10月孖老公現身睇賽車,當時 Miki罕有以鬆身裙打扮現身。

探熱針

餅碎悲喜交集 楊愛瑾默認有喜 吳雨霏小產回氣再追

贊助商連結

楊愛瑾( Miki)今年 4月修成正果,下嫁永安集團太子爺郭永淳( Edwin),更極速懷有金笸籮,但因為未夠 3個月,怕 BB小器,暫未公布喜訊。
餅女命運不同!另一個餅碎吳雨霏( Kary)就冇咁好彩,去年 7月與離合多次的洪立熙( Brian)拉埋天窗後,努力大半年,今年 2月一度造人成功,可惜陀 B個多月後小產,令 Kary夫婦傷心欲絕。走出流產陰霾後, Kary積極調理身體兼停工,實行再接再厲,繼續追 B。加油!

胎兒冇咗心跳

Kary一早與老公有共識,婚後努力谷 B,皆因 Brian好恨做老豆,每次聚會見到朋友的小朋友,都爭住湊。
要配合老公開枝散葉,加上見環球力捧 GinLee, Aga又緊接上位,令 Kary更無心戀戰,決定有仔趁嫩生,意大利婚禮後,兩夫婦放了兩個月假,開行 turbo造人。
新婚生活愉快,據了解,今年二月 Kary終於造人成功,一家上下歡喜若狂。可惜懷孕個多月後, BB突然胎死腹中。
「 Kary其實身體唔差,冇諗過會佗唔穩,但做檢查時發現 BB冇咗心跳,最後要自然流產。事出突然,傷心的 Kary一時無法接受,好在 Brian夠硬淨,照顧得佢好好。」知情者說。
Kary因為流產,連好姊妹 Miki(楊愛瑾)婚前的單身泰國之旅也缺席,鄧麗欣、區文詩當時雖然知道箇中內情,但 Miki辦喜事,為免影響新娘心情,只推說 Kary有工作在身。直到 Miki四月尾於香港擺酒, Kary才現身好姊妹婚宴。




最新圖片本週二,有咗的 Miki外出回家,本刊記者上前恭喜,佢笑晒但無回應。


Kary老公好鍾意小朋友,出席友人飯局,幫人湊埋仔。


去年結婚的 Kary,婚後為想奶奶老爺快啲抱孫,同老公拿拿臨造人。


今年 3月,流產不久的 Kary,出席一早接了的活動改穿波鞋。


Kary不幸小產後,老公 Brian請了長假陪她散心。


去年結婚的 Kary,婚後為想奶奶老爺快啲抱孫,同老公拿拿臨造人。 放長假

流產對 Kary來說是沉重打擊,本來要計劃新碟錄音,但由於心情未平伏,最後向公司再申請放長假。
「 Kary突然放長假,出面謠言滿天飛,有人話係因為 GinLee入咗環球, Kary唔想同佢正面交鋒索性休息。其實 Kary流產後情緒麻麻哋, Brian心痛老婆,落令要佢放假, Brian自己都放低晒啲 job陪 Kary去旅行,等佢放鬆心情,忘記啲唔開心嘢。」
Kary流產後,身心都需要回氣,除了旅行散心,她更積極調理好身體,準備再佗 B。




Brian放大假陪老婆去韓國及日本旅行散心,希望 Kary盡快走出流產陰霾。


老人家恨抱孫

Kary收拾心情再接再厲。好姊妹 Miki更傳來喜訊,與老公 Edwin結婚唔夠半年,便造人成功,成為準雞年媽媽。
「 Miki排除萬難先結到婚,當然要趕工造人,因為老人家都心急抱孫; Miki同 Edwin亦好鍾意小朋友,兩公婆覺得有細路嘅家庭先會完整。」知情者說。




4月尾, Miki在香港擺酒, Kary亦出席贈興,強顏歡笑,有苦自己知。


3月初, Miki婚前與姊妹去泰國狂歡,但 Kary當時剛小產,便以工作為由推卻。 戒口戒得清

早前香港搞 F1, Miki與老公亦有出席,但為免被發現有身孕,她刻意穿上鬆身衫褲,又用小手袋遮肚。據知, Miki懷孕後容易攰,大部分時間留在家中休息,甚少外出應酬。
飲食方面, Miki戒口戒得很清,三餐以清淡為主,以免影響 BB的皮膚,連平日最愛吃的大閘蟹,她都忍口,好小心。
「因為仲未夠三個月,所以佢哋唔敢周圍講,得幾個身邊朋友同屋企人知。 Edwin好緊張老婆健康,除咗會親自去超巿買啲有機蔬果食物,只要 Miki想食咩就即刻整,仲緊張過自己大肚。」知情者說。




佗 B近三個月的 Miki,近日只係在 ig放咗一張用手遮肚的新相。


平日愛做 gym及跑步的 Miki,為免有閃失,劇烈運動暫停,亦小心戒口,連最愛的大閘蟹也忍口。


Miki一見到細路又攬又鍚,母愛氾濫。


Miki與郭永淳結束 8年愛情長跑,其間經歷風風雨雨,現在更有埋 B,一年內雙喜臨門。


大肚大晒, Miki想食乜,老公即刻煮,不過都是以清淡蔬菜為主。 女人最痛

孕婦期待新生命來臨,但不幸小產,定會帶來一定程度傷痛打擊。但時間可以平復一切,圈中唔少女藝人,都遇過小產傷痛,最後走出陰霾,造 B成功。



郭羨妮
14年初,與老公朱少杰育有兩歲女兒 Kylie的郭羨妮再度有喜,可惜胎兒在兩個多月流產,默默承受打擊的她,在預產期(十月底)過後,才在微博悼念她的小天使:「這孩子沒有生下來,他/她選擇做天上的小天使……媽媽這生也不會忘掉你。」



陳慧琳
10年,已有一子「蝦餃仔」的陳慧琳,要趕在 40歲前追多個,人工受孕佗孖女,但孖胎在五個多月時流產。 13年陳慧琳在訪問節目《最佳女主角》憶述難過事,仍傷心得淚流滿面。流產後兩年,她再成功懷孕,產下次子劉琛。



簡珮筠
退出幕前轉型從商的簡珮筠,為生意廢寢忘餐, 40歲才出嫁。今年初,受到生意拍檔出賣打擊,懷有三個月身孕的她因此流產。重提傷心事,簡珮筠說:「我好傷心同好大傷害,因為係我第二次小產,對上一次係年多前。」

餅碎幾多個媽咪級

02年出道的 Cookie,曾迷倒唔少宅男。散 band後成員各走不同路,部分更加變咗媽咪級。



鄧麗欣( Stephy)
屬隊長的 Stephy,同方力申拍咗十年拖,終在今年揀兩人十周年宣布分手。男方近日同何超蓮發展新戀情,但 Stephy依然單身。



傅穎( Theresa)
與羅仲謙有過一段不快戀情, 11年分手後索性離開傷心地去內地發展。她現任男友為蒙古人,發展到見家長地步,但至今男友仍未曝光。



區文詩( Angela)
在 Cookie中樣貌最平凡,但出奇地感情最多姿多采的一個。食親都係靚仔,除曾與日籍男星鈴木仁拍拖,伴侶口味亦偏向外籍人士。未婚,享受自由身。



陳素瑩( Gloria)
退出娛圈後到英國修讀金融及會計,畢業回港即成搶手貨,被四大會計師樓德勤羅致旗下,任高級審計員,未婚。



何綺玲( Elaine)
來自澳門的成員, 03年退出 Cookie後返回澳門, 14年結婚,翌年產子。



蒲茜兒( Serena)
同樣 03年退出組合,現已婚並育有一女,一家移民加拿大。



馬思恒( Helena)
退出 Cookie後移民美國,並修讀藝術治療課程,現為治療師,仍是單身。

撰文、攝影、攝錄:娛樂組

 

, , , , , , , ,
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()