殼王陳國強得知無綫有叫座力一線花旦走到所剩無幾,憤怒過怒火街頭,下令要用盡方法留胡杏兒。

探熱針

錢下留人 殼王親自搶人 $3,600萬誘胡杏兒

Ads by Google

殼王陳國強出名出手闊綽,經他睇中「有潛質」的花旦,好似徐子珊、高海寧、朱晨麗等,個個都富貴到有豪宅揸手、坐頭等飛歐洲。
今年七月已經同無綫斷絕關係的胡杏兒,仍得到殼王另眼相看,甚至出價三千六百萬包她三年,天文續約費破晒紀錄。
出到天價,只為「打劫」蕭定一,從對方手中,搶番胡杏兒!

 


續約價破表
與無綫約滿已經超過一個半月,但盛傳答應簽蕭定一公司的胡杏兒,一直未肯公布新動向,原因是殼王郁手,令她陷入選擇困難障礙。
據了解,半年前胡杏兒已和蕭定一方面協商,約滿後便過檔「一元製作室」,二千四百萬簽約三年,主攻大陸市場和拍電影,合約亦已經準備好,只欠胡杏兒動筆。
以為定過抬油,點知老細殼王陳國強唔願放手,講明要班高層用盡辦法,留住視后級胡杏兒,當知道蕭定一出價二千四百萬,殼王為求達到目的,一口價三千六百萬簽邵氏三年,對胡杏兒出手,比起佘詩曼三千萬回巢更高。

張智霖簽約蕭定一公司後,狂接大陸真人騷節目,又不停拍電影,發展不俗。

日前胡杏兒與助手到中環 high tea,離開時見到有傷殘人士籌款,她上車後叫助手捐了一百元給對方。

專登去探發哥班
為表誠意,殼王親自出馬落嘴頭外,更吩咐樂易玲密切跟進,大媽領旨,特登帶胡杏兒到邵氏片場探《賭城風雲 3》,宣揚邵氏會如何在電影方面大展拳腳,又講明會開戲給她做女主角。
殼王誠意十足,令胡杏兒遲遲無法決定去留,不過一眾身邊人意見一面倒。
「個價真係好高,比起阿一(蕭定一)嗰邊多成千幾萬,但其實除番開三年,每年都係差四百萬左右,拍一套大陸劇,或者接個真人騷都唔只呢個價啦,講到接大陸嘢,阿一嗰邊好強,至少唔會有咁多規限,阻住搵錢。至於話開戲俾杏兒擔正,就更加唔好有期望,呢幾年邵氏啲戲,全部都搵外援,冇一部係 TVB嘅人擔正,就算有份做都係收封「無言感激」利是當片酬,大家有眼見,所以我哋都勸杏兒要諗清楚。」胡杏兒身邊人說。

胡杏兒雖然約滿,但仍有出席劇集《陪著你走》宣傳活動。

目前胡杏兒忙於同男友 Phil拍拖同搞婚紗店,所以仍未決定簽邊間公司。

去年十月已發現樂易玲約胡杏兒到半島酒店傾續約。

殼王叫樂易玲帶胡杏兒去探班,展示邵氏可以搵到周潤發同劉德華兩大巨星,有幾咁巴閉。
撰文、攝影、攝錄:娛樂組
nextplus.nextmedia.com

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()