負責俾錢的莊思明一眼關七,立即通知楊明記者位置。

娛樂偵訊

防野花來襲 莊思明做煮婦餵飽楊明

贊助商連結

因為拍《愛•回家》而撻着的楊明和莊思明,今年 5月公開戀情,但拍拖不夠半年,卻發生進擊的龔嘉欣,借出席陳智燊英國婚禮出招硬撬風波。
正印位未坐暖,已經有人搞事,加上男友個底亦夠晒花,莊思明唔想有失,決定好橋重溫:先俘虜對方個胃。不時炮製愛心晚餐,有咁飽餵咁飽。
早前楊明由外地工作返港,翌日立即交人,陪女友行 city super上糧玩煮飯仔。冇見幾日,楊明不理超市人來人往,多番肉緊啜爆女友。莊思明先搞掂男友個胃呢招, work!

肉緊錫耳啜面

傍晚六時,放工超市黃金時間,同戴住 cap帽的楊明、莊思明拍拖到銅鑼灣 city super上糧。超級市場內雖然人頭湧湧,但兩人未有引起途人注意,推住購物車的楊明同莊思明貼住行冇避忌。
二人目標明確行去熟食檔,研究買邊款餸當晚餐,傾足十分鐘終於有共識,再轉去買罐頭,兩個開始頭貼頭,愈黐愈埋。之後凍肉、醬汁逐樣買,其間楊明在莊思明耳邊講悄悄話,見女友受落甜笑,楊明立即攬住對方,錫完耳仔再啜面,好肉緊。




咬耳仔楊明同莊思明咬耳仔,肯咁氹女仔,證明兩人仍在熱戀階段。


肉緊錫愈來愈 wild的楊明,見女友對自己的綿綿情話有反應,即再來個肉緊啜。


愛的抱抱楊明攬住莊思明成分鐘先捨得放開,愛到呢!


Encore再錫等職員包裝食物,楊明又再 encore嘴。 繑埋手唔俾錢


龔嘉欣借陳智燊婚禮硬搶楊明,搞到男方要在微博 po文向女友莊思明派定心丸。

大庭廣眾,怕醜莊思明笑笑口輕輕推開男友後,自己一個行去買菜,之後 join番去海鮮部,只見楊明又郁手,一手攬腰跟住啜面後,再向女友送上熊抱。
在海鮮部揀生蠔,明顯對食材冇認識的楊明,拎起不同種類生蠔左望右望,卻毫無頭緒,摸過生蠔的手順勢往牛仔褲抹,衞生零蛋。
買到一車餸,負責推車的楊明,找數時繑埋雙手,使錢,女友代勞。之後莊思明發現記者,楊明即時面色一沉,但仍保持大方,沿途有問必答。

返女友屋企開飯

壹:返屋企玩煮飯仔?
楊:(笑晒)買啲嘢食啫!
壹:邊個負責煮?
楊:唔識煮㗎(尷尬望望跟後的莊思明)!
壹:即係女友煮俾你食,你就幸福啦!
楊:係呀,係呀! Thank you thank you!
壹:咁你哋係咪已經同居?
楊:唔係(面帶尷尬)。
壹:而家返邊個屋企煮飯?
楊:而家……去一個地方煮飯!
問極楊明都堅持去一個地方煮飯,但見莊思明的司機已候駕接兩人離開,明晒。




拍拖行超市前一日,楊明在新加坡出席頒獎禮,與李佳芯一同奪得飛躍進步大獎。


莊思明一有時間便會下廚餵飽男友。

撰文、攝影、攝錄:娛樂組

, , , , , ,
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()