豪語錄

FINAL fantasy 鄭丹瑞

贊助商連結

鄭丹瑞雖然早過了耳順之年,但講到 FF,佢至係專家。上世紀,他在港台做 DJ,創作了《小男人周記》廣播劇,講述打工仔梁寬家有惡妻,為振夫綱出外風流,瀟灑過後又發現不外如是。小男人系列後來拍成電影,當中飾演 FF對象的,是鍾楚紅、李美鳳、關之琳,「好多朋友、編劇、投資者都話,你第一、二集全部都係女神,而家第三集,都要俾個女神嚟,滿足吓大家好喎。」

是的,鄭丹瑞和周秀娜還會一起浸泡泡浴。梁寬老了,戀愛對象卻是永遠的卜卜脆,世上哪有這麼便宜的事?「好多有成就嘅男人,佢哋嘅太太、女友,都係好年輕。五十歲、同三十歲一齊,周街都見到。好多女性唔係貪男人錢,而係佢嘅才氣,或者好 admire呢個男人嘅權力,鍾意同叻人上床,我就係去寫呢樣嘢。」難怪大劉認定甘比唔貪錢,「我覺得呢個係事實。」

男女

暫且不去研究大劉甘比是否情比金堅。沒有人會覺得,陳振聰是真心仰慕龔如心的權力、才華吧?「 You never know。愛情係好偉大,我願意相信浪漫。我鍾意寫啲浪漫嘢,唔好寫咁白啦。」鄭丹瑞會寫一個老婦與嫩男青青河邊草的純愛故事嗎?「喺電影,年輕女性當然着數啲。」「就算寫,都係會去番討好所有人:梗係鍾意佢啲錢。如果寫到佢真係好鍾意呢個女人,你部戲咪死得囉!要喺創作同觀眾之間攞個 balance。」
《小男人》系列不但是鄭丹瑞和梁寬的 FF,也是觀眾的 FF。梁寬家中的老虎乸叫鄭裕玲,第二集之後,因為受不了梁寬的軟弱而離去。梁寬大受打擊,決定放下尊嚴向上爬,終於成為有錢有權有女的 sugar daddy云云。好一個勵志的故事。有想過叫 Do姐出山?「我曾經同佢通過電話,搵佢客串。本來已經袋住一嚿錢,準備傾家蕩產。但佢講咗句說話,令我冇辦法求佢幫手:我唔恨錢,我 enjoy而家嘅生活。」「『鄭九組』嗰個年代,大家好似好羡慕佢。但咁拍法,好辛苦。拍出來如果唔滿意,演員會好難堪,我明白。佢而家做吓 DJ、做吓運動、做吓大 show。一個人,冇咩顧慮。我惟有祝福佢。」

平等


兩女轉眼長大,「佢哋去讀大學時,我試過抑鬱。哎呀,咁快趣唔俾我攬住。」

Do姐着重養生,拒絕重過日夜顛倒的生活。其實阿旦何嘗不是?見過鬼自然怕黑。二千年左右,他在商台做營運總裁;每晚扭開電視,又見他在大台做主持、做司儀;連深夜時段的排毒美顏寶、碧桂園廣告,都由他包攬,「個人 function唔到,日日個樣就係咁(作喪屍狀)。去醫生度一 check,胃酸倒流、火燒心,一瞓低就揦住。」那個年代,他剛從加拿大回流,兩名女兒要讀國際學校,與今日在岸上乘涼相比,不可同日而語。「而家我十點瞓覺、朝早六點自然醒。」
其實鄭丹瑞也算得天獨厚,雖然肚腩微微發福,拍攝時披上華衣,仍是一副 model骨架,「呢啲衫我真係唔捨得買。行入鋪頭都覺得唔好意思。」跟娜姐赤裸相對嘛,總比大劉出浴容易令人接受。皮膚也算保養得宜,「打 botox?其實我都唔知係咩,盡量都唔做呢啲嘢。最重要係運動""」 Do姐也做運動,但她仍經得起高清大銀幕的試煉嗎?男女平等嘛,不過是左膠的 FF。




娜姐在《分手一百次》已跟鄭伊健浸過泡泡浴,導演又係鄭丹瑞,「當時鄭伊健用好挑釁嘅眼神望我:你有冇吖?」

現實中的鄭太當然不是鄭裕玲,「有時我都唔明,點解我要咁驚老婆。我老婆又唔係惡。到而家,我所有朋友,冇一個係我老婆唔識嘅、佢知道晒我所有行踪,我又會帶埋佢出嚟。有時啲朋友都話,你唔好咁小男人啦。」「我跳出嚟觀察,睇鄭丹瑞同鄭太的關係:呢個男人可以唔使咁。如果個老婆惡啲咪死,咪食住佢?就醞釀咗《小男人》呢個古仔出嚟。」糟糠不過是土釀,重點是那些花花草草,「當時我啱啱紅咗,靚仔、後生,實有好多女仔埋身啦!嗰時已經好多人問我。」他聲稱對感情吝嗇,沒有外慕之心,處身花叢亦不為所動,「如果有,咁又點呢?」小男人的春夢,一做便三十年。
鄭太底氣足,對老公處身的花花世界不以為然。他倆在麗的電視的年代認識,後來鄭太貪圖悠長暑假,轉行去教書,「佢 join學聯巴士團,講緊八十年代、要幫手洗巴士嗰啲,一去個幾月。千祈唔好預我,暑假最多嘢做。」「佢見嘅世界大過我。睇得多,你就唔會成日問『我老公會唔會俾個女人呃咗?』所以我叫啲女,你洗巴士、洗屎坑都要出去睇呢個世界。」

公器

鄭家兩名千金與周秀娜年紀相若,「周秀娜大少少。」戲中的盲腸由鄭伊健突破:「呢個你老豆呀?」「我就係搵伊健 challenge梁寬。」「一開始講周秀娜、泡泡浴,已經有人話:你公器私用。冇辦法,做導演、做編劇,就算唔係我演,我都有個關係喺度。」
鄭丹瑞公器私用也不止於此。《小男人 3》有這一幕: Office內有兩個不知名的 OL在講無謂嘢,「老闆(蕭定一)睇咗,話不如剪咗佢。我話唔得,呢兩個係我個女。」「我唔係要佢哋做明星。」事緣多年前,他拍了一部戲叫《黃蜂尾後針》,鄭裕玲飾演的港女入電梯,看見門外有個孕婦拖着小孩,叫「唔該等埋」,惟她即時按關門掣,「個大肚婆就係我老婆,拖住大女、佗住細女。」「我一直唔記得咗呢件事。有一日喺屋企食飯,電視就播緊呢場戲。我話,咪就係你哋?佢哋直頭癲咗,好開心,好興奮!《小男人 3》都應該有佢哋,成為我哋 family嘅 legacy。」




昔日的勁歌總選,陣容鼎盛。惟司儀離不開鄭丹瑞。


港姐又有鄭丹瑞份,「八、九十年代,有邊個 show唔係我做?如果睇電視見到唔係我,我會嬲。問點解唔搵我做?」中間是邱淑貞。


《小男人週記》第一集。 Do姐和鍾楚紅,仲要揀嗎? 糖爸


《小男人 3》開拍第三日,鄭丹瑞收到電話:「今年冇賀歲片,係喜劇就快啲拍完。」「好奇怪,今年大家都冚晒旗,咁我當仁不讓啦。」去年新春,九二年的《家有囍事》竟然重新上畫。食老本嘅嘢,記者真識條鐵。「可能中間有新科技呢。」圓滑得謹慎。

在這年代仍可以把電影當成自己的遊樂場,戰後嬰兒鄭丹瑞可知自己有幾好彩?「我覺得好感恩。《小男人 2錯在新宿》之後,不斷有人叫我再拍,港產片由一年三百幾部、到而家得番三十幾部,都有人叫我開。但邊個仲要睇鄭丹瑞?邊個要投資?」「冇人會搵鄭丹瑞,只有鄭丹瑞會搵鄭丹瑞。」他本來打算借電影發展基金,來賀自己六十大壽,後來竟然有老闆肯落疊。但香港仍有《小男人》系列中那種優皮嗎?梁[去日本出差,獲關之琳投懷送抱;現在?連東莞的溫柔鄉都已被整肅,「好多人都話,而家邊有中產?大家都係為搵食、住劏房。」所以有資格跟女神談戀愛的,只有 sugar daddy。
鄭丹瑞愛強調自己草根出生、一家 N口住板間房、鄰居正是未發達的王德輝龔如心夫婦。現在香港又回到劏房的世界,「咁先有希望。如果唔係,你班友成日喺上面,頂住晒。咁咪洗牌、由頭嚟過囉。」問題是,上了岸的人作壁上觀,下一代求之靡途啊,「我老豆係銀行小職員,咩都冇留俾我。要屋要樓,你自己去搵。」鄭家兩名千金在英國大學畢業後,輾轉又回到香港家中,「本來冇諗住佢哋返嚟,屋企得一千呎唔夠,逼逼挾挾但開心。有乜好過同一屋簷下?」大女在雜誌做時裝編輯、細女做節目製作助理。傳媒行業有前途嗎?「女係好啲嘅。始終第日會嫁人、搵個家庭。」

努力

這行業,鄭丹瑞有邊瓣未做過?講起樂壇頒獎禮,他語帶自傲,「叱咤係我同愈琤發明的。」商台素有「造王」的傳統,「咁必然係。樂壇要有新嘅聲音、新嘅力量至得。作為傳媒,邊個紅就捧邊個,咁樂壇死得仲快呀。」「如果嗰個人唔 deserve,你捧唔捧佢,佢都唔會紅。」今年叱咤,吳業坤冧莊奪得「我最喜愛男歌手」,網上一片罵聲。坤哥值得擁有嗎?「講靚仔輪唔到佢;講天籟之音,都輪唔到佢;但講努力,佢真係數一數二。」無綫捧林峯,又為樂壇帶來了什麼新力量呢?「哈哈。見仁見智啦,佢哋都好努力。」鄭丹瑞是識途老馬,當然滴水不漏,「我已經唔係 TVB嘅人,否則唔做得呢個訪問。我拍戲,唔想呢樣又唔做得、嗰個又唔做得,我都要同老闆交代。」努力是基本,「同老闆交代」的藝術,才是生存之道。

撰文:蔡慧敏
攝影:黃志明
攝錄:葉志明
髮型化妝: Milk Cheng
場地: Centre De Vin
服裝: Bottega Veneta

 

, ,
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()