政改奸人組最看不過眼司局長堅離地宣傳政改,無懼攝氏三十三度的高溫,穿起套裝,腳踏實地,示範如何「真落區」,希望更多人拒絕袋住先,爭取真普選。

坦白講

以真亂假

Ads by Google

政改奸人組由「大專政改關注組」和「青年重奪未來」等十多名年輕人構思,並推選三名成員飾演林鄭月娥、譚志源和袁國強,跟足政府宣傳片拍片惡搞及落區洗樓,比政改三人組更落力,以嬉笑怒罵方式,宣傳為何不要假普選。




政改三人組一直強調 2017,一定要得,但不只一次表示,對通過政改不樂觀。(鄒潔珊攝)

距離政改方案表決仲有少少時間,雖然民意已經好清晰,兩陣對立,各不過半,但為咗爭取更多人支持,我哋政改奸人組堅持以最華麗嘅形象落區,唔會堅離地,只會踏實地,呼籲香港市民,絕對唔可以袋住先。
有頭髮嘅,點會想地中海呢?為咗凸顯 689政府有幾假,我哋諗到扮演政改三人組,代佢哋落區聽意見,如果三位司局長覺得我哋好荒謬,我哋都想話俾你哋知,你哋又何嘗唔係!

認真打扮 認真落區


奸人組個多月來每逢假日都擺街站宣傳,本週日更直踩尖沙咀撐政改活動,諷刺藍絲收維穩費做騷,對方又果然即時拿出大疊鈔票反擊。

假都唔緊要,做臨記都俾啲戲啦,所以我哋一班人自五月開始,每逢假日就出動,去到油尖旺同深水埗擺街站。好多市民一見到我哋就揮晒手,又主動問我哋拎單張,呢啲互動元素,喺開篷巴士吹風揮手嘅司局長,係唔會感受得到。
我哋只係好普通嘅八、九十後,星期日都好想瞓晏啲,好多人話我哋只係貪玩,如果只係為咗玩,就唔會每次花兩個半鐘化妝、 set頭同襯衫,即使三十幾度,我哋堅持著晒套裝同戴頭套,做你哋唔肯做嘅嘢。林鄭月娥有嘅鴛鴦眉,行騙月娥都有,你無嘅嘢我都有,我哋嘅民意係用汗水換返嚟!
其實我哋都怕俾人起底,最辛苦係落區之後由頭濕到落腳,尤其個妝溶晒,頭套膠水同頭髮黐實晒,但我更怕袋住先、袋一世!香港已經爭取咗民主廿幾三十年,到我哋呢一代仍然係毫無寸進甚至退步,係非常可悲,我哋唔要提委會選完俾我選,公民提名,一人一票,就係咁簡單。
原本我哋佔領期間已經落區洗樓,宣傳何謂真普選,又搞公民教室,但慢慢去到一個樽頸位,社會已經撕裂,用正常方法推銷,好多撐政府嘅公公婆婆根本唔願聽,飾演奸人組反而打破隔閡。

藍絲黃絲都傾得埋

有次喺旺角擺街站,有位伯伯突然衝埋嚟撕爛我哋手上嘅單張,仲指住我哋,用粗口狂鬧 689,先知道原來係自己人,認錯人啫。又試過有阿叔走埋嚟鬧我哋,傾落先知佢連提委會係乜都唔知,我哋解釋而家嘅制度有幾咁唔公平,佢先識得「吓」一聲。好多高官或者建制派,根本專登用一啲普羅大眾都聽唔明嘅語言去講解,然後就話一人一票選特首好,所以我哋希望盡力令市民明白,踢爆呢個所謂普選制度係幾不堪。
可能「行騙月娥」真係比林鄭月娥更索,可能「殘廁源」個頭形真係比譚志源好睇,亦可能「強國猿」真係比袁國強更威嚴,呢個幾月努力總算無白費,喺毫無篩選之下,無論藍絲定係黃絲都同我哋傾得埋,仲一齊高呼:「二○一七,靠佢死得。」
雖然傳媒訪問我哋,次次都只見到三個人,但我哋背後係十幾人嘅團隊,又出腦力度橋度對白,更會齊齊落區宣傳,大家都咁辛苦。呢個係命運自主年代,有人選擇勇武抗爭,有人選擇默站表達意見,但無論係邊種方式,我哋只希望香港有真普選!




飾演「殘廁源」的陳曉陽公認是最辛苦的一位,皆因他每次出動都要戴上又焗又緊的頭套,為求效果逼真,化妝師調配跟其膚色相近粉底液,再以眼線筆畫上少許髮絲。


為了演活林鄭月娥,盧俊文反串扮女人,假髮、絲襪和珠鏈以外,更戴上 C-Cup粉色胸圍,一絲不苟。 後記

根據非正式民意調查,過半市民認為「行騙月娥」著絲襪應剃腳毛,「殘廁源」個頭套無論落幾多粉底液,依然係咁假,我哋通通收到晒,如果成功爭取到真普選,我哋大家一齊剃晒佢又點話呢,咁先至係有商有量吖嘛!

由你開講

一切好人好事,壞人壞事,先吐為快。
你敢坦白,我敢講。
電郵: mailto:voice@nextmedia.com

撰文:李詠珊
攝影:莫智謙

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()