me.jpg


Sandra Ng閃石耳環$85 Accessorize米白色帆布併羊仔皮褸(未定價) Bally彩藍色條子針織上衣$2,445彩藍色絲質短褲(未定價) both Sandro

cover face

吳君如 廿四孝媽咪

Ads by Google

 

 

上一次同吳君如做訪問,應該係十二年前,當時正宣傳《人妖打排球》,嗰時我剛入行,拎住部卡式帶錄音機做訪問,訪問未到一半就冇帶,冒汗嘅我即時攞紙筆幫拖,吳君如當時個表情寫住:
「嘩!呢個𡃁妹掂唔掂㗎!」(我估)。
今次再做訪問,有導演拍片冇失拖,準備工夫足到加零一,由夫妻之道傾到湊女經,就連同陳可辛為咩嗌交,對阿女如何唯命是從都講,邊個話吳君如難搞又串嘴㗎?
反而,我話佢係廿四孝媽咪至真!


吳君如相夫教女有一手


吳君如未過足戲癮


Profile
 

吳君如 Sandra Ng
出生日期: 1965年 8月 2日(獅子座)
出生地:香港
語言:廣東話、普通話、英語。
簡歷: 16歲入無綫電視藝員訓練班,畢業後參與《歡樂今宵》開始為人熟悉,拍過《儂本多情》、《天師執位》等。 90年代推出過 3張唱片並得過生力軍女歌手獎。 97年在商台主持《嘩嘩嘩打到嚟!》成為最受歡迎節目之一。 03年首次出書《吳君如減肥血淚史》賣出過 10萬本。電影方面多年來超過 100部作品,憑《古惑仔情義篇之洪興十三妹》獲得第 18屆香港電影金像獎最佳女主角,《金雞》更獲得第 40屆金馬獎最佳女主角。
主要作品:電視劇《鹿鼎記》( 84)、《儂本多情》( 84)、《鬥氣一族》( 88),電影《刀馬旦》( 86)、《最佳損友》( 88)、《精裝追女仔 3》( 89)、《賭聖》( 90)、《四面夏娃》( 96)、《古惑仔情義篇洪興十三妹》( 98)、《金雞》( 02)、《 12金鴨》( 15)。
微博:吳君如大美女




68年細個俾阿媽話似「一嚿飯」,勝在自小表情多多,入行後更豁出去唔做靚女花旦,結果殺出新血路。


01年同張達明合演舞台劇《兩篤笑》以膠 bra、熱褲上陣,比起近年的《金雞 sss》同《 12金鴨》,原來十幾年前更澎湃。


14年一家人紐約遊,順便撐同志遊行,帶女兒見識不同文化。


15年吳君如話開拍《 12金鴨》初時人人估佢做硬大嫖客,心諗俾你估到有咩好玩,當然係反串做鴨王啦。
嗌交怡情
 

據聞十幾年前,她跟陳可辛因借電話後備電而撻着,「當年喺某間 coffee shop,我個龜背電話冇電,遠處見到陳可辛同曾志偉傾偈,咁啱大家嘅電話一樣,咪走過去借電,之後就開始傾電話、睇戲、食飯,最好笑係最近喺某雜誌見番呢部電話,佢竟然話:『呢部咪就係當年你問我借電嘅電話。』嘩!我心諗你都幾好記性,我就係鍾意佢呢啲細眉細眼嘅事,都心細如塵,記得咁清楚。」
畢竟相處了十幾年,有冇試過真正炒大鑊?「夫婦之間最易嗌交就係生活習慣,你知啦!男人通常唔係好整潔,我嗰位已經算好姿整,但搭完飛機返嚟唔沖涼,我真係接受唔到!呢樣嘢係嗌到今時今日都仲嘈緊,但女人發起爛渣上嚟唔係人咁品,雖然佢嘅理由係自己長髮難乾,結果佢都投降肯就我,仲洗埋頭㖭。另外亦會為買屋企嘢而嘈,我哋 taste好接近,基本上佢揀得我都鍾意,但偏偏買之前唔同我商量,我就會覺得篤眼篤鼻,不過嗌嚟嗌去都係呢啲。其實我哋嘅浪漫係嚟自相處、包容,但中間當然會試佢底線,如果到佢都拍枱,咁我就知道我要收聲。」




Sandra Ng純銀大圈耳環$1,055純銀珍珠戒指$875 both Folli Follie純銀閃石手鈪$1,450黑色閃石吊飾耳環$990 both Swarovski黑色圓領併條子上衣$5,190 3.1 Phillip Lim白色棉質併杏色麻質料西裝褸$3,890 Sandro









阿女愛武功
 


Sandra Ng黑色併民族圖案背心裙$9,700 DIANE von FURSTENBERG米白色織皮手帶$775 Folli Follie黑色搭帶高踭涼鞋$8,390 Jimmy Choo棗紅併白及寶藍色金屬 chokerstylist's own

聽聞陳可辛正籌備《李娜傳》(暫名),吳君如有意推薦女兒當童年版李娜一角,想囡囡做童星嗎?老豆開戲俾個女拍有優勢喎。
「其實係一個爛 gag,話說我見到李娜好狠咁殺球個樣,簡直好似見到個女咁,咪搞個 gag話不如推個女做童年版李娜,誰不知陳可辛就周圍同記者講。我諗我個女冇耐性,唔會為拍好角色去喪練網球。」
咁佢最有耐性做乜?「最近佢攞咗張全級武術冠軍嘅證書返嚟,我先知原來佢咁鍾意武術,叫佢即場耍套拳,又有紋有路,於是我同老公講不如介紹俾子丹識。」
見她成日管接管送,算唔算係怪獸家長?「咁又唔算,我緊張佢練武整親多啲,考試七十幾分都得啦,我照俾佢玩同打機,總之我個女一扁嘴,我就乜都得,其實我覺得我幾慘㗎!不過做父母有時見到佢駁嘴都幾開心,有次佢睇卡通片,陳可辛問佢知唔知呢個鏡頭點拍,佢話,『一睇就知係特技啦,你做導演唔係唔知吓嘛?』我即刻同陳可辛講,勁喎呢句抄低佢先。」


恨演殺手
 


Sandra Ng純銀大圈耳環$1,055純銀鎖鏈手鏈$895both Folli Follie灰綠色織錦入膊短上衣$2,090同款 maxi skirt$9,390both alice+ olivia

入行多年可謂試盡不同戲種,搞笑丑角、黑社會大家姐,甚至雞雞鴨鴨都試過,如果要揀息影前最後一套電影,又會揀咩角色?
「我想做殺手,一個深藏不露好冷血,考演技唔搞笑嘅殺手,冇乜表情但內心好澎湃,又或者做歷史人物,武則天、宋美玲之類,但 so far冇導演敢搵我做,可能我太好笑,我都好想著到范冰冰咁。」
劉青雲話每次拍完戲都好似上咗太空,抽離唔到角色,要靠老婆協助返回地球,她又靠邊個?「我都一樣,早前拍《金鴨》,我整個月都著男人衫,講嘢、動作好男人,甚至覺得自己有男性器官,就算之後著返女人衫,身邊啲人都覺得我係乸型。拍《歲月神偷》個仔出殯嗰場,喊到我之後都好沮喪,中醫話好傷肝㗎。所以都係依家好,有家庭生活,又有個女,間中做番師奶,接女放學,跟陳可辛去應酬,晒吓珠寶做闊太,咁就返番嚟現實生活喇。」


後記
 

演唱會去到最後,例牌要多謝番隊 band,同君如傾得咁開心,有樣嘢佢叮囑我寫,就係佢分享咁多同陳可辛嗌交事件,無非想 tag吓佢同秋生八月上演嘅舞台劇《狂揪夫妻》,好喇,我寫咗喇,第二次同你做訪問,應該好過第一次啩!

Shop List
3.1 Phillip Lim中環國際金融中心 2083號鋪 2805 0688
Accessorize中環國際金融中心 1040號鋪 3101 1170
alice+ olivia中環國際金融中心 3078B號鋪 2234 7253
Bally金鐘太古廣場 250號鋪 2522 6123
DIANE von FURSTENBERG中環置地廣場 306-307號鋪 2522 8782
Folli Follie銅鑼灣時代廣場 507號鋪 2506 1165
Jimmy Choo尖沙咀海港城海洋中心 132號鋪 2375 8086
Maje中環國際金融中心 1052B號鋪 2234 7396
Sandro中環國際金融中心 3078A號鋪 2234 7851
Sergio Rossi金鐘太古廣場 255號鋪 2918 0872
Swarovski尖沙咀海港城港威商場 2413號鋪 2175 5123

撰文: Carmen Chan
形象: Nata Ngai
攝影: Kenji Leung
化妝: Midco Chu
髮型: Seiko Sin@hip hair culture

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()