文章分類☆熱門標籤:

 

真人騷

女神來自破碎的家 陳瀅:點解我親生媽咪會咁同我講野

Ads by Google

我知道,樣貌、體重差很遠,還要是宅男女神,但是看到陳瀅,還是覺得她有那麼幾分像欣宜。
跟鄭欣宜最像的地方,是那張總是掛着笑容的臉,漂亮、開懷,一來到影樓就有股力量能感染每個人。但是,笑容背後,其實是說不完的故事,和不由自主會往下掉的眼淚。
25歲,入行五年,陳瀅和上一任男朋友因為異地戀忍痛分手。她說覺得超可惜,因為對方的家庭是個完整美好的大家庭,在完整家庭長大的男孩子就一定好。
誰說家庭完整的小孩就一定好?她說因為自己的家太破碎,破碎家庭長大的小孩見得太多,所以會對破碎習以為常。

 

那陳瀅的成長、陳瀅的家有多破碎?她說還在媽媽肚子裡,爸爸就因為腦瘤去世,然後媽媽改嫁、生了弟弟,從此對她不聞不問,把她和姐姐交給溫哥華的外婆養大。
好幾次,我看到陳瀅眼睛紅了,差點要哭。我問她:「講媽媽會唔會喊?」她說:「一定唔會!婆婆錫我多啲,我講婆婆至會喊!」
嘴巴說不要,身體卻最誠實就是這種。結果,說到媽媽,她不但哭了,而且哭得很慘。
「對上嗰次同媽媽傾偈,已經年幾兩年前,耐到唔記得。佢問我𠵱家點、同邊幾個拍緊拖……吓?咩意思?咩叫邊幾個?佢話喎,我哋做娛樂圈就係咁亂喎……你已經唔理我喇,但你係我媽咪,點解可以咁樣話自己個女?我好委屈,諗咗好耐都諗唔到一個理由,點解我親生媽咪會咁同我講嘢。」擦掉眼淚,陳瀅又笑了,說自己就是這麼誠實坦白,所以可以一絲不掛去拍她入行以來的第一本寫真《半透明的舞孃》,因為自己甚麼都不需要隱瞞。
這是第一次,翻開一本赤裸裸的寫真集,我看到的不是肉體,而是一個女孩在赤裸裸地說故事。
前度最好,好在有個完整家庭。
𠵱家有冇拍拖呢?
冇呀……之前有,但因為異地戀分開咗。

你個樣𠵱家講起仲係好傷心喎!
係……覺得好可惜。我不嬲拍拖就係諗住最後要結婚嘅,拍過三次拖,第一個太細個,第二個一腳踏兩船,第三個我真係覺會得,就算一個溫哥華一個香港,一樣冇問題。

熱戀中嘅女仔都係咁,覺得可以排除萬難!
係!我哋真係好夾,佢真係好好,大家見晒家長,講晒會結婚㗎啦!

佢有幾好?
我好專一,佢又係好專一,好俾到安全感我。佢好誠實,好踏實,我唔識講佢做咗啲咩,總之就係好好。佢讀緊醫,好乾淨好高大好乖,佢喺一個好好家庭長大,唔會做任何衰嘅嘢,因為佢冇任何唔好嘅經歷!

邊個話好家庭長大就唔會做壞事?
因為背景複雜嘅人咩都見過囉,就算做咗唔好嘅嘢,佢都覺得可以接受,因為見過唔少……但喺健康家庭長大嘅細路,會知道唔啱、咁樣做唔得!我唔係講緊富二代、想嫁富二代喎,因為當有錢同權利,自然就會變質,因為唔知足所以想得到更多錢同權利,而少咗愛。
咁好點解會分手?
分開兩地太耐,已經忘記咗點樣同佢溝通。由開頭每日一個電話,到之後幾日一個,我每日做過啲咩又唔可以第一個同佢分享,因為呢度日頭嗰度夜晚。到我同人哋講完晒發生咩事,輪到佢起身再講,又已經提唔起勁再重覆講多次……慢慢,樂趣變咗責任。尤其喺 TVB拍劇嗰排,佢唔明點解我可以咁忙……

你嘅事業啱啱開始,既然佢咁好,點解係揀咗事業唔係揀佢?
對我嚟講,事業真係好重要。因為我由細到大,都係婆婆湊大,唔係媽咪。媽咪直情冇理過我……我見到佢,就知道女仔唔可以冇工作,唔可以因為老公放棄自己事業。到有一日冇咗老公,自己咩都冇得淨。

2歲 我和姐姐

22歲 回流出道
我諗唔明,點解嗰個係親生阿媽?
好多人嘅愛情同人生觀,都受到父母影響,係真嘅!
係呀,因為我自己家庭環境好複雜,所以我真係好想第時自己嘅小朋友可以有個好完整嘅家。

其實對上嗰個男朋友,你係想嫁俾佢,定係嫁俾佢屋企?
我明你講咩……我明,都係㗎……

你爸爸去咗邊?
佢過咗身,腦生瘤,好突然,佢過身嘅時候,我仲未出世。跟住媽媽改嫁,生咗細佬,我同家姐交咗俾婆婆湊,供書教學係繼父負責,除此以外,媽咪再冇理過我。

點解媽媽唔理你?
咁你要問番佢喇,佢比較自私……細個都買下玩具俾我,大個越嚟越生疏。

對上嗰次對話係幾時?
耐到唔記得,好似有年幾兩年!爹哋喺廣州做嘢,我點解會由加拿大返咗嚟香港做交流生,都係想同爹哋媽咪近啲、感情好啲,我以為只要我努力,搬近啲,做多啲,就可以改善。都叫做好咗,不過爹哋雖然唔係我親生,由細到大都好錫我,所以我都改咗姓,由姓鄭改做跟佢姓陳。


爹哋錫你,你睇到,但係媽咪錫你,你完全睇唔到?
係,佢錫細佬錫家姐,但我硬係 feel唔到佢有擺心機落我度、成日攻擊我。對上嗰次我哋傾電話,佢問我:「點嘛?你同邊幾個拍緊拖?」吓?咩意思?咩叫邊幾個?佢話喎,我哋做娛樂圈就係咁亂喎……你已經唔理我喇,但你係我媽咪嚟㗎,點解你可以咁樣話你自己嘅親生女?我好委屈、諗咗好耐,諗唔到一個理由,點解我媽咪會咁同我講嘢。

你覺得媽媽應該係點?
我𠵱家搬咗同何雁詩一齊住,佢媽媽好好,搬出嚟住會幫佢 plan好晒、買傢俬,但係我冇囉,所有嘢都係自己處理。人哋係媽咪煲湯攞嘢過嚟食、媽咪日日打嚟噓寒問暖打到覺得煩,我係婆婆。婆婆早排都打嚟,佢話見到我啲新聞好唔開心,點解又忙又水腫月經唔定時仲要影本寫真出嚟全裸……佢唔明呢行,佢以為我被人呃喺電話度喊,聽到我心都痛。何雁詩有咩事都有媽咪打嚟傾,我每日幾忙幾辛苦返到屋企都係一個人,有時都會問自己,其實值唔值……

所以你成日笑,特別想討人歡喜?
絕對係!所以媽咪成日讚家姐又懂事又生性,我就要入比家姐間大學更難入嘅 UBC商科,就係想媽咪都讚我一句。結果入到嗰刻打俾媽咪,佢淨係講咗句:「係呀?好吖!」
如果爸爸喺度,一定會好錫我!
好多報導話你揸靚車、住靚屋,係唔係真係咁富貴呢?
梗係唔係啦,我架 Audi TT係二手、住就同何雁詩夾份,大學畢業以後就係自己賺自己使,其實𠵱家大學貸款都未還完。當然媽咪改嫁後供書教學都係爹哋,爹哋亦都好錫我,唔係物質,係無論幾忙都好,我去廣州佢一定抽時間陪我、帶我見朋友。我未夠十八歲,佢已經會帶我落夜總會睇啲叔叔伯伯搵女仔陪,佢話呢啲地方佢希望係佢帶我見識,好過第二個男人帶我去。佢想我知道嗰度有幾污煙瘴氣,等我自己決定第時會唔會嚟……所以我𠵱家都唔鍾意蒲,都唔會喺夜店識男仔。

所以個天對你好公平,親生爸爸唔喺度、親生媽媽對你唔好,但有個好錫你嘅婆婆,又有個當你親生女一樣嘅繼父!
係呀,所以親唔親生由細到大對我嚟講並唔係問題,佢就係咁錫我。有時佢都會無嗱嗱打俾我,問佢係唔係有事,佢話:「冇吖,掛住你咋嘛……」呢啲嘢媽咪從來都冇做過。細個我都會問親生爹哋嘅嘢,有攞家姐騎住爹哋膊馬啲相嚟睇,婆婆話我知爹哋好鍾意女、好錫家姐,如果佢喺度,都一定會好錫我。

讀商科,點解會入咗呢行?
細個好多人叫我選美,但係我又真係冇諗過入呢行。直到大學返嚟香港做交流生,成日收到星探派咭片,至開始問自己,係唔係可以試下。

22歲 處女登場

23歲 拍住毒王
呢一行你聽得多見得多,實際做落,你覺得一個藝人賣緊乜嘢?
個 product就係我自己,我讀 marketing會咁諗。我 sell嘅陳瀅係一個開心、陽光、敢做嘅陳瀅。仲有一個優勢,我係一個好坦白、誠實嘅人,冇嘢需要隱瞞、需要收埋。所以全裸,我一樣得。本寫真拍嘅時候冇預會全裸,但係嗰個 shot,既然全裸同隻貓同仙人掌夾,我就 buy。

你誠實坦白啫,但你喺呢行有冇見過啲又假又滿口大話嘅呢?
當然有啦!批踭?冇喎…… TVB都冇啫……反而係喺 model界,有啲人明知我同呢個男仔拍拖,仲會私底下 message佢。仲同我講冇嘢、扮冇事,其實我一早知佢係同緊我條仔講嘢。

嗰個女仔靚唔靚?身材好唔好?前男友抵唔抵受得住佢誘惑?
嗰個係第二任前男友,佢抵受得過呢個女仔嘅誘惑,但係抵受唔到其他……但係講真,當時我都只得廿歲,嗰個年紀係人都貪玩,最後佢因為有咗第二個分手,我都冇嬲佢。但感情嘅嘢就係咁,一次兩次我有俾機會佢,但唔好嘅記憶已經存在、越儲越多,明知大家一齊唔會再有將來。

23歲 親生一樣

24歲 少女慧珊
一年前同前男友分手,喺娛樂圈有冇再遇到咩人?
真係冇,同我做嘢嘅都係女仔多,出到去我又唔鍾意蒲,從來冇發出一個訊號:「我單身㗎!你追我啦!」難得去玩都係同啲識嘅人,無嗱嗱行埋嚟話要請我飲杯嘢嗰啲,我都一定會拒絕。

最終喺呢一行,你想去到一個咩位?
我想有事業,但係又唔係對呢行太大野心,始終我希望可以順其自然遇到一個人,結婚、生仔然後離開呢個行業,未遇到,咪繼續做嘢囉。我只係想做嘢做得舒舒服服、開開心心。講到底,其實我都係想有一個完整嘅家,屋企有爸爸媽媽、家姐細佬,日頭我哋一齊玩,夜晚爸爸一收工就即刻返屋企食飯,我覺得,屋企應該係咁。

25歲 素顏全裸

25歲 四個女仔
世上只有


這一隻唱好媽媽的歌仔,並不是人人啱聽,比如陳瀅。
三個孩子,只疏遠她一個,陳瀅說不是不想找到答案,而是跟媽媽越離越遠,這個問題一直沒機會問。誰知道呢?可能陳瀅的出世代表了一段不快樂的回憶,媽媽是故意躲開,不願想起。又何必呢?一個人悲傷已經足夠,又為甚麼要讓親生骨肉陪着自己一起受罪?
撰文:朱小博
攝影:范仲良
化妝: Vinci Tsang
髮型: Larry@IL Colpo
形象: Bryan@the Flaming
服裝: N12H

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(1) 人氣()


留言列表 (1)

發表留言
  • 您的暱稱 ...
  • 點會有人講自己親生媽媽你自己係咪好有問題呢
找更多相關文章與討論

您尚未登入,將以訪客身份留言。亦可以上方服務帳號登入留言

請輸入暱稱 ( 最多顯示 6 個中文字元 )

請輸入標題 ( 最多顯示 9 個中文字元 )

請輸入內容 ( 最多 140 個中文字元 )

請輸入左方認證碼:

看不懂,換張圖

請輸入驗證碼