對於樂視進駐本港市場大搞網劇,王宗堯表示歡迎,仲話最緊要用番本地藝人、本地幕後班底,題材梗係要貼近港人啦!

真面目

有得揀 樂視扮本土 開劇吸客 王宗堯: TVB維穩又繼續支持咩?

Ads by Google

多得「一男子」,無綫繼續一台獨大,維穩手法更加愈做愈揚,努力迎合強國需要!
本週四( 24日),除咗係港視最後一劇《開腦儆探》正式落幕外,同時間強國樂視網亦會舉行「開創娛樂新時代」記招,宣布來年大搞網劇同奪得 3年獨家英超轉播權,早前已搵嚟王宗堯拍攝宣傳片造勢,擺明攞景兼贈興!為迎合港人口味兼洗甩強國背景味,樂視喺宣傳功夫上做足功課,有份拍宣傳片嘅王宗堯都話:「 TVB做緊好洗腦、好維穩嘅節目,唔通又要繼續支持佢喎!」

 


港視劇集清倉,最後劇集《開腦儆探》於本週四( 24日)播完,魔童網劇時代正式落幕。與此同時,樂視網正式進駐本地市場,除咗之前拍完嘅《我的老千生涯》同《天才在左瘋子在右》兩套網劇,大擲天價 47億投得 3年英超獨家轉播權,仲計劃每年最少開拍兩套網劇,有意在港殺出條血路。

有傳樂視以 47億天價投得 3年香港英超獨家轉播權,仲特登搵嚟前港視藝人王宗堯拍攝宣傳照!網上圖片

大埔 LuLu亦有份拍攝宣傳照,佢以短訊回覆本刊就話係公司安排嘅工作,雙方未有下一步嘅合作計劃,仲話:「如果樂視播英超,我會希望佢用香港人聽開嘅球星名,而唔係其他嘅譯名。」網上圖片
港視班底

由黃日華擔正嘅《開腦儆探》於週四就會播完,港視正式結束網劇時代,王維基亦被 689「一男子」搞到無意再發展網劇。網上圖片

據知樂視製作的劇集,每集投資額高達 50至 100萬,名符其實大水喉射住。為迎合港人口味,在香港拍攝嘅網劇會沿用本地藝人同幕後班底,題材亦以港人口味為主。問到有份拍攝英超宣傳片的王宗堯,佢坦言資金來源冇問題,「當香港電視冇製造,其他地方有新資源,喺本地投放製造、用番香港演員,題材當然關於香港,你諗下點解唔接受呢樣嘢?我哋有智慧去判斷嘅時候,起碼都識分! TVB雖然話係香港人嘅電視台,但佢依然做緊好洗腦、好維穩節目,莫非我哋要繼續支持呢個風氣咩?」
至於有份拍《我的老千生涯》的張松枝就話:「搵我做嘢嗰啲都係朋友,有啲係舊底 HKTV嘅同事。(樂視係紅色背景喎?)佢出糧畀我咪得囉!最緊要出糧畀我!基本上大陸同香港嘅劇集同電影都連埋一齊,唔好分得太開。」講到尾,如果維基開到台就好!
力推 K-pop

樂視除咗大搞網劇同英超轉播外,仲會轉播韓國受歡迎節目,女團 Sistar有份演出的演唱會亦係樂視力推節目。網上圖片

網上圖片

為咗迎合港人口味,樂視用漫畫嘲諷其他電視台,雖然負評多多,不過已經成功達到一定嘅宣傳效益。網上圖片

有紅色背景嘅樂視,就算出動埋用漫畫鬧 689嘅橋段,一樣取悅唔到本地網民嘅歡心。網上圖片

樂視宣傳技倆多多,不過網民反應就似乎唔受落,仲大鬧叫佢咪扮香港人添!網上圖片
搵應采兒做膽
樂視有紅背景大把水,所以喺製作方面梗係冇手軟,年尾由應采兒做監製、鄧麗欣主演的《天才在左瘋子在右》則是強推的自家製作。

樂視攻佔香港市場,執行總裁莫翠天(右)講到明「公司不靠硬件賺錢」,每部劇集仲會投放 50至過百萬製作,至於早前應采兒監製嘅新劇《天才在左瘋子在右》就斥資 2000萬港幣拍攝,向華強同執行總裁梗係孖住出席記招造勢啦!

新劇《天才在左瘋子在右》大部分沿用本地藝人,好似女主角鄧麗欣、連詩雅、陳小春同張建聲等等,而柯有倫係僅有的外地演員。
廣東話播

另一套播映中的《我的老千生涯》,演員有張松枝、陳宇琛、曾國祥同邵音音等本土演員,香港出街時會以廣東話播放。《蘋果日報》圖片

《我的老千生涯》由曾國祥擔正,佢話冇諗過套劇可以喺香港播,又話唔知有幾多港人知道樂視嘅存在,所以要幫手宣傳下喎。網上圖片
採訪、撰文:娛樂組

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()