四年冇喺紅館開騷的呂方,往績一向麻麻,加上零宣傳,滯銷是意料中事。

探熱針

出晒事:半價散飛填位 呂方鄭俊弘攬炒

Ads by Google

熊市壓頂,大家使錢都變謹慎,要氹到觀眾攞$680睇場演唱會,真係少啲本事都唔得。首當其衝的,包括上週末在紅館舉行一連兩場個唱的呂方,以及挾《星夢》餘威在九展再度開騷一場的鄭俊弘;兩人開騷前一星期,任何價錢的門票都冇爆滿跡象,同一時間網上劈價散貨,貴價飛一律半價$350有交易,要幾多有幾多,銷情慘淡出晒事,老如呂方,後生如鄭俊弘,都冇情講。

 


師奶都唔吼
前年在《星夢傳奇》奪冠,鄭俊弘水鬼升城隍。上週,有景後即拋棄女友姜麗文的花心男在九展第二度開騷,但《星夢》熱潮已過,加上今年全無代表作,就算鄭俊弘每次出席活動都落力硬 sell,始終對銷情無助。
至於愈大愈脹的呂方,緣滅紅館多年,但見前輩歌手有市場,決定捲土重來,但往績一向差強人意的他,即使搵齊徐小鳳、汪明荃等分量級嘉賓,一樣仆直。
銷情慘淡,臨近開騷,各路人馬爭相劈價散貨;開騷當曰,現場所見,有不少師奶客都肯用半價買呂方飛,相反,鄭俊弘繼續冇人吼。

鄭俊弘賣肉演出,解開恤衫鈕露兩點,同女 dancer大跳辣身舞。

臨開場,中價飛位置仍然出現大量吉位。

自製露點高潮
上週六(九月五日),鄭俊弘在九展舉行《 The Red Concert 2015紅色演唱會》,自己歌唔夠,惟有靠其他歌手口水歌充撐,但鄭俊弘全晚不停走音、甩嘴,唯一高潮,是唱到林憶蓮的《滴汗》,穿白恤衫的他突然解放露兩點,同女 dancer互摸跳辣身舞,成功刺激粉絲,熱血沸騰。
至於另一邊廂的呂方,個唱亮點落在徐小鳳和汪明荃身上,兩位阿姐輪流上台搞 gag製造氣氛,冇欺場。

負責散飛的男子在港鐵站拎住大量門票,全部半價有交易。

著透視旗袍的汪阿姐又唱又跳,成為全晚亮點。

小鳳姐在台上不停搞 gag,笑指呂方是樂壇「唔高的高人」,成功搞氣氛。

有歌迷送上紅館門票,寓意鄭俊弘能在紅館開騷。
撰文、攝影、攝錄:娛樂組
nextplus.nextmedia.com

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()