係,就係呢本書,呢條粉腸。

靚抽王

通告

Ads by Google

往後肚餓嘅日子,我都會諗起《忽周》—— By偽文豪
係,我就係嗰個出版《 TVB血淚屎》數臭舊東家博上位嘅衰仔偽文豪。係,我知唔關你事,所以我要同大家講埋,其實我亦都係呢一年內,幫《忽周》撰寫《靚抽王》一欄嘅娛文樂。(老老豆豆,我幾鍾意呢個名)



簡單嚟講,我主要想講兩樣嘢,第一:《忽周》對我好好。
首先,我唔算係《忽周》嘅員工,只係接 job做嘢,但係佢俾我優厚嘅酬金,令我可以專心寫作。喺呢段期間,我已經出版我第三本書啦!(嗱,我絕對唔係幫自己賣廣告)另一方面,令我更為感動嘅係,呢本以娛樂為主嘅雜誌,俾我極大嘅自由度發揮,令我可以隨意咁公器私用書寫自己天馬行空嘅諗法。嘻嘻,大家唔知覺唔覺,差唔多每隔一個禮拜我會講一次大台,每個月又會有次講吓王晶先生㗎咩?不過重點唔係我講咩!係我講得有冇 point!係唔係先!《忽周》編輯同老闆絕少干涉我任性嘅做法同埋要求,令到我每星期可以喺呢個小小園地入面發表偉論兼維持正義。喺呢度我由衷多謝佢哋,俾機會、空間我發揮,此舉簡直係推動緊香港嘅創作,令到我呢啲咁正氣嘅創作人咁又過到一年。我甚至可以講,幫《忽周》做嘢嘅日子,令我心裏面嗰一道因為喺大台工作而流血嘅傷口慢慢癒合。我終於重新相信呢個世界係仲有好公司嘅,所以當我得知今期《忽周》係最後一期,我個樣是咁的:

好嘞,客氣話講完,我要講番正經嘢:
係,我家陣已經搖身一變,成為一個全職作家,亦即係除咗出書得到嘅微薄收入,我再冇其他錢用嚟供樓、俾上網費、買《海賊王》同埋萬里望花生㗎喇!未來係點,冇人知,但係如果第日我冇飯食,冇晒發揮機會,當我坐喺天橋底發獃嘅時候,我都會諗番起我同《忽周》合作嘅歲月。我會好記得當時我曾經呼吸過一口友善、自由、食得飽嘅空氣。《忽周》仝人及各讀者!江湖見!
(有咩工作想搵我做,可以去偽文豪臉書專頁 PM我,不過唔好太夜,因為我瞓咗!)

撰文:娛文樂

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()