探熱針

推倒重來:微電影拍好照報廢 叮走陳嘉桓 周嘉莉閃上

Ads by Google

前六合彩女郎周嘉莉得新經理人公司國藝老闆冼國林「救」出亞視,有糧出有工開兼講明力捧,即被安排唱歌學功夫力谷,錫到出面。近日,公司更將陳嘉桓孭飛拍好的微電影《爸爸,對不起!》報廢,讓本來在戲中做女配角的周嘉莉升呢做女一,揼錢重頭拍過。

 


唔聽話失寵
周嘉莉( Dominy)年初泊新碼頭後,已不斷有機會做代言搵真銀;公司錫出面,聲明開戲力捧,為安排周嘉莉升呢,連同公司的師姐陳嘉桓,都要突然被踢走。
「套微電影 Rose(陳嘉桓)係女主角,都開咗一段時間,套戲有漢洋同 Brian(師弟阮頌揚),嘉莉就做雲吞鋪老闆娘,不過唔知點解老闆話要重新拍過,女主角就唔係 Rose,變咗嘉莉。其實嘉莉入咗公司之後,老闆知佢俾亞視拖糧等錢用,幫佢接咗好多活動,好似車行代言人,有代言費之外,車行又投資開微電影俾嘉莉做女主角,嚟緊仲有幾套微電影俾佢拍。」知情者說。
據了解,兩年前跟衞志豪合作旅遊特輯撻着,陳嘉桓因為高調戀情被指「唔聽話」,得寵程度急降,就算二人已經分手半年,卻又殺出「聽話又識做」的周嘉莉,經常在 fb大讚老闆多謝公司,失寵陳嘉桓就算甩拖都於事無補。

周嘉莉離開亞視後,有老闆冼國林帶住出席活動,曝光同賺錢機會不斷增加。

陳嘉桓跟老闆兼師傅學功夫,以打女形象拍了幾部電影,之後公司開的《葉問:終極一戰》,因拍拖唔聽話連客串都冇份。

陳嘉桓將當日在西樵山影城拍《爸爸,對不起!》照片放微博,而有份在戲中扮演雲吞麵檔老闆娘的周嘉莉亦有將與師弟阮頌揚的合照放 fb。

不覺被忽視
公司為成就周嘉莉,竟然嘥錢將已拍好的電影場口重拍,陳嘉桓卻堅持與此無關。
「我之前係有拍過,但後來接咗旅遊節目撞期,聽公司講係因為就唔到期,餘下部分要俾嘉莉拍埋。(覺唔覺公司錫晒周嘉莉?)嘩!絕對唔可以咁講,公司多咗幾個新人,路線又唔同,我做新人嗰時,公司都俾過機會我。其實微電影都係俾我哋幾個 artists去學嘢,我哋(機會)都幾平均。」陳嘉桓說。
事實上,陳嘉桓確實完全消失,重拍版中的周嘉莉,已成為女一,由頭帶到尾。

上年 11月,陳嘉桓被拍到與衞志豪在銅鑼灣拍拖,不過二人一直否認戀情。

周嘉莉得老闆歡心,閒時也會跟老闆一家去玩,早前去完荔園,又乖巧將大合照放 fb。

今年跟有線出外拍旅遊特輯,周嘉莉弄傷眼睛,要即刻返港睇醫生,事後老闆應承負擔全部醫藥費,她又識做在 fb再三多謝。
女人愛鬥大
一山不能藏二虎,女藝人同公司,明爭暗鬥,圈中例子,多不勝數。
熊黛林  Angelababy


憑「城嫂」光環上位的熊黛林本是公司一姐,直至師妹 Angelababy殺出,更與內地紅小生黃曉明拍拖,即超越熊黛林成為頭寵,兩位同門師妹,甚少交流!

周秀娜  Jeana
周秀娜出道以來扶搖直上,出寫真更鍊贏對手九條街;同門師妹 Jeana照辦煮碗,仲要擺埋娜姐上枱寸對方年紀大胸形唔夠她靚。真假都好,同門鬥,是非有成效。

鄭秀文 楊千嬅
當年同是華星歌手的鄭秀文與楊千嬅,由於初期外形、歌路相似,經常被外界比較,也令二人有內鬥。多年後,兩位宿敵於林建岳旗下重遇,一度重燃戰火。

撰文、攝影、攝錄:娛樂組
nextplus.nextmedia.com

, ,
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()