夾都冇咁啱!鄧健泓拖石詠莉行又一城,撞正前度李詩韻(施嬅),新歡舊愛同場。

探熱針

寃家路窄:現任遇前度 鄧健泓拖石詠莉撞正李詩韻

Ads by Google

因為難頂李詩韻(施嬅)公主病,鄧健泓決定走佬!分手後先後食過小花龔嘉欣和豬扒港姐張嘉兒,去年做舞台劇又撻着前女子組合 Freeze成員石詠莉。前度好胃口!李施嬅都唔執輸,泊到好碼頭,同富商男友同居貝沙灣,等嫁做少奶。上週,鄧健泓同石詠莉拍拖 shopping,竟然撞正李施嬅,新歡舊愛同場,三人有傾有講,臨走時,李施嬅更同石詠莉世紀合照,大方到呢!

 


為錢分手
同鄧健泓○四年合作拍《老婆大人》撻着的李施嬅(前名李詩韻),其間一度停工返加拿大讀書,手停口停的她,開口要求男友經濟援助,卻被對方指貪得無厭,最終不歡而散,四年情為錢玩完。事後鄧健泓更在朋友圈中唱爆前度:「正宗港女,淨係識使男友錢!」

拍拖四年,鄧健泓同李施嬅不歡而散,男方更唱爆前度「正宗港女」。

離開時,李施嬅被問到同鄧健泓「係咪朋友」時,只笑不答。
事隔多年,二人各自有着落。鄧健泓同靚聲石詠莉打得火熱,形影不離,更預告計劃明年拉埋天窗。至於李施嬅,亦如願以償釣到金龜,為配合男友家族低調作風,近年更刻意減產,為嫁入豪門洗底。
上週三(九月二十三日)下午四點,鄧健泓同石詠莉拖埋兩隻狗,現身又一城 shopping。正當二人準備離開之際,竟然撞正啱啱收工的李施嬅同經理人落車。舊相好見面冇運路走,反而大方打招呼,四人圍埋一齊有講有笑,完全冇尷尬。

最近石詠莉重返樂壇出碟,簽唱會當日鄧健泓現身撐場,在台下幫女友做攝影師。

已搬到男友位於貝沙灣寓所同居的李施嬅,出入都用男友名下的 Volkswagen白色 Golf代步,關係非常穩定。

成功釣金龜,近年李施嬅有劇都唔接,疊埋心水等嫁。
送碟又合照
其間,隨身帶備 Hi-Fi碟的石詠莉,主動送了一隻給李施嬅,之後兩女影合照,新歡舊愛笑晒口,鄧健泓負責揸機,影完相,四人才分道揚鑣。
之後李施嬅同經理人去商場醫肚,食了一個鐘,離開時記者上前問她同鄧健泓有否聯絡?在旁的經理人立即擋駕落閘:「我哋唔答㗎!」至於李施嬅則邊行邊笑,又不停口噏噏:「唔好意思!」急急腳鬆人。

石詠莉送咗自己隻靚聲碟俾李施嬅,鄧健泓仲揸機幫二人合照。

傾咗五分鐘,四人分道揚鑣,李施嬅同經理人去食中菜。

拍拖一年,鄧健泓同石詠莉愛得癡纏,男方仲做埋阿四,幫女友挽鞋。

再見亦是朋友
娛樂圈離離合合,有人反目成仇,但也有不少情侶可以畫上完美句號,再見亦是朋友。


張栢芝 陳冠希
08年,張栢芝與陳冠希因淫照事件反目成仇,女方一度公開狠批對方「貓哭老鼠假慈悲」,事後三年,二人巧遇,由台灣同機返港,栢芝主動要求換座位坐到陳冠希旁,全程有講有笑又玩自拍。


崔建邦 唐詩詠
離離合合無限次,雖然二人關係已成為過去式,但依然協議共同撫養愛貓「銀仔」,去年,唐詩詠更被拍到自出自入崔建邦住所,上門湊貓,愛情變友情,最佳示範。


周杰倫 蔡依林
由拍拖到分手,周杰倫和蔡依林這段天王天后戀,都是城中熱話。 10年,周杰倫在台北小巨蛋開 show,尾場請來前度蔡依林做神秘嘉賓,過氣情侶又攬又摸,令全場氣氛陷入瘋狂狀態。
撰文、攝影、攝錄:娛樂組
nextplus.nextmedia.com

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()