娛樂偵訊

李亞男要生 B 《老表》王祖藍趕工造人

贊助商連結

密返內地掘金的王祖藍,最近回歸大台,為自己有份編劇的無綫新劇《老表,畢業啦!》開工;要兼前顧後,仲要「交功課」俾一直恨生 B的李亞男,王祖藍惟有開 turbo,兼且推晒所有春晚邀請,安排同老婆農曆年出埠,再度蜜月,甜蜜造人!

放假回氣生 B

《老表》系列收得,最新一輯《老表,畢業喇!》,王祖藍繼續坐鎮度橋外,更加拉咗不少老友埋位,包括蔡少芬、郭晉安、欣宜同林欣彤等,為新劇加強陣容,省靚自己個招牌。
早前王祖藍孖住郭晉安、泰臣等現身上水假日農莊為新劇趕工,雖然是日要搶拍多個場口,但大家都非常專業,大部分一 take過,省下不少拍攝時間。
空檔休息,祖藍拉住拍檔郭晉安雞啄唔斷,其間,郭晉安頑童上身,搞到祖藍一面泥,演員合作得順,開工輕輕鬆鬆!
「祖藍因為要度橋同負責大部分幕後工作,佢習慣事事親力親為,所以自己只係做個戲份極少嘅角色。不過祖藍想過年陪吓老婆,佢一早同導演傾好,喺農曆前先拍晒佢啲戲份。其實李亞男一直都想快啲生 BB,所以祖藍都話忙完呢套劇,要休息吓先,儲番啲精力,同老婆造人交差!」一名劇組工作人員說。




王祖藍最近為《老表,畢業啦!》趕工,仲推埋春晚活動,安排同老婆度蜜月。


郭晉安一手將道具泥漿揦上手。


兩個大細路拍劇期間玩到癲。


郭晉安一手將泥漿撻落祖藍面珠。


玩到成面污糟邋遢,祖藍就地洗面。 捱義氣頂上

王祖藍原本計劃新一輯《老表》由原班人馬演出,但有部分演員度唔到期,要重新編配角色人選。
「今次劇本出得比較急,開始埋班搵人嗰陣,祖藍已經呻過話好大壓力,好似張繼聰要陪老婆(謝安琪)生 BB,今次只可以客串,而王菀之又因為要開演唱會,冇時間兼顧拍劇,好彩最後都搵到蔡少芬頂咗要做舞台劇嘅萬綺雯,仲有臨急臨忙仗義幫忙嘅欣宜,大家都好支持祖藍。」劇組工作人員說。




《老表》系列一向收得,可惜今集未能原班人馬演出。


王菀之因要籌備演唱會,而未能參演今集《老表》。


兩公婆經常湊姪女周圍玩,實習做父母。

撰文、攝影、攝錄:娛樂組

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()