V面尖下巴
就咁變靚又得,逐步變靚又得,近日陳展鵬終於進化為 V面尖下巴,雙眼皮深了,鼻子較前小巧筆直,得咗!

探熱針

變形俠醫:爭視帝太重手 陳展鵬硬膠面執出禍

Ads by Google

入行接近廿年的陳展鵬,由亞視二打六捱到變成無綫力捧小生,公司更有意谷他憑《張保仔》做今年視帝。仲有兩年就四張,陳展鵬搏盡上位,就算去年試過喪打 botox變豬頭,一樣冇有怕,再接再厲執靚啲,可惜又係太重手!換來硬化蘋果肌和僵硬尖下巴,硬膠面做戲冇表情,出晒事!

 


硬到冇表情
陳展鵬○八年重投無綫,由配角做起,近年已攀上一線做男一。被笑稱是山寨劉華的陳展鵬為求企得更穩,近年開始尋求「變化」,變靚啲!
近期,又有新改進!陳展鵬將菱角面變瓜子面,方下巴改尖,鷹鼻收細成精緻間尺鼻;仲有蘋果肌,但出手實在太重,換來一臉僵硬。
正忙於拍攝新劇《城寨英雄》的他,大翻新後面容飽滿近乎零皺紋,但卻僵硬到完全唔郁,就算笑,下巴和面部肌肉依然原封不動,同蠟像冇分別!

下巴又短又平
從前陳展鵬矇豬眼,雙眼皮不明顯,面形起角,短下巴。

鷹鼻起節
陳展鵬被稱為山寨劉華,全因他過去有個起節的鷹鼻。

變間尺鼻
近期陳展鵬鼻樑不再起節,變成間尺鼻,連鼻頭都冇咁勾。

早前出席《城寨英雄》開鏡禮,剛執完的陳展鵬面頰和眼部浮腫,非常膠樣。
唔怕再變豬頭
落重手並非第一次!去年,陳展鵬唔收錢幫美容院新店開張做嘉賓,零酬勞的回報是獲免費打造更深的雙眼皮、隆鼻和打蘋果肌。但太貪心,出手太重令他「膠化」,一臉腫脹變豬頭,驚爆!
「公司有人同煎 Pan(陳展鵬)暗示過,話佢打得太勁,塊面唔係好郁到,做戲得番對眼珠會郁,冇乜表情。但煎 Pan覺得年紀有番咁上下,好心急,覺得自己喺一線小生個位置仲未夠穩陣,想 keep後生啲。舊年大修完效果唔好,但佢見好快就冇事,最近又去執過,諗住以最佳狀態去拉票爭視帝。」一名幕後工作人員說。

陳展鵬去年曾加深雙眼皮、隆鼻和打蘋果肌,出手太重變豬頭。

去年零酬勞為美容院任開幕嘉賓,陳展鵬可免費接受「改造」,踏上變臉之路。
嬲爆洪永城
無綫小生買少見少,要留人又想幫公司搵個新 icon,據知樂易玲有意借新劇《張保仔》谷陳展鵬做視帝;可惜,中途殺出余詠珊系的洪永城。
「本來煎 Pan冇諗過自己有機會爭視帝,但樂小姐想佢加監(加簽約),又想拉攏佢入自己陣營,所以俾咗個希望佢,氹到煎 Pan好開心。點知《張保仔》出街,余詠珊硬推洪永城,明明自己戲份最多係男一,煎 Pan梗係唔滿意啦!做活動時,佢連同洪永城交戲都懶,全程黑面企埋一邊;洪永城亦懶得理佢,當自己男主角,風騷滿場飛。
「不過煎 Pan出名小器,之前同蕭正楠爭寵,大家係同組(經理人),但對方機會多過佢,所以佢好唔妥蕭正楠。今次又俾洪永城搶晒風頭,但冇辦法,人哋後台係余詠珊。」一名無綫人說。

宣傳《張保仔》時,剛執完的陳展鵬變得笑容僵硬。

陳展鵬性格計較,以前跟蕭正楠屬同一經理人時曾爭寵,不滿對方比他多上位機會。

洪永城在《張保仔》的戲份拍得住陳展鵬,令捱了多年才出頭的他唔多順氣。
視帝黑馬
今年無綫台慶劇包括有黃秋生、黎耀祥的《梟雄》、陳展鵬、洪永城的《張保仔》、歐陽震華、萬綺雯的《東坡家事》及黎耀祥、黃宗澤的《無雙譜》。秋生祥仔煎 Pan將成視帝大熱外,還有幾個冷腳人選,亦可望入圍。


蕭正楠
今年有三套劇《師奶 Madam》、《倩女喜相逢》及《風雲天地》,全部不同類型題材,加上有高層錫又有觀眾緣,屬黑馬之選。


張繼聰
勝在產量多!《四個女仔三個 BAR》、《愛•回家》、《收規華》等,其中以《收規華》最受網友力捧,仲有聽話乜都肯做,有望入圍。


楊明
入行十六年的楊明,終於憑《收規華》得到認同,隨時有機爭視帝。
下巴奇觀
藝人名人五官變幻莫測,微調滿足唔到需求,經年累月,自動變成另一個人樣。 V面盛行,下巴圓嘅方嘅一律變尖,只係基本步。
薛芷倫

曾橫行 Ball場的薛芷倫,離婚後不幸患上乳癌,自稱因治療引致併發症,嘴巴腫脹,連下巴也長到下墜,尖到似冰鑿。

陳偉霆

年前憑內地古裝劇《古劍奇譚》爆出,人愈紅,陳偉霆樣貌變化更大,面形變細,下巴愈來愈尖,卻被國粉視為新一代美男標準。

劉愷威


人面全非!劉愷威堅稱冇任何人工改動,一樣可以方面變尖,眼睛開大,鼻樑變直,明顯追住受歡迎程度而變。

撰文、攝影、攝錄:娛樂組
nextplus.nextmedia.com

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()