落機時,鍾嘉欣親自孭住囡囡,雙手攬到實一實。

探熱針

經濟艙返港搵快錢 鍾嘉欣慳到盡同 B女分開坐

贊助商連結

去年鍾嘉欣脫離「處女黨」,閃嫁無綫前主席梁乃鵬脊醫姪仔 Jeremy Leung。今年八月,「嘉欣 BB」升呢做埋「嘉欣媽媽」。誕下 B女 Kelly後, Linda有女萬事足,長駐溫哥華全職湊女。
上週六(二十六日) Linda帶女返港搵快錢,出名係慳妹嘅 Linda,搭長途機都坐經濟艙,仲刻意同 B女分開坐。出閘時 Linda親自孭住囡囡,雙手攬到實一實。

機上分開坐

Linda今次從溫哥華返港,為咗掩人耳目, Linda叫埋媽咪同行負責照顧囡囡,在飛機上專登同囡囡分開坐。在香港逗留半個月, Linda準備充足,帶齊阿女嘅日用品同衫仔,落機時, Linda同媽咪一共推住五大喼行李。
據知,主辦商今次包埋商務機票錢俾 Linda返港,但 Linda計到盡,最後寧願坐經濟艙,連埋媽咪同阿女嘅機票錢, Linda仲有錢袋,夠晒慳家!
「因為 Linda想低調啲,所以喺飛機度叫媽咪負責湊住 BB,佢哋分開坐,原本 Linda都擔心搭十幾個鐘長途機,阿女會扭計,點知阿女差唔多由頭瞓到尾,其實今次個客嗰邊包埋機票錢俾佢,嚿錢夠佢坐商務艙,不過佢而家搭經濟艙變相慳番,有錢袋落袋。」







Kelly勁多頭髮,眼細細,個樣 100%似老豆。 B女包到冚

當日 Linda將囡囡包到冚,用大大條孭帶孭住喺心囗。一出閘, Linda保持最高警覺,將行李交俾司機後,雙手攬實囡囡,摩打腳行去停車場上車,之後直接返歸。
啱啱足三個月的 Kelly,遺傳媽咪優點,手仔、腳仔超長。早前 Linda將 B女的近照放上微博, B女頭髮勁濃密,眼細細,同脊醫爸爸餅印一樣。
「 Linda係緊張媽咪, Kelly出世到而家,堅持餐餐餵人奶,唔溝奶粉。佢唔放心交個女俾工人照顧,上次返香港要老公請假睇住個女。今次老公都請唔到咁多日假,佢咪順便帶 Kelly返香港,同啲朋友見吓面。」




鍾嘉欣叫埋媽咪返港幫手湊女,兩母女一共推住五大喼行李落機。


去年 12月,鍾嘉欣閃嫁脊醫 Jeremy,正式脫離「處女黨」。 修甲開工

Linda湊女直接返回將軍澳寓所,安頓囡囡後,爭取時間扮靚準備開工。 Linda換上一身街坊裝,同助手到附近的新都城廣場。二人先到麵包鋪,買鬆餅醫肚,仲吩咐店員翻熱。買完麵包, Linda再去美容院修甲,入到鋪頭, Linda揀了一個隱蔽角落坐低,約四十五分鐘,修完甲再折返寓所。
週日(廿七日), Linda出席商場聖誕開幕活動,腳踏四吋高踭鞋,一提起個女, Linda就笑得勁冧,仲自爆今次帶埋囡囡返港,仲大讚囡囡好乖好易湊,搭飛機冇扭計。




安頓囡囡後,鍾嘉欣再去屋企附近商場修甲,其間去麵包鋪買鬆餅醫肚。


鍾嘉欣難得返港,好姊妹胡杏兒上門探 B女,二人仲大傾湊女經。 唔識換片

其間 Linda分享湊女蝦碌嘢:「第一日由醫院返屋企,幫 BB換片時,佢『屙砵砵』,我由 change table搬佢去 seat,喺搬嘅過程,啲『砵砵』跌到成個 carpet都係。」不過 Linda就話自己而家係熟手技工,幫阿女換片再冇難度。
據知完成手頭工作,十二月中 Linda就會飛返溫哥華,一家三口過聖誕。 Linda仲話:「其實飛返嚟之前,我同老公同阿女已經去買咗棵聖誕樹,等緊我返屋企裝飾。因為阿女而家識笑,我諗聖誕節會影到好多好開心嘅相。」







鍾嘉欣出席活動期間,親自示範湊 B,仲自爆湊女蝦碌嘢。


收工後,鍾嘉欣急不及待返歸湊女。


上月初,鍾嘉欣旋風式返港 48粒鐘,出席活動搵快錢。 老闆上門探 B

週一(廿八日), Linda同媽咪又再出動,下晝四點,兩母女 shopping後,坐的士回家,落車時,二人拎住三大袋 Uniqlo戰利品,似乎幫 B女入貨。其間一向愛錫 Linda的唱片公司老闆何哲圖( Herman),亦親自上門探望 Linda同 B女。
做人阿媽後, Linda講明以阿女行先,限量接 job,拍劇就更加免問,即使無綫極力游說她接拍《溏心風暴 3》, Linda一樣 say no無面俾。
「 Linda講明阿女一歲前都唔會接大 project,就算高層都勸唔掂佢,呢段時間,拍吓廣告,去吓 event都仲可以,拍劇就唔使諗啦,等阿女大啲,到時再考慮啦。」 Linda身邊人透露。




週一(廿八日),鍾嘉欣同媽咪又出動,去 Uniqlo掃了三大袋戰利品。


一向錫鍾嘉欣的星夢老闆 Herman亦親自上門探望 B女。


今年二月,鍾嘉欣補擺酒,成班「處女黨」齊齊飛去溫哥華做姊妹陪嫁。


無綫極力游說鍾嘉欣參演《溏心風暴 3》,但她堅決 say no。 BB坐飛機

航空公司規定,初生嬰兒最少要有七日大才可乘搭飛機,而一般兩歲以下嬰兒,機票有分為佔位或不佔位,不佔位的大概為正價機票的一成價錢,機組人員可以在飛機起飛穩定後提供一個嬰兒籃(類似小型 BB床),因此,在飛機起飛或降落時都需要手抱嬰兒,另外,航空公司亦建議母乳媽媽帶備圍巾,方便可以直接在座位上餵人奶。
一般初生嬰兒坐飛機都會哭鬧,躁動不安,遇上氣壓問題導致耳仔不適,建議可用奶嘴讓嬰兒吸吮,有吞嚥動作;或使用飛行耳塞、捏鼻、鼓氣等平衡中耳氣壓。

處女黨解散

一直是虔誠基督徒的五大處女黨黨員,繼李亞男及鍾嘉欣後,早前再到王君馨宣布告別單身,處女黨即將瓦解。



李亞男
09年,被踢爆搭上王祖藍,二人發展「長短腳之戀」,拍拖七年, 14年,王祖藍於台慶公開求婚, 15年情人節,二人正式拉埋天窗,攞正牌破禁。



王君馨
多年來承認自己仍是處女之身的王君馨,一直公開有一位拍拖十一年的台籍初戀男友 Daniel,男友在美國任職銀行業,長期分隔異地;上週,二人被爆入紙申請註冊結婚,其後 Grace更在社交網宣布「我們訂婚了。」



苟芸慧
曾介入天王郭富城緋聞,導致情緒病暴肥,早前,因賽車搭上錫礦大王後人陸漢洋(前名陸恭和),不時被拍到二人出雙入對,非常甜蜜。



岑麗香
入行多年身邊不乏男性,去年,斷正跟「翻版王大陸」男友 Joshua在將軍澳商場又攬又錫,香香大方承認男友身份,上月,二人蜜遊台北,再被拍到於酒店泳池鴛鴦戲水,香香更胸壓男友,非常煙韌。

撰文、攝影、攝錄:娛樂組

 

, , , , , ,
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()