《都市日報》主席黃浩聲稱擲一億元搞新雜誌《 E週刊》,因他相信紙媒「唔會咁快死」。他指就如炒樓,他是在樓市低位入市撈底。

財經人物

學肥佬黎 黃浩「複製」壹傳媒

Ads by Google

新媒體時代,百花齊放,連被睇死的紙媒,都可以復活重賽。由《忽然 1周》舊班底打造的《 E週刊》,本週四推出試刊號,老闆是免費報《都市日報》主席黃浩,投資額超過一億元。一書三冊,看似《忽周》借殼還魂,但原來年底有第四冊,主打時事財經。《 E週刊》明顯衝着《壹週刊》(國語讀音)而來。原亦無可厚非,但最離奇是,黃浩從去年八月起,連續註冊了數間公司,名字「似曾相識」,包括:「蘋果日報集團」、「壹傳媒集團」及「香港壹傳媒出版」等。玩咩把戲?由他親自回應。




《 E週刊》將於本週四推出免費的試刊號,連續四期,隨部分《都市日報》派發,等如一個月燒錢逾千萬。

記者翻過黃浩的公司註冊處資料,他出任董事的公司近五十間,新近的註冊中,赫然發現有:「蘋果日報集團」及「壹傳媒集團」,連英文名 Apple Daily及 Next Media也一模一樣。上週五,黃浩在觀塘《都市日報》辦公室接受本刊訪問,對此他只笑騎騎說:「商業秘密,無可奉告。」他補充:「如果開呢間公司去做 similar嘅業務就唔得,但我登記,公司註冊俾咪得囉。」
據知,本集團並無在公司註冊處登記上述全名,讓人「有機可乘」。與黃浩相識、壹傳媒平面媒體行政總裁葉一堅,回應指事前並不知情,雙方亦無合作,直指是:「 Gimmick嘢,想引起話題!」並搞笑道:「係咪等我哋執呀?」他續指十分佩服黃浩:「大家對紙媒睇得咁灰,覺得係寒冬,死梗咁滯,佢就招兵買馬做《 E週刊》,我真係服咗佢。祝佢好運!」

做埋時事 一書四冊


鍾情蝙蝠俠的黃浩,辦公室牆身有一幅扮演蝙蝠俠的畫像,相當「自戀」。

對《 E週刊》的大計,黃浩侃侃而談。訪問剛開始,已遇到一位壹傳媒的舊同事,他是已停刊的《忽然 1周》合併本行政總裁趙偉堅(韋軒),現在是《 E週刊》的行政總裁。「娛樂那本,超過七成係《忽周》嘅人。」黃浩直言。創刊號一書三冊,包括《 e+娛樂》、《 MODe》(美容時尚)及《美食旅客》。《 MODe》的主理人梁錦貞,正是與《忽周》同步停刊的《壹週刊》 C書《 Next+ONe》副總編輯。人棄我取,完美演繹,連時間也夾過,「《忽周》八月八號摺書,我哋十月八日出版,剛好兩個月,唔可以拖太耐,讀者會唔記得。」
《 E週刊》本週四開始,連續四星期免費派發,十一月五日正式發行,標價十五元,亦和《忽周》看齊。另外,黃浩還請了《蘋果日報》前執行總編輯蕭煒春,打造一本時事財經書,年底推出,屆時將變成一書四冊,陣容與《壹週刊》如出一轍。明刀明槍,蓄勢待發,黃浩卻仍世界仔上身,未打先認低威:「邊夠你哋打,你哋咁多年,有咁嘅成績,我行另一條路。」什麼路?「壹仔惡啲,我溫和少少。」

搞雜誌是撈底


黃浩去年八月至十月期間,登記了三間公司,包括蘋果日報集團及壹傳媒集團等。他以「商業秘密」為由,拒絕解釋原因。

紙媒寒冬,黃浩卻投資超過一億搞新雜誌,他形容是「撈底」,「會唔會冇晒報紙呢?可能會,但幾時呢?」他用兩個例子做比喻:「好像固網電話,幾多年後會冇呢?佢嘅穩定性係咪手機可以取代?仲有,依家流行電能車,幾多年後會冇晒油站呢?我揸過電動跑車,一分鐘後發現:冇感覺嘅?」黃浩指,新書會和《都市》一樣,走中立路線,「《都市》證明咗,中立係可以做到嘅,報導一單新聞,可以將事實講出來,不一定要站邊。」
黃浩指廣告商對新書的支持超越預期,但不可以太開心,「頭幾期有話題,客會願意試,之後就要靠 sell橋,做埋廣告公司嘅角色,幫品牌賺錢,包括賣嘢、搞活動。我哋本身嘅雜誌都做緊,唔可以只靠賣一版版嘅廣告。」同時亦要慳成本,包括將雜誌不同部門的資源融合,增加效益,希望一七年可達到收支平衡。「以前負責 fashion嘅記者去外國做時裝周,就淨係影時裝,但其實可以順便做埋狗仔,跟吓名人,或做埋飲食、旅遊稿。」而愛飲食及旅行的黃浩,做埋《美食旅客》的社長,他笑言:「咁又可以請少一個人。」

市傳背後有老闆

黃浩在澳洲讀書,後於新加坡的唱片公司工作,○四年來港發展,做飲食生意,找來陳振聰投資,○九年與港姐徐淑敏結婚,成為半個娛樂圈人。一三年中,揮低細劉(劉鑾鴻)及星島主席何柱國等,以二億元收購《都市日報》,令市場嘩然。市傳黃浩背後有「老闆」撐腰,而這老闆就是郭炳湘;另指《 E週刊》背後亦有雄厚資本。但黃浩堅持指,《都市》及新雜誌都是他獨資經營的。
今年中,一度傳出康健國際醫療集團創辦人曹貴子,以五千萬元,買下《都市》一半股權。黃浩笑着否認:「聽個價都知係假啦,叫佢俾多啲,十倍、廿倍,我賣俾佢!」他指與曹貴子是在一個公開場合認識,大家有一些共同朋友,所以特別好傾。雖然一直都想搵「拍檔」,但至今未找到合適人選。他承認曾有人開價十二億,但不肯回答是否紅色資本,只表示:「傾傾吓消失咗。」
現時《都市》每日的發行量約為四十二萬,最多有五十萬。「《都市》曾經燒咗好多錢去打仗,有人話:『你接手後,反而賺多咗喎!』因為已經打完仗。另外,最重要係唔使再俾一成幾嘅版權費予瑞典總公司。」他指打算明年將《都市》上市。黃浩曾被《都市》舊老闆、瑞典的總公司入稟追討九千萬,他即反指對方欠他一億二千萬。問到官司進展,黃浩說雙方已於今年七月和解,「其實原本大家關係好好,係溝通上出現誤解。我親自同對方傾,七日搞掂!」對黃浩來說,四海之內皆是朋友,所有衝突都只是誤會;這樣做人,才會「襟撈」。




《 E週刊》現時約有一百八十名員工,暫時借用《都市日報》辦公室,月底將遷入觀塘另一商廈。


辦公室仍未編排好座位,連接待處也沒有,一打開門,就見到不同部門的記者、編輯排排坐。 于品海重鎚搞週報:「唔係好艱難呀!」


本週一,較以前蒼老的于品海返回《香港 01》的新總部開會,籌備年底出版的週報。

相對黃浩,由《明報》前老闆于品海出資的《香港 01》,政治味更濃。本週一,《香港 01》正式搬入荃灣新商廈嘉達環球中心的總部,寫字樓內「塞滿」過百員工,猶如網吧。當日下午兩時,近年大多住在北京、久未在香港公開場合露面的于品海,返回新總部開會。問到為何在紙媒經營艱難的時期大手投資,他笑笑口道:「唔係好艱難啫!」對於其他媒體裁員及停刊,他拋下一句:「做得唔係好啱就會囉。」
據指,將以週報形式發行的《香港 01》,會有六疊紙,再夾兩本不同主題的書仔,內容涵括政治、經濟及文化等。現時,已有一百多人埋班,班底主要來自《明報》及《明週》,亦有多名《壹週刊》早前裁員時離開的舊部。據內部員工透露,于品海對新週報十分上心,經常返公司開會,「佢喺會上擲好多 idea出來。」至於政治取態,去年曾有內地傳媒指他涉周永康案,在北京被限制出境,但他否認。于品海旗下另一雜誌《多維 CN》,最近創刊號以習近平為封面,被指「洗底」。但有員工透露:「佢同民主黨嘅人好熟,最近都有見面,如李永達。佢請咁多《明報》、《壹週刊》嘅人,都唔會藍得去邊啩!」

撰文:黃菲菲
攝影:張國慶
攝錄:陳浩樂
資料:黃詠茵
mailto:ed_bn@nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()