宣布分手後,阿 Sa即去蘇州出活動,週日漏夜飛返香港,下午就去綵排,個樣勁憔悴。

真面目

分手收場 陳偉霆多女埋身 阿 Sa橫店突擊檢查出事

Ads by Google

強國錢多女多粉絲多,到底多成點?咪就係多到足以摧毀一段排除萬難都要愛嘅五年戀情囉!
想當年英皇大師姐蔡卓妍愛上小師弟陳偉霆,唔理地位懸殊一大截、唔理年齡差足三年幾、唔理自己之前有個秘密老公鄭中基,離埋婚都要愛!雖然週日( 20日)至宣布分手,其實早喺年頭阿 Sa北上探班, William唔領情去咗陪疑似小三趙麗穎。當「而我不知道」紅遍強國,錢多女多粉絲仲多,仲同你講舊情?

 


5年情話散就散,同日同時推出相同內容微博宣布分手,至截稿為止,陳偉霆錄得 20萬個 like,阿 Sa就只得 8萬個,一眼睇晒,當年女尊男卑嘅姐弟戀今時今日已經形勢逆轉。曾幾何時,係 Sa粉鬧爆 William踩住上位襯唔起 Sa,到今次分手,就輪到 William強國粉絲熱烈地彈琴熱烈地唱,叫 Sa滾回香港喎!

10年阿 Sa排除萬難高調戀上陳偉霆,有傳陳偉霆更是阿 Sa向鄭中基提出離婚的最大原因。《壹週刊》圖片

週日( 20日)幾乎同一時間推出標題不同,但內容完全一致的分手聲明,明眼人都看得出 Sa霆戀其實一早變質,只不過挑選適當時機公佈。網上圖片

今年農曆新年,阿 Sa同好姊妹阿嬌去馬爾代夫旅行,當時 William聲稱忙開工未有同行。網上圖片
玩驚喜空歡喜
當愛已成往事,個個都話係兩位各有各忙聚少離多,其實一人行一步,肯努力又點會冇得見?《 FACE》得知,至少 Sa真係有努力過囉!
話說強國劇一個接一個,橫店已經變咗 William半個鄉下。為咗見多一面,今年頭忙住宣傳《雛妓》爭影后嘅阿 Sa山長水遠都要飛一轉橫店,收晒風得知當日劇組早收、去定 William橫店寓所一廂情願製造驚喜,點知等極唔見人,先知原來男友陪劇組去咗唱 K盡慶。原來當時 William身在橫店拍緊正是現在內地熱播的話題劇集《蜀山戰紀》,叫得郁 William,與劇組有份陪玩的,正係疑似小三、同劇女角趙麗穎。雖然今次二人聲明力稱和平分手,趙麗穎亦都通過經理人向外界否認介入,不過無可否認 Sa威廉年初經此一役急轉直下,趙麗穎「功不可沒 l」。

拍拖五年,形勢由女尊男卑變男尊女卑,近年往往被拍到的都是 Sa送上門去內地片場,求見 William一面。《壹週刊》圖片

上月澳門英皇晒冷演唱會,二人終於有得同場不過零互動,其實早於宣布分手之前,阿 Sa與 William已經熱情不再。《蘋果日報》圖片

今年三月在橫店拍攝《蜀山戰紀》期間, Sa失驚無神飛去製造驚喜,不過陳偉霆就掛住同同劇男女演員消遣,唔多受用。

同正印聚少離多,相反 William多次製造同疑似小三相聚機會,一手促成趙麗穎加入《十二道鋒味》第二輯做嘉賓。網上圖片

年初拍劇期間不斷發出親密合照,週日分手聲明後,趙麗穎又發《鋒味》合照疑似宣示主權,都話強國女仔唔好惹!網上圖片

網上圖片
唔只一個
相愛五年,阿 Sa對陳偉霆一條心,五年來一個緋聞都冇,而陳偉霆走紅強國後亦都走出一籮緋聞女友,除咗嫌疑最大嘅趙麗穎,仲有兩個候選佳麗!

邊疆風味
在強國劇《古劍奇譚》飾演大師兄暴紅,而廣大霆粉都話陳偉霆勁襯劇內小師妹、維吾爾族美少女迪麗熱巴,二人亦冇令大家失望,私底下極多互動,長期保持緋聞關係。網上圖片

煲水洗頭
合拍洗頭水廣告,陳偉霆與謀女朗張慧雯被塑造成「小鮮肉」與「小鮮花」的金童玉女組合,不過似煲水賣廣告多啲!
不能不知道
本來係「的士陳」,連曉明大哥都話「而我不知道誰是陳偉霆」,自從 14年拍完強國劇《古劍奇譚》即變紅透內地小鮮肉,好快多人識佢多過識 Twins。


網上圖片

一年之內,微博粉絲由 100萬變 1000萬,仲要大部份都係死忠活躍粉絲,求其發條微博都有十幾廿萬個 like,亦都被《小時代》導演郭敬明睇中主演重頭新戲《爵迹》。網上圖片

反觀 33歲阿 Sa,喺強國被霆粉鬧爆,一分手仲拍晒手掌,叫佢「滾回香港」。網上圖片
採訪、撰文:娛樂組
攝影:娛樂突發組

文章標籤
創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()