有指王祖藍近日一口氣簽了十幾位猛將,擴充山頭。

娛樂偵訊

王祖藍大搞 擸埋黎瑞恩

贊助商連結

北上撈得掂!王祖藍更獲六嬸、殼王等大老細器重,讓他在邵氏旗下自組山頭,事隔一年多,地盤愈發愈大。據悉,一口氣簽下十多個中港藝人的他,連唔等錢開飯,志在過癮的黎瑞恩都擸埋。
十幾年冇簽經理人的黎瑞恩,將復出押注到王祖藍身上,事前亦做足起底功夫。「聽好多前輩讚(祖藍),所以我撐佢。」黎瑞恩說。

增兵收埋陳國邦

去年自組公司後,王祖藍只簽了老婆李亞男,事到如今,已先後有鄧萃雯、林欣彤、徐子珊等加入,不過有齊花旦、視后及小巨肺還未夠,王祖藍繼續增強籌碼。將拍住曾志偉幫邵氏及內地開戲的他,數月來頻頻出擊,物色自由身的中港藝人密斟,羅致旗下。
有李亞男、鄧萃雯等做燈,泊埋在內地有人脈的王祖藍後賺到唔少人仔,要再增兵,事半功倍,至今,公司旗下藝人,將由四個增至十幾個,包括去年爆鑊離開大台,之後改簽部頭的陳國邦。
不過,較令人意外的,是十幾年冇簽過經理人的黎瑞恩,都俾王祖藍搞掂!
一四年,黎瑞恩與曾憲梓三子曾智明離婚後,手揸四層大埔豪宅,唔等錢開飯的她,根本冇想過復出。但去年中發現胰臟有兩個腫瘤,在不能割又冇藥醫的情況下,反而令黎瑞恩想通了:「下半場每日要過得開心。」




開檔先捧老婆 李亞男


年初簽 鄧萃雯


去年底簽 林欣彤


年中加入 徐子珊


新將去年唔再續約無綫的陳國邦,雖然仍為大台助陣拍處境劇,但近日簽俾王祖藍,準備北上發展。 先試一年啱再續

變得更積極的她,答應舊唱片公司老友出 HiFi碟過歌癮,又入紙申請紅館開騷;至於決定將經理人約交俾王祖藍,兩個原因:啱嘴型、唔束縛。
「由○二年婚後退出,到回復單身,都一直有人打阿恩主意。不過佢唔鍾意俾份約綁住,唔好話十年八年,兩年佢都嫌長。但祖藍答應可以簽一年,若果雙方合作愉快就逐年續簽,又任佢揀 job,最緊要阿恩做得開心。祖藍作風 open,莫講話阿恩係前輩,就算資歷淺嘅林欣彤,出張唱片都自己做埋製作話晒事。加上阿恩一直都好欣賞祖藍,所以大家一拍即合。」黎瑞恩身邊人說。




黎瑞恩決定復出,年底出 HiFi碟,但佢接嘅唔係慈善騷,就係義助老友做個唱嘉賓,工作只為滿足,不求金錢。


13歲大女凱栭早前到澳洲留學,臨行前鼓勵媽咪要尋回興趣目標,觸發黎瑞恩出山的信心。


杜麗莎同是祖藍、黎瑞恩的唱歌老師,二人因此認識,成就今次合作。


陳國邦拍罷大台的處境劇《八時入席》,就跟經理人王祖藍返內地搵食。 黎瑞恩讚祖藍態度好

黎瑞恩亦直認剛簽了給王祖藍的公司,更坦言事前做定功課,起清對方個底。
「我聽過好多前輩對佢(祖藍)嘅評語都係讚,話佢係個好照顧人嘅人!單係呢點,已經好值得一齊合作。其實我哋係同一個唱歌老師(杜麗莎),所以大家好早已經識得,咁朋友開經理人公司,點都要撐啦!」黎瑞恩說。
由朋友到變成戰友,黎瑞恩對王祖藍有讚冇彈。
「我同祖藍協商好係逐年續約,因為我唔想簽長約,佢亦唔想綁死一個藝人,若果大家合作唔開心,綁死都冇用!佢呢種態度,非常 good。」
出碟、開騷、簽經理人,雖然做齊全套,但聲言自己冇咩大計!
「其實復出唔係特登想要啲咩成績,只係仔女都大,有空間可以做番自己鍾意嘅嘢。就算簽經理人,都冇 plan咩大計,啱做咪做囉!」黎瑞恩說。




抑鬱病癒的林欣彤,跟大台滿約後即跟祖藍,出唱片外,還即將拍祖藍揸旗,有 Baby John同蔡少芬助陣的《老表 3》。








幫老婆李亞男及雯女鋪橋搭路賺人仔,祖藍仲話老婆上半年已做到超額,下半年可以抖抖養好身體,展開造人大計。 有錢齊齊搵

近年在內地長做長有,又夠人氣的王祖藍,接騷接唔停手,仲有錢齊齊搵,旗下一班藝人,包括老婆李亞男、鄧萃雯、林欣彤以及養尊處優的徐子珊,都受惠。



鄧萃雯
憑「如妃」一角在內地有番咁上下名氣的鄧萃雯,數年前已在內地開工作室,今年簽王祖藍後,機會更愈來愈多,除了夥拍吳奇隆合作電視劇《繁星四月》,更頻頻上真人騷,搵真銀。



李亞男
妻憑夫貴,隨住老公人氣標升,經常夫妻檔接內地真人騷外,亦不時被邀出席內地品牌活動,連同老公送贈過億豪宅,變成富貴人妻。



林欣彤
在經理人支持下,林欣彤有新歌出街,又帶住她到內地登台做騷,下月王祖藍開《老表 3》,她更升呢做女二。



徐子珊
近年專攻吃喝玩樂的徐子珊,轉投王祖藍後,獲安排出席多個內地品牌活動行紅地氈,打造成時尚達人。

撰文、攝影、攝錄:娛樂組

 

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()