J.Arie話已放棄做女神,叫佢即席表演幾個乞人憎港女表情,亦冇托手踭,她說:「我有時喺屋企都係咁。」

爆 Like王

林家棟睇中惡樣  J.Arie自認港女:唔係負面詞語!

Ads by Google

港產片《死開啲啦》講地產霸權,第一次做女主角的 J.Arie雷琛瑜做個爆粗港女,處女演出勁正評又搶戲。戲中她慘被地產商迫害,現實中的她則出身小康,父母更話畀首期佢供樓,不過佢話要靠自己。
住屋問題看似唔關佢事,但原來她的前男友,同佢分手四個月即同新歡結婚,原因係同新歡可申請到公屋。她說:「我先知房屋同愛情、婚姻係咁相提並論。」「土地問題」唔只關窮人事㗎,人人有份冇得死開。首次做爆粗港女即獲大讚, J.Arie亦直認:「我係一個港女!」

F:《 FACE》 J:J.Arie

F:點解監製林家楝揀你?


監製林家楝因為喺電視睇到 J.Arie〈第一志願〉 mv,覺得佢個樣夠惡,所以叫 J.Arie去試鏡,最後亦錄用。 網上圖片

J:林家楝喺電視睇咗我第一首歌〈第一志願〉嘅 MV,之後佢就話想見呢個女仔,我就好奇怪,點解你知我會有戲中 Apple咁港女嘅一面呢?佢話因為你個樣惡囉,佢話我個樣唔笑,本身個樣係惡嘅。

F:戲中角色非常港女,覺得自己本身港女嗎?


YouTube畫面

J:我覺得港女係每一刻對所有嘢都有要求嘅人,港女唔係一個負面詞語,睇你點解釋佢嘅啫!我唔會覺得係無理取鬧,只要你解釋到原因,你有要求係冇問題,如果 base on呢個 definition,我係一個港女。

F:戲中講地產霸權,你家境中上會唔會好離身?


J.Arie家境小康,父親為退休警員兼商人,媽媽退休前喺航空公司任職,未入行前家人相當反對 J.Arie做音樂,但早前《死開啲啦》首映,全家到場支持。 網上圖片

J:我𠵱家都係一蚊一蚊儲緊錢想買樓嘅,我有同父母傾過呢個問題,佢哋話不如我幫你俾首期,你自己再搞啦,我話唔使,我知父母由細到大俾咗好多錢我補習,學各樣興趣,唔想𠵱家出嚟做嘢仲要佢哋擔心。我有一個弟弟,亦唔想做壞咗榜樣,令佢覺得我哋後生有咩衰咗都有父母照呢啲感覺,我哋攤大手板就搞掂囉。
我之前一個男友,佢同我分手後4個月,就同第二個女仔結婚,我最後先知原來因為佢想排公屋先結婚,佢同我一齊嘅時候,完全冇同我講過居住呢個問題,但原來佢內心係咁重要。佢可能因為覺得同我冇前景,或者供唔到層樓啩?我先知房屋呢個問題,原來可以同你嘅婚姻、愛情相提並論,香港人係好 desperate去要一層樓。

F:父母之前反對你入行,最後點說服佢哋?


戲中 J.Arie同林德信有唔少對手戲, J.Arie飾演港女,近乎冇化妝嘅演出,用高8度聲綫講對白,同歌手身份的她好唔同,相當有突破!唔係蔡思貝同陳凱琳嗰種刺耳高 8度囉!  YouTube畫面

J:佢哋一直都好觀察住我,邊方面適合我多啲。我由中二開始,好鍾意玩辯論、唱歌嘅比賽,其實我係因為反叛,想做啲唔同嘅嘢,但佢哋就覺得我對語言方面有興趣,所以由中二開始一直補習英文,想我英文好,大個可能入到律師呢個行業,就會識埋啲法官呀其他律師呀,所以當港大讀緊法律系二年班嗰陣,佢知道咗我去夾 band,佢哋好嬲,試過企喺班房門口等我放學,後尾同佢哋講掂數,我完成到 degree,你就俾我簽約做歌手,最後真係做到,不過到𠵱家佢哋都想我得閒,佢哋以為我 hea嘅時候,等我考番個律師牌,我成日都要同佢哋講唔係 hea,上台前要做好多準備功夫㗎。

F:戲中你做一個港女之餘,亦要做醜女,會抗拒嗎?

J:林家楝同導演梁國斌都話論靚,同人鬥身材,你唔會夠人 fight㗎喇,你不如算罷啦!好冇?呢樣我自己都知,我覺得不如做自己,俾真實一面觀眾睇。

F:同公司有靚女 Fiona、性感有崔碧珈,自己點定位?覺唔覺條路難行?

J:我公司各有自己路綫去行,我嘅路綫一定唔係佢哋嗰啲,性感同女神唔輪到我,惟有好似戲中嘅 Apple,俾啲真實一面俾觀眾,我諗係我嘅路綫,我諗香港人𠵱家都鍾意一個 type,就係 attitude;反而唔嗲唔吊,想做靚女又玩下 attitude,香港人仲唔 like。




3年前因為簽約太陽娛樂,更獲得叱咤女新人銀獎,新歌〈冰島〉 MV上週五 po上 YouTube,一日已超過10萬點擊(左)。  YouTube畫面


網上圖片

攝影:楊學

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()