去年 4月郭羨妮因拍劇粗勞過度而意外流產,事後上載微博公告天下。

探熱針

火乘風勢:唔受無綫氹 郭羡妮走硬

Ads by Google

一線阿哥阿姐輪住閃,無綫惟有開行 turbo力谷一班戲屎新人補位,要舊墊新,令陣中僅餘的花旦小生淪為大陪襯。冇發揮,人工亦拍馬追不上國產劇,郭羨妮見老公在國內投資的製作公司已見規模,決定夫唱婦隨,話咁快朱少杰已幫老婆接咗一劇一電影,都係做女主角,後知後覺的無綫咬住唔放,安排夥拍鄭則士開新劇氹她留低,可惜郭羨妮去意已決,一於跳船。

 


一做十五年

《無雙譜》有視后田蕊妮坐鎮,又有力捧上位的岑麗香,郭羨妮的角色有幾多發揮,心照。

擔得起的花旦、小生冇幾個,無綫借外援幫拖已成大勢所趨。答應十月回巢拍梁材遠監製新劇的鄭則士,原以為新劇對手是合作過《情越雙白線》的郭羨妮,點知無綫甩轆,出盡方法,都無法令郭羨妮回心轉意,本月正式結束十五年賓主關係。
一一年同內地武指朱少杰拉埋天窗後,兩公婆大部分時間要分隔兩地,酬勞、待遇同國產劇差一大截的無綫,去年又實行收緊政策,嚴控公司藝人返內地拍劇,不論公私,已令郭羨妮有離心,去年初,拍《無雙譜》期間意外流產,令她更加下定決心。
「當我知道有 BB嘅時候拍緊《無雙譜》,劇組好遷就我,又搵定晒替身。原本諗住拍完安心養胎,後來發覺自己冇乜作嘔,去做檢查先知原來 BB已經冇心跳,要即刻做手術流胎,因為未夠三個月,都唔知係仔定女。」郭羨妮說。

老公朱少杰主力在內地發展,郭羨妮則留守香港工作和照顧女兒,兩人長年聚少離多。

去年夫妻檔合拍國產劇《金玉瑤》,擔正做女一的郭羨妮罕有孖住朱少杰一同現身劇集發布會。

10年同 Ken哥合作《情越雙白線》的郭羨妮,被對方欽點合作十月梁材遠監製的新劇。
小產留陰影
此事留下陰影,也讓郭羨妮領悟到要珍惜眼前,往後無綫傾續約,她亦一味拖,不了了之。
「拍《無雙譜》公司係有安排替身幫 Sonija做動作場面,但公司 budget有限,唔似國產劇,連做文戲都有人代走位;日接夜咁操勞先搞成咁,雖然唔可以怪邊個,但 Sonija就好唔想再留喺無綫。」一名幕後人員透露。
老公朱少杰年前在國內自資搞製作公司,規模已經成熟,加上搵到金主泵水,瓣數愈掂愈多,郭羨妮未同無綫完約,他已經幫老婆接了一套電視劇和一部電影做女主角,兩公婆拍住上,又唔使一家三口再分開,郭羨妮鐵定同無綫講再見!

11年開拍《叛逃》,無綫集中火力捧陳展鵬,令吳卓羲心淡,密謀完約走人。

父親因胰臟癌離逝,上月中在萬國殯儀館設靈,當時吳卓羲已回復自由身。
陪襯心淡
花旦小生奪命狂奔!十年來冇坐正過的吳卓羲,近年更愈做愈霉,淪為大茄,為公司重點栽培的新人做陪襯。去年的《叛逃》,陳展鵬由頭帶到尾,吳卓羲行行企企做紙板人,不再有期望的他索性長留大陸拍劇,約滿即走。「阿 Ron喺國內拍劇都唔係孭正,但待遇差一截,角色亦較有發揮, TVB將啲資源俾晒新人,留低都冇意思,出去外面搏吓好過。」一名幕後人員說。
火乘風勢,無綫逃亡潮已由一線蔓延到二線,陸續有來!

今年內地密密拍的吳卓羲,早前孖住言承旭合拍《最佳前男友》。

有份同黃秋生合拍《梟雄》的吳卓羲,實質只是過鏡大茄,零發揮。
輪住走
做生不如做熟!但當一把年紀的李司棋都決定走,可見無綫不宜久留,一眾小生花旦約滿輪住離巢,流失率屬近年至高。


苟芸慧
09年華姐冠軍,曾被無綫力捧,早前雙方傾續約,無綫不但沒有體恤甲狀腺問題被迫停工的苟芸慧,竟以唔夠騷要對方賠六位數騷錢,苟姑娘死心轉行,與友人合資開點心鋪,不再留戀。


王祖藍
約滿會轉投邵氏,自組山頭開經理人部門及搞製作班底,加上近年北上發展勁掂,賺人仔都賺到盆滿鉢滿,根本唔使再靠無綫。


佘詩曼
明年二月約滿的佘詩曼,回巢兩年,但無綫未有實踐為她發展內地市場承諾,甚至有高層不滿她身價太高, 3000萬續約費跑極唔達標,有指阿佘約滿後考慮改變合作方式,唔再簽長約。


徐子珊
入行 11年,等視后等到頸長的徐子珊今年約滿,但她已經決定外闖,推劇留番啲時間讀珠寶設計課程,另謀出路。


黃宗澤
近年在內地密賺人仔,一口氣拍三部內地劇,最近被召回無綫拍新劇《警犬巴打》,戲份與黃浩然睇齊,明知 Bosco去意已決,無綫惟有用得就用。


鄭嘉穎
17年才滿約的鄭嘉穎,亦計劃好約滿即撇,返內地搵真銀。
撰文、攝影、攝錄:娛樂組
nextplus.nextmedia.com

文章標籤
創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()