70分

私口味

明日世界

Ads by Google

如果,你朝朝早起身會為自己打氣,覺得月儲三千港幣好有希望,向客人下跪沒太大問題,面向無窮無盡的爭拗也充滿正能量,看《明日世界》( Tomorrowland)吧。最多去少次日本旅遊。

我就真係頂唔順。
故事講佐治古尼( George Clooney)喺小朋友時被引導去神秘的明日世界,集齊一班樂觀到爆炸的發明家、藝術家,打造烏托邦。有一日,有人發明了預知未來的機器,班天才知道人類世界快滅亡。佐治古尼看見慘況後,想救命,反而被趕走,兜兜轉轉之下,最後發現救世方法就係不斷散播正能量。對,就係咁簡單,只要有夢想,凡事可成真呀!
看預告片,你以為《明日世界》是將迪士尼機動遊戲拍成真人電影,一定連場動作追追趕趕。你搞錯,《明日世界》不單不似一般荷李活巨片賣弄超凡特技效果,反而是相反地帶點不屑。電影中,有一幕,正能量女主角 Britt Robertson在課室中質問老師不斷宣傳世界步向末日,有什麼用,應該創作出解救方法先有意義。然後,鏡頭出現一張類似災難電影的宣傳板,暗踩一腳荷李活正是助長歪風的幫兇。所以,你不會見到佐治古尼英勇地打外星人抗洪水或消滅病毒,你只看到他像採用《最佳拍檔》式新奇武器,然後靠把口傳道,已經足夠 save the world。
保持樂觀,不壞;一過分,就變成天真和盲目,破壞力其實跟過分悲觀沒什麼分別。《明日世界》那種撥亂反正的方法,比樂園內的機動遊戲更幼稚,我懷疑連小朋友都不會相信,尤其插班同學是一位無證巨人的話。我又點頂得順?

你還可以頂唔順其他情節。例如,電影過了超過一半的篇幅,負責合作救世的男女主角仍未碰頭,觀眾其實仲未知發生乜事。一碰頭,佐治古尼又遲遲唔肯交代詳情,跟觀眾一樣一頭霧水的 Britt Robertson就不斷不斷發問。好了, Britt Robertson未發火,但觀眾已經不耐煩之際,才真相大白:原來只不過係咁咁咁……轉個頭,打一兩場拳頭交,所有之前講到好似好大鑊的難題馬上迎刃而解。你真係會嬲到想喊出來。
你又可以頂唔順 1961年出生的佐治古尼,與童星 Raffy Cassidy玩曖昧。這一點,我反而接受到。 Raffy Cassidy係扮演小朋友外形的機械人,唔係扮演小朋友,只要抽離一點去閱讀這段關係,便明白連爺孫戀也說不上,頂多只是生物與死物之間的交流。咁好常見吖。嗱,我不是一味批評的,我根本就係積極唱好。
我都係一個正能量。

方俊傑

mailto:hotpot@nextmedia.com

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()