探熱針

轉死性:大台派粒糖 歌手車馬費$100變$1000

Ads by Google

眼見 Now明年開免費台,加上內地樂視殺到搶客,對手左右夾擊,恃住一台獨大㩒住荷包的 TVB,亦被迫改變策略,對與無綫有合約的歌星扮闊佬,車馬費由昔日一嚿水加碼十倍,「重酬」一千!

 


靚聲王先加碼
歌手在無綫出鏡,無論唱幾多首歌,花幾時間為大騷彩排演出,車馬費都只得一嚿水!直至最近,綜藝科阿頭余詠珊落 order,要對簽約歌手「仁慈啲」!
由秋官阿姐揸旗的音樂節目《 Sunday靚聲王》開始,出席歌手包括之前宣傳個唱的呂方, J.Arie、林二汶、曾路得、 C All Star等,一律獲「加薪」,車馬費由過往堅持抗通脹一百蚊,忽然加多個零變一千,打破大台慳字訣。至於上 J2節目《姊妹淘》的非合約藝人,車馬費都派五百,出晒血!

早前大台節目《 Sunday靚聲王》,俾歌手車馬費由一嚿水,變咗一千蚊,多個零頭,據聞班歌手好「 surprise」。

除《靚聲王》, J2嘅《姊妹淘》嘉賓酬勞亦加碼,有五百。
方丈變大方
據了解,過去面對一線歌手如容祖兒、李克勤等,無綫其實會彈性處理,但即使唔敢俾「賤價」一嚿水,極其量也只得三百;就算同老細殼王老死的校長譚詠麟,撐場做大騷,也只得五百。如今歌手新人出鏡派一千,咁爽手,全因競爭對手開水喉,要打硬仗,無綫唔敢再放肆,大幅加薪,扮大方!
除了派糖,無綫仲玩「特赦」。之前因為幫港視拍劇,蘇永康被無綫封殺多時,兩個月前,突然獲解禁,現身李思捷主持的《今晚睇李》,之後蘇康更獲邀做港姐評判;不計前嫌,小器方丈變得好大方!

拍過港視劇,被大台視為叛將封殺的蘇永康,近期終獲解封。上完《今晚睇李》,又做港姐評判,早前又為 J2節目做嘉賓,大台唔敢再小器。

上週余詠珊同老公 Herman主動擺和頭酒,約多間唱片公司人員食飯重建關係。
和頭酒示好
日前,余詠珊孖住負責無綫唱片部的老公何哲圖,廣邀唱片公司食飯,主動示好。
「佢兩公婆話嚟緊 J2開好多音樂節目,需要好多歌手支持,希望大家(唱片公司)同佢哋緊密合作,余詠珊仲話要帶頭搞番好個樂壇,真係笑死人!佢哋唔記得呢幾年點對其他唱片公司,單係排隊上《勁歌》都要睇面色,大騷同獎就更加益晒自己友巨聲幫,有時攞咗歌手期上節目,可以一句話:『都係唔使你哋!』冇交代就踢人走。
「依家加咗車馬費,又吹雞食飯講合作,其實都冇用!今時今日,唔會有公司會俾歌手再簽死 TVB,自由身,個個台都去。」知情者說。

容祖兒與陳奕迅等一線歌手,大台都係俾三百蚊車馬費。現在新人歌手都有一千,大台疏爽咗!

過往能令大台重酬五百作歌手演出車馬費的,就係同殼王老友嘅校長譚詠麟。
加碼挽留失敗


面臨打仗,大台唔敢再孤寒。有傳殼王陳國強為挽留將離巢的胡杏兒,出到 3600萬簽三年的銀彈攻勢留人,又把她孭飛的劇集《陪著你走》提前出街做餌,可惜仍留不住對大台心灰的杏兒。傾唔掂數,劇集宣傳將她封殺。
撰文、攝影、攝錄:娛樂組
nextplus.nextmedia.com

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()