譚杏藍以前捱過冇嘢做, 6百蚊 1個月,𠵱家多嘢做到有經理人。上星期更在經理人公司做訪問。

爆 Like王

破三十萬訂閱 小花譚杏藍殺入大台拍真人騷: YouTuber好唔鍾意 TVB

Ads by Google

點擊大晒年代,劉馬車、 FFx新片多人關心過大台劇《張保仔》劇情, YouTuber比大台星更入屋,當中前亞視藝員譚杏藍 Hana都算成功,上週終於衝過 31萬訂閱人數,比起成日有 Eason新 MV睇嘅環球音樂 29萬同大台嘅 21萬訂閱更高。
18歲參加亞視星光大道入行,期間試過捱 600蚊一個月捱足一年,被人留言狂鬧樣衰兼唱歌難聽,更收過電話騷擾。𠵱家 25歲譚杏藍唔只成為當紅 YouTuber,嚟緊仲會殺入大台拍真人騷,實行再戰電視台喎!

 


F:《 FACE》  H: Hana

18歲小花由美國返香港參加星光大道第一屆,同期大台有《超級巨聲》。問佢點解唔去大台?佢話:「我兩個都有報名,但人哋截咗止!」 電視畫面
F: YouTube過 30萬訂閱有咩感覺?

小花 4年前開始拍片,第一條片得幾百人 like,今日已有超過 31萬人訂閱。  YouTube畫面

H:記得三,四年前,自己拍咗條搽指甲片上 YouTube,第一個星期得幾百 like咋,過咗一個月之後,我返去 YouTube望下,發覺點擊過咗 2,000喎,嗰陣已經覺得好勁喎,嗰陣訂閱係咩都唔知,原來可以訂閱㗎,我上年先知有訂閱呢樣嘢,非常後知後覺,係有人問我:「你有幾多人訂閱?」我仲話咩嚟㗎?
但𠵱家去到過咗 30萬訂閱,我好多謝大家,開心嘅,但唔會繼續強求,我唔係去追數字, YouTube唔係求數字。
F:當初點解想做 YouTuber?

小花第一條 YouTube片係教搽指甲油,她說:「當時唔夠膽出樣,所以成條片影手指。」  YouTube畫面

H:喺亞視工作量唔係太多,成日返朝早 7點放 12點,下午咁多時間唔知點過?我好鍾意做嘢㗎,你唔俾我做嘢我會死,自己又好鍾意睇 YouTube,咁不如自己試下啦,跟住上網學剪片。
第一條片講指甲,第一次未接受到自己嗰個樣擺上網,反而有少少怕醜,第一條片剩係影住隻手,第二條片就豁出去啦,反正冇咩人睇,同我喺亞視感覺一樣,我做所有嘢都放,因為我覺得冇咩人睇啫!起碼我自己都唔會睇。
F: YouTuber幫 TVB拍節目會唔會好怪?
H: TVB都問過我呢個問題,你哋YouTuber會唔會好唔鍾意 TVB,我話唔會喎,因為係兩個 market嚟,兩邊唔衝突,我絕對唔係要 TVB執笠啦,我係唔想㗎,佢都有生存價值,我媽咪好鍾意睇 TVB。
嚟緊有個節目,類似係一個真人騷,一班網上嘅creator去完成一啲拍片挑戰,我知好多電視觀眾是未睇過 YouTube,希望可以將 YouTube發揚光大啲啦!
F:仲有冇睇負評留言?

譚杏藍多粉絲,令佢有廣告外快搵,更叫佢拍片,但小花話:「如果係廣告畀錢嘅,我一定會寫明嘅,唔想誤導粉絲!」

H:好多人仲覺得 YouTube拍片,衰啲講句係廢青,或者係不務正業,我想話俾佢哋聽唔係㗎,分分鐘忙過其他工作,要付出可能更加多,唔只要賣笑,要努力、腦力、心力,比正常嘅工作花更多時間。
人數愈多愈多負皮,初頭睇到嘅時候,可能有咗電視台訓練,以前喺星光大道(亞視第四期星光大道成員)都鬧得好勁㗎,我諗仲難聽過𠵱家啲留言,因為當時我真係唔靚呀嘛,講真我真係唔標緻,細時造型浮誇,唱歌又唔好聽,所以超級多負評,電話騷擾都有。
所以𠵱家睇到負皮無咩囉,即係睇到好嘅留言係有用嘅,例如條片太急速喇,咁我咪較番慢啲,但如果你話我豬膽鼻,吓?我冇得變喎,但話把聲好難聽好作狀,係以前真係好作狀,亦因為聽到佢哋留言,我就用番呢把老牛聲。
F: FFx 900蚊拍 MV上位,你點睇?

小花早前都有抽 FFx水,自彈自唱〈 Sugar Baby〉都有 12萬點擊,不過佢話好後悔咁做。

H:我會第一時間諗,點樣美化呢件事囉,所以我即刻錄左個 cover,我唱 cover其實係因為隻歌真係冇問題,但對於 FFx呢樣嘢,大家真係唔好再鼓吹,我係覺得好慘,香港有好多好好嘅音樂人好作品,但點解冇人 share?點解香港人 taste有下降跡象?係因為大家造就咗呢件事?自己拍完 cover,其實𠵱家我有少少後悔,唔通我𠵱家 delete咗佢咩?我好驚有人因為我呢個 cover,而走入去睇呢個 MV(FFx)囉。我肯定,一定會有。
我覺得唔應該鼓吹呢件事再發生,天堂鳥、 FAITH嗰啲。其實夠㗎喇,我估唔到殺多個 FFx, so far係有娛樂性,我唔知仲有幾多次發生。我覺得啲人好識捉肉酸位去爆紅,捉呢個位真係好叻。
攝影:吳崇基

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()