動全面叫停,公司又沒有安排工作,以每月包薪方式出糧的苟姑娘,因為唔夠騷( TVB人工計法,是以「騷」為計算單位),有傳她因此要賠錢給無綫。
問苟姑娘是否有賠過錢給 TVB,她沒有否認!更表示當時有好多朋友幫忙,讓她可以捱過當年的難關。
「嗰陣好多人對我好,好似小恩子(黎瑞恩),漪娸姐(林漪娸)同小美,佢哋會成日主動陪我去睇醫生,我冇乜 job嗰陣,佢哋又會好願意請我食飯,又或者新年嘅時候特別俾封大利是。大家好明白我嘅處境,我好感動,會 mark低要感恩!要多謝!
「(住嘅問題點解決?)嗰段時間細佬專登喺加拿大飛過嚟陪我,佢有份工做可以分擔吓,同埋好多朋友都有幫手,為咗報答佢哋,我會煮飯俾佢哋食,一來可以慳啲,又可以表達到自己心意。」




過去三年苟姑娘發病期間,小美曾帶她到佐敦睇醫生,黎瑞恩及林漪娸都有接濟過她。


北京進修出寫真

有缺有圓,苟姑娘去年十二月已經同無綫結束賓主關係,一切雨過天晴。
「其實我都諗咗好耐,收集咗好多前輩意見,自己覺得出去(離開大台)會令自己舒服啲,想突破自己,如果繼續原地唔郁等於退步,呢一步係需要勇氣,但再睇番都唔係咁難啫!(有新動向未?)嚟緊我會去北京中央戲劇學院讀關於演戲方面嘅嘢,自己對演戲仲係有興趣。(會唔會再幫無綫拍劇?)觀眾想唔想睇吖?(最近啲網民封番你做 TVB最索花旦!)呢個位置唔好俾我做,喺公司度有好多靚女。(即係會唔會拍?)短期內冇乜意外,都應該唔會住。」苟姑娘說。
除了進修,苟姑娘今年會付諸實行的另一大 project,就是將瘦身成效公諸同好,推出寫真集。
「我希望將自己呢幾年嘅變化,同埋自己心路歷程同大家分享,等大家知道好多嘢唔係想像中咁灰。(尺度會去到邊?)泳衣我接受到,選華姐都著過,泳衣都可以好健康嘅。(接唔接受到比泳衣更少布,背脊全裸?)我都接受到㗎!只要健康 sexy都 OK。」




離開 TVB後,苟姑娘即將會去北京讀書,之後又會推出寫真集,計劃多多。


「處女黨」新員

苟姑娘曾經講過,她只要愈開心就會瘦,終於回復「苟索」身形,最大功勞相信是緋聞男友陸漢洋。自從去年八月傳出同陸漢洋拍拖消息後,苟姑娘的體重就愈來愈輕,有愛情滋潤,零舍唔同;加上「處女黨」成員例如鍾嘉欣、岑麗香和李亞男都先後結婚,王君馨亦即將嫁人,只剩苟姑娘一個。
「我知你想講我係會長(處女黨),我哋會有新會員,就係 Linda(鍾嘉欣)個女喇,哈哈……(有冇結婚打算?)我覺得自己心態唔同,唔使咁急, Mr Right肯定存在嘅!(班姊妹有冇催你快啲嫁?)佢哋要照顧老公同女,所以唔會特別擔心我,不過如果我有另一半一定會俾姊妹睇嘅,始終女仔會俾到中肯意見。
「(有冇帶過陸漢洋見啲姊妹?)你係話賽車手嗰個朋友,好似有一次喺賽車活動祖藍同亞男有見過,但係冇好刻意。」提起陸漢洋,苟姑娘冧到出晒面。




「處女黨」得番苟姑娘未嫁,她表示個黨唔會解散,鍾嘉欣個女將會是新會員。


帶陸漢洋見家長

農曆新年期間,苟姑娘被發現同男友拍拖買賀年禮物並同女方父母拜年,已經去到見家長地步,關係非比尋常。
「雖然我哋性格相反, so far相處係舒服嘅。(即係拍拖關係?)佢好忙我都好忙,大家一齊去玩傾偈,係開心嘅,不如過完情人節再話你知,睇吓佢有冇表示先。」苟姑娘說。




農曆年初一苟姑娘被發現同陸漢洋拍拖行超市,事後雙方都承認有見過家長。


日前見到苟姑娘行街,有司機接送, Benz登記車主,正是陸漢洋。





苟芸慧同錫礦大王陸佑後人,陸恭蕙堂弟陸漢洋有共同嗜好賽車,自從苟姑娘拍拖後,心情靚晒,連個樣都靚番晒。


苟索歸位

09年,得華姐冠軍,身材索爆,其後女神變「肥苟」,虎背熊腰,令工作量大降,去年離大台後,終於瘦番,「苟索」歸位。




完美體態09年,由加拿大回港參選國際中華小姐勇奪冠軍,擁有 34、 24、 36完美身材兼靚樣,昔日弗爆 105磅,被形容為「靚苟」。


病發暴肥13年,被捲入郭富城和熊黛林戀情後大受壓力,身形同時開始走樣,一日脹過一日。


不可收拾因甲狀腺問題,要服食抗抑鬱藥,身形不斷加碼,背厚腰粗,高峰期有傳體重達 180磅,被網民取笑身形笨重,企都企唔穩。


還原靚靚去年苟芸慧決心減肥,近期出席公開活動,身形和包包面明顯比之前大有改善,成功踢走「肥苟」污名。 大事化小

圈中不少火爆導演,不時向演員破口大罵甚至動粗,在片場導演最大的潛規則下,大部分演員為免傷和氣,都會硬食,大事化小。



陳茵媺 鄭欣宜
08年拍處境劇《畢打自己人》,當時還是新人的陳茵媺及鄭欣宜要拍一場喊戲,其間導演發現未 roll機,即𤷪𤺧以粗口嗌咪鬧爆,前輩毛舜筠亦忍唔住出手求情。



魏焌皓
年初《愛.回家》接近收檔,卻爆出導演張永豪當眾用劇本大力打魏焌皓個頭,再爆粗侮辱:「你呀!唔好俾我知你篤我,我祝你生仔冇屎忽。」一眾演員嚇到唔敢出聲,事後魏焌皓在 fb貼文:「脾氣好,凡事就會好,常微笑。」



佘詩曼
98年,佘詩曼拍處女劇《生命有 Take 2》,因遲到七、八分鐘及頻頻 NG,被助導破口辱罵:「你淨係識帶『塊嘢』返工!」阿佘當場爆喊。

撰文:娛樂組
攝影、攝錄:黃志明、葉志明
服裝提供: Harvey Nichols、 Lane Crawford、 Laurel
髮型: Sue Cheung@Hair Corner
化妝:亨利
場地提供: Mira Moon Hotel

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()