白色襯晒
有個廿四孝男神男友傍實, Christy去到邊都好儼如公主出巡咁,笑晒是常識吧!

真面目

入屋 王宗堯 帶 整容正印 黎紀君中秋見家長

Ads by Google

早前,男神王宗堯孖住新歡女友 Christy(黎紀君)掃家品兼玩煮飯仔,情侶關係浮面,二人雖然例牌否認,不過甜爆笑容已經出賣咗囉!
上週六( 26日),出席完活動嘅王宗堯隨即變身廿四孝男友,先做柴可夫司機接送女友到旺角租 Wifi蛋,唔通準備外遊預支蜜月?辦完私事,王宗堯夜晚帶住 Christy醫肚兼見家長,成餐飯食足 2粒鐘,正印地位進一步被認定!之不過,身邊出名多女伴嘅王宗堯,據知早前曾暗撻設計師女神 Lillian簡幗儀,最後卻分手收場,難怪問到 Lillian知否王宗堯與 Christy拍拖一事,顯得莫不關心啦!
似乎正印地位, Christy坐穩咗喎!

 


做得男神,王宗堯唔憂冇女埋身,不過鑑於早前同 Baby小師妹 Sarah陳詩雅戀情見光死一事,王宗堯其後明顯對感情處理小心得多,就算月初被本刊影到同整容女友 Christy孖咇掃家品兼玩煮飯仔,二人一樣否認拖友關係,但今次撞正見家長一幕,唔到你唔認啦!

王宗堯同女友 Christy情侶裝孖咇行街,仲唔避嫌咁搭住,好閃囉!

見家長咁大件事, Christy梗係要趁住世伯、伯母未嚟把握時間補妝執番正,話晒第一印象好緊要㗎嘛!
前後腳離開
上週六( 26日),出席完港台劇集宣傳活動的王宗堯,化身柴可夫司機護送 Christy到旺角租 Wifi蛋,女方落足眼力揀,男方亦好有耐性坐低慢慢等,合拍指數爆燈!忙完正經事,王宗堯夜晚帶 Christy到西環醫肚兼見家長,成餐飯食足兩粒鐘,眼見有記者喺樓下等候,最後仲同 Christy前後腳離開添!

成餐飯食足 2個鐘,最後王爸爸王媽媽同一架車離開,免得做電燈膽。

王宗堯做埋柴可夫司機護送 Christy到旺角租用 Wifi蛋,自己仲坐埋一邊耐心等候佢慢慢揀。

王宗堯安排飯局畀女友 Christy見家長,仲專登早半個鐘到場等候,喺父母面前幫女友塑造個好印象。
本刊事後致電王宗堯,問到帶女友見家長一事,他以短訊回覆:「今日 928我唔會答其他嘢住啦!」,至於 Christy就話:「我同 Greg都仲未係拍拖嘅!純粹都仲係 dating階段!嗰日佢陪我去旺角搞啲韓文堂嘅嘢,報完佢話屋企人想同佢食飯,而我又得閒,所以 Auntie禮貌上叫埋我,的而且確嗰日都係第一次見,佢哋都好 nice,好好人!(租 Wifi蛋打算旅行用?)我租 Wifi蛋唔係旅行用,因為我香港電話 data用晒咋!(去邊都陪住你,會加分?)都會嘅!由我識佢嗰陣都好好嘅,佢不嬲都好 caring!」

王宗堯朝早就陪媽媽同嫲嫲飲茶,下晝就陪女友 Christy辦私事,夜晚再同父母食飯,男神時間分配方面有一手㗎! 網上圖片

齊賞月 網上圖片

中秋節大日子,王宗堯同 Christy呢對熱戀中嘅情侶梗係孖住一齊過,雖然雙方都冇 post對方嘅相上網,不過明眼人一睇就知咩事啦!

暗交女神設計師 Lillian

至於有傳同王宗堯拍過拖嘅女神設計師 Lillian,佢堅決否認:「梗係冇啦!千其咪亂講呀!真係朋友!朋友嚟㗎!(拍拖會祝福佢?)嘩!你啲問題咁 tricky嘅?朋友開心就會替佢開心啦!(有拍拖?)我自己有拍拖呀!」明嘅!明嘅!舊嘅唔去,新嘅點嚟喎!
撻着十全女神?
做得男神,身邊唔憂冇女啦!疑似同王宗堯撻着過仲係有樣有身材兼有學歷嘅設計師女神 Lillian簡幗儀,畢業於理大時裝及紡織系碩士, GAP達神級 3.95,碩士畢業後仲創立咗自家婚紗晚裝設計品牌,好多明星捧場客㗎!不過𠵱家雙方感情各自有着落,都算 happy ending啦!

早前,王宗堯到書展宣傳新書, Lillian仲特登到場支持兼集郵添! 網上圖片

Lillian唔只樣靚,讀書時期 GPA達神級 3.95,碩士畢業後仲創立咗自家婚紗晚裝設計品牌 Kana Lili,一班明星姐仔都係佢客仔。 《蘋果日報》圖片

據知 Lillian同王宗堯曾撻着過,可惜各有各忙,最終都係分手收場。 網上圖片

早前,王宗堯孖住 Lillian(右)探望朋友仔仔,一睇就知二人關係唔簡單,事關之前男神都係帶住 Baby師妹 Sarah出席朋友聚會㗎! 網上圖片
採訪、撰文:娛樂組
攝影:娛樂突發組

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()