胡應湘太太郭秀萍結婚前任職空姐,胡應湘姊姊透露,郭秀萍很懂得嗲老公。

中環人語

哥頓堅錫老婆

Ads by Google

合和主席胡應湘不時把老婆掛在口邊,人前都表現恩愛。兩公婆剛於上週以$4.8億賣咗皇九三十三樓全層,呎價為$3.5萬,破晒頂;不過細心睇吓佢兩公婆買樓間致中有限公司,係由胡應湘佔 30%,老婆郭秀萍佔 70%,嗱嗱嗱,篤吓計數機,賣皇九淨賺$1.42億,加埋四年幾以來收咗成六千幾萬租,老婆佔七成來分賬,嘩,足足有$1.43億落袋做零用錢。




一鋪為胡太進賬$1.43億的皇九。

再揭開間公司睇睇,呢幾年都炒賣過皇后大道中新紀元廣場、新銀集團中心,賺過億元,仲揸住渣甸山白建時道 25號大屋,認真和味。你話啦,口講錫老婆唔夠㗎,好似哥頓咁先至最實際!

阿里巴巴與四十大盜

阿里巴巴主席馬雲喺香港股壇點石成金,帶挈其友好齊齊食大茶飯;唔少股民對馬雲系股票心思思,有中環口痕友就話,返去溫習吓講《阿里巴巴與四十大盜》古仔就有所啟示。話說阿里巴巴向山洞唸咒語:「芝麻開門」,繼而入內擸走咗四十大盜所收藏的寶藏,正所謂溫故知新,小股民自己諗吓。據說,馬雲當初為公司改名,貪其阿里巴巴讀音夠響亮又國際化,童話故事又為全世界人所熟知,短短幾年間,馬雲系股份市值升咗二千億,真恍如天方夜譚!

懷念佐治

游走於中港台併購、私募投資的金融多棲動物,現為多間上市公司主要股東及董事

最近震撼股壇的事,相信包括「隱形金主」陳遠明( George Chan)忽然仙遊,逍遙客對他非常懷念。佐治曾負笈英國讀書,自九十年代擁有不少上市公司,也曾將手上殼賣給當今殼王陳國強和叱咤一時的神童輝。當今盛行的啤殼,佐治二十年前已開始玩了,多年來參與的上市公司,生多幾隻手都數唔晒!在財經圈那麼出名的一位專業投資者(他確係乜實業都冇),傳媒連一張相都搵唔到,可見他非常低調。
逍遙客自問常與香港各派財技高手過招,多年來與前輩佐治有良好互動,近身觀察,佐治是少有集會計師、財務顧問及律師於一身的真正高手,他只是欠一張正式牌照而已。做 deal時,其他專業人士只需執行指令;其心思之縝密,偶爾可將人情世故以至哲學思想穿插其中,不能不折服。時下買殼人士,都必買足 51%以上控股權,生怕出意外。但由於功夫紮實之故,佐治買殼藝高人膽大,哪怕只可拿到區區三幾個巴仙的殼股也照買不誤,慳番唔少殼價,一輪「手術後」照樣可善價而沽。
佐治在股壇中亦絕少與人為伍,算是獨孤一派,交易對手都認為他知識全面又精明,難以招架,而財經古惑仔,當然聞風喪膽,喺佢面前只係一個幼稚園學生而已,半點着數都攞唔到。佐治每天無數杯嘅凍咖啡同無數支的雪茄,下午三時至凌晨三時嘅工作時間,就係佢呢位平實低調富豪的真實生活。偶然在中環看見那車牌「 TOMORROW」的勞斯萊斯,逍遙客彷彿見到一身牛記笠記的佐治,仍瀟灑地坐在車內。

中環寸嘴


楊國佳

工廈大王楊耀松長子,是各大有名食肆之 VIP,喜歡研究已故及城中有錢佬對食之喜好,強調「貴」唔等如識食,自詡分享食經乃是提升讀者之水平。

有老友問我,點解講講吓食又去講投資喎。搵唔到錢,邊有心情食好嘢呀?估唔到我送支酒出嚟,都收到咁多讀者來電郵;不過,大部分都「擦鞋」嘅,唔好以為我受呀,出嚟行,最怕呢啲「糖衣毒藥」。



讀者 Micky:拙詩一首
回應:一出書就寫信嚟,呢個梗係退休人士;唉,叫我做「楊公」喎,好似靈堂上面啲名咁,加粒字「楊公子」都好吖!

讀者 KB Cheung:一針見血,寸過阿蘇
回應:我同阿蘇都唔同 level,阿蘇話:「你夠膽就收茶包嘅錢。」我係會話:「你夠膽就收啲貼士!」

讀者 Annika:楊先生你好,我好鍾意周圍搵餐廳食,又因為工作關係要識多啲餐廳可以隨時介紹俾上司,雖然我未必有機會每間去食(價錢問題同唔識人原因),但可以知道多啲比一般食評同 Openrice以外,關於餐廳啲八卦嘢,你又寫得咁精警,唔會文縐縐,好睇!

讀者 Weasley: Ch. Montrose(玫瑰莊)唔係名莊呢啲說話,會笑爆識酒之士( or被×爆),玫瑰莊作為 super second(超 2級莊),拎 RP100次數不勝其數,我相信紅酒界無人不識,點解唔係名莊?此外$3,000係 Enoteca可能唔貴,但喺香港就唔叫平,呢下真係堅離地。
回應:我飲酒最高境界係開懷暢飲,我又唔係傾生意做 deal,$3,000一支係 undervalue,補充一句,我係坐喺 Enoteca飲埋,冇收開瓶費喎!
得獎者係 Annika,見佢有得睇,冇得使,醒佢啦!

近排我啲平保( 2318) option有得執吓,歡迎粉絲繼續來電郵擦我鞋又得,寸吓我都唔拘,有機會整番場 lunch with YKK(楊國佳英文簡寫),同大家碰吓頭! mailto:centralman@nextmedia.com

為車死為車亡

鍾意飛車兼專幫飛車黨打官司嘅師爺 Joe(胡濟祥),年輕時參加唔少比賽,亦炒車無數,導致左耳被削,左肺被四條肋骨刺穿,臉上亦留疤痕,年屆 62歲,心願仍是上澳門 Grand Prix,他前週一行十多人,去意大利「鍊」車,同行中友人炒車,師爺 Joe無恙,還 WhatsApp精彩片段予老友睇,誰不知玩完八日意大利本週日回港,突然心絞痛,即 call十字車,車未來到已經行咗人;富利堡老闆黃毅力本來邀請師爺 Joe到澳門揸佢代理嘅 Lotus賽車;突聞噩耗,只嘆:「人生活在當下,愛惜自己的每一天呀!」




師爺 Joe上週到意大利「鍊」車,把友人炒車片段拍下。


金牙大狀講嘢 金正恩升呢考功夫

以行刑之「創意」論,當今之世,金三世金正恩認咗第二,睇怕都冇人敢認第一。繼先前犬決姑丈張成澤後,新近佢又以高射砲處決人民武力部部長玄永哲。相較之下,一味只係識得斬頭嘅回教武裝分子根本就未夠班。
過去行刑,五花大綁、斬首處決,殆為常規。及後西風東漸,有咗槍決。文革時期,豐富咗內容,但亦不過加入向家屬收取子彈費嘅環節而已,唔見得特別有創意。及至金三世上台,兩年之內,接連出招,大家方知喺回教嘅石決——用石頭掟死你——之外,仲有犬決、砲決等花臣。
不過去到呢個地步,則又不禁令人擔心金三世何以為繼。高射砲都出埋咯,升呢之道可能只剩低還原基本法此一途。論場面之壯觀,有乜勁揪得過我國古已有之嘅五馬分屍?若果要加入高科技元素,網上即時直播,點擊率肯肯定爆燈。

中環人語迷你版

"我太多錢集中放喺一個資產上。"

估中邊個中環人講呢句說話,送你 Plantronics Voyager Legend Signature Black藍牙耳機一個有意參加者,請於五月二十七日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉

"想我落火坑?"

答案:吳光正
得獎者: SHK Chan
中獎時間: 1:00pm 20/5/15

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!
爆料熱線/whatsapp: 6829 5929

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()