搣走 50磅肥肉,苟姑娘當堂靚番晒,「肥苟」正式除名!

娛樂偵訊

愛情來了 苟芸慧回勇

贊助商連結

成功搣甩 50磅肥肉,苟芸慧終於由「肥苟」變番索!狀態回勇,即刻有着落,同錫礦大王後人陸漢洋打得火熱,還得男友親自出面解圍,否定她做「小三」,介入他與前無綫新聞部主播梁頌恩之間,導致二人分手的指控,公開確認正印地位。苟姑娘,贏晒!

包到冚

同有米陸漢洋(前名陸恭和)出雙入對的苟芸慧,早前現身中環,由男友做柴可夫接載去 shopping,兩人打風都打唔甩。
三年前因為甲狀腺和情緒問題,苟姑娘變成一百七十磅重的「肥苟」,體重向上升,但事業就走下坡。釜底抽薪,苟姑娘索性收埋自己,同無綫申請放長假,休養半年,終於有成績,成功擺脫「肥苟」污名。
「女神」歸位!全身黑色出動去 shopping的苟姑娘,雖然包到冚,但都明顯見到瘦身成果;「水桶腰」、「龍躉」、「麒麟臂」,通通 bye bye!




在文具店揀心意咭,店員細心推介。


買完嘢,苟姑娘急急腳跳上陸漢洋的 Benz離開。


摩打腳

當日只化了淡妝的苟姑娘,面尖番,五官輪廓全部回復原狀,真係索!全程戴住 handfree聽歌的她,走入一間高級文具店揀心意咭期間,同店員傾偈,心情極佳。
買完俾錢走人時見到記者,苟姑娘立即戴番副超,並摩打腳愈行愈快。原來揸住 Benz的陸漢洋,早已停在馬路邊等候。
男友時刻候命,有愛情滋潤的苟姑娘,當然不藥而癒。




甲狀腺加埋情緒病困擾,搞到苟姑娘肥腫難分,走晒樣。


苟姑娘同男友有共同嗜好,鍾意賽車。


年初,苟姑娘飛去加拿大參加好姊妹鍾嘉欣婚禮,當時仲係圓碌碌。

撰文、攝影、攝錄:娛樂組

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()