Danny 8月中到北韓旅遊,正正係南、北韓關係緊張之時,南韓士兵遭地雷炸傷,北韓則抗議南韓喺邊境播放反北韓宣傳廣播,但 Danny身處北韓元全唔知情,直至返到中國睇新聞至知。

爆 Like王

踢爆洪永城河蟹 高登巴打北韓揭秘:發展得好嘅只係佈景板

Ads by Google

北韓,洪永城話係「發展得幾好」嘅地方,更聲稱為觀眾拍下不為人知嘅一面,真係多謝都表達唔到對佢嘅謝意!
眾所周知,大台只係播出北韓政府「提供」嘅一面,禁止拍攝嘅真實一面又係點?最近有位高登巴打 Danny亦去咗北韓,而且冒險影咗好多禁相,喺高登分享所見所聞即有過千留言關注。大家都係跟團, Danny絕對深入過洪永城,至少佢敢講:「發展得幾好嘅係佈景板!」 


F:你嘅團同經歷跟洪永城嗰個有乜分別?

洪永城節目只播北韓美好一面,又話平壤「發展得幾好」,被鬧美化北韓。 網上圖片

D:佢第一站新義州,我只係經過所以冇炸雞薯條;但我有去妙香山,喺平壤東北面,有個國際友誼展覽館,專門展示包括中國送畀朝鮮嘅禮物,特別嚴格唔俾影相,四圍都係軍人;有個團友冇攝好件衫行過金日成個像前面,導遊大聲喝住佢,要佢即刻背住整番,好明顯係命令式。
F:北韓遊客有咩要遵守?

喺北韓偷拍軍人係大忌,奉勸大家睇相就夠,去旅行就唔好咁搏喇!

D:交團費時已有張 list寫明有咩唔做得,喺丹東火車站又講一次,喺火車唔可以影相、唔影得軍人、唔可以隨便喺街行、夜晚唔出得酒店等,好強調北韓係專制嘅國家。導遊發現你亂影會拍一拍你叫你咪影,但被軍人發現你影佢,會好嚴厲叫你刪相。火車入到新義州會有軍人上車,登記手機型號,旅程完結會單對單 check手機、相機,有禁相要刪除,好多團友被刪走一半以上,我換咗卡收埋至帶到啲相返嚟。
F:有乜所見所聞係洪永城冇講?
D:北韓接受旅客 3種貨幣,人民幣、歐元同美金,但喺景點附近啲鋪頭,係唔賣嘢俾遊客,你拎人民幣出嚟,就算幾多錢都唔賣畀你,總之有啲商鋪係唔畀遊客購物,想買支水都冇。我哋亦有參觀中學,有入過課室,當時啱啱落堂,見到其他學生、老師,感覺佢哋係真嘅學生,但佢哋習慣咗面對陌生人,會望鏡頭好似好有經驗,可能每個團都係去呢間中學。另外估唔到平壤咁多高樓大廈,又好靚,但大廈附近冇人嘅,我覺得根本冇人住,如果話發展得幾好,發展得幾好嘅係佈景板囉!

Danny指中旅社都有北韓團價錢約一萬一千,內地團約 3,900人民幣,行程差不多; Danny選擇先飛北京再坐 13個鐘火車到丹東,然後 join團入北韓。

大台以「北韓人最真實一面」宣傳,即惹來脫北者炮轟,不過洪永城喺節目中暗示有啲嘢唔講得,心水清嘅觀眾應該明白。 電視畫面

Danny參觀北韓中學,發覺學生好似專門接待旅客嘅接待員,但相信唔係演員。
F:旅程中有冇感覺危險或被監視?
D:有次食完飯行出庭園,見到有個平民拎住支長槍行緊埋嚟,雖然佢冇乜動作,但嗰吓好擔心;好多時戰戰競競,因為唔知邊啲人監視緊你,覺得成日俾人望住,尤其喺平壤,啲人唔知係好奇定係監視緊你;第 3晚喺羊角島酒店附近行,有個疑似軍人巡邏望住我,我覺得幾危險,軍人都好似會畀麻煩我囉!我都有檢查酒店房有冇偷拍鏡頭,係搵唔到,但佢要監視你大把方法啦。

平壤交通發達,但好多城鎮只以單車為主要交通工具。

由新義州坐火車入平壤,沿路幾乎所有火車軌都破破爛爛甚至斷開,根本只得一條火車線可用。

Danny同團友喺火車影足球場,團友被導遊發現要刪除照片, Danny成功將照片帶回港,估計導遊怕球場寸草不生影響國家形象而禁止拍攝。

火車經過好多落後村落,有小朋友下午唔係返學而係喺河邊游水, Danny認為呢啲至係真實一面,大台節目唔會播出街。
F:《 FACE》  D: Danny
攝影:楊學(部份照片由被訪者提供)

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()