劉青雲扮我會唔會太靚仔?嘿嘿嘿。﹙設計對白﹚

爆壹爆

劉青雲演 14K大佬

Ads by Google

爆哥呢期好鍾意煲九十年代電視劇《大時代》,劉青雲演繹方展博呢個角色簡直係無得頂。爆哥收到風,劉青雲將會殺入江湖,接拍改編一套黑道人物傳奇,主人翁係前 14K「慈雲山十三太保」首領,綽號「茅躉華」嘅陳慎芝。




希望再攞影帝,講多次太空船啦!﹙設計對白﹚

江湖傳聞,自從去年年中《壹》仔訪問茅躉華之後,引發咗大陸人追捧香港黑社會熱潮,先後更有內地嘅傳媒《南方人物周刊》、鳳凰衞視追訪茅躉華,之後就有大陸資金睇中市場需求,決定掟大嚿錢出來搞中港合拍片。
話說爆哥最近返到深圳,同班內地嘅電影界老友打邊爐吹開水,席間佢哋話,大陸電影投資者睇中茅躉華嘅傳奇有得搞,幾個月前開始周圍搵人埋班。聽聞男主角有好多個人選,最大機會係呢期爆紅嘅劉青雲;而女主角就更多選擇,但就傾向搵大陸、台灣有實力嘅演員,例如周迅、舒淇咁。據知劇情都係圍繞茅躉華近三十年嘅江湖往事,除咗講佢由 14K大佬變身傑青嘅勵志情節外,梗係要講佢近十幾年點樣周旋於江湖人物之間,做「拆彈專家」嘅內幕啦。
爆哥打俾劉青雲同茅躉華八卦吓啦,點知佢哋反而推俾金牌導演劉國昌答喎。劉國昌執導好多富有香港特色嘅電影,例如《五億探長雷洛傳》、《廟街皇后》。本來電影圈有規矩,未成事唔好揚出去,但劉大導唔推得爆哥,只係咁答:「陳慎芝都係半個江湖人,我一直對佢人生經歷,覺得好有戲劇性。」佢又補充:「其實劉青雲都識佢,對陳慎芝個故事都有興趣,所以大家一拍即合。」不過佢強調一切尚未拍板,仲有好多籌備工作咁話。
劉青雲都夠殺氣扮江湖大佬㗎,爆哥睇好佢呢套戲。

勝和前坐館撈骨場

好多古惑仔都係差人出身,正宗黑警咁話。近日又有江湖傳聞,話做過一屆勝和坐館嘅鬍鬚昆,原來出嚟行之前喺老廉做過,當時鬍鬚昆仲有個花朵叫 Peter仔添,後來可能撈唔掂就劈炮轉行古惑,估唔到又俾佢符符碌碌做咗坐館。鬍鬚昆卸任之後,好似喺香港無晒聲氣,原來佢去咗廣西南寧做傳銷,當然唔正經啦,類似種金嗰啲,用高回報做餌,氹人入局投資而掠水,佢仲喺當地開咗間 disco。後來傳銷騙局爆煲,當地公安拉人兼封艇,鬍鬚昆好彩走得快,返咗深圳開骨場,點知又有運行,呢期搵到唔少錢。
有江湖朋友話,鬍鬚昆份人一向鍾意認叻,但又唔打得,江湖評語麻麻,佢依家雖然叫搵到錢,日日深圳唱 K好少返香港,以前喺香港跟佢搵食班門生,早已散晒水。




鬍鬚昆經常在深圳唱 K


名人落難冇人吼


插圖:詹震寰

上週去中環搵大狀老友打牙骹,聽到一單黑色笑話。主角就係一名前行政會議成員,佢之前因被控拖欠僱員幾十萬工資,而被判監禁個幾月並保釋外出。據法律界流傳消息指,從前有人係權力核心嘅紅人時,氣焰係相當高,法律界中人受過佢氣就一啲都唔出奇,但勢估唔到風水輪流轉得咁快,由權貴身邊紅人一下子變成落難,有人照樣擺架子,大家當然睬你都有味。
聽聞呢條友為了打官司,之前去咗拍幾名當紅嘅大狀門,可惜個個當紅大狀都耍手擰頭,婉拒呢單生意,口痕友就話,有人連幾十萬欠薪都唔俾,點知有冇錢㗎,班大狀可能驚打完官司都收唔到錢,所以免得過都唔好煩喎。但爆哥估未必完全同錢有關,因為事主早前以月租十幾萬租住港島南區海景住所,之後又繼續住豪宅,點計爛船都有三斤釘,被人請食檸檬,反而可能同人緣有關,即係講到明好多人唔鍾意佢。行走江湖多年,爆哥都見唔少雪中送炭嘅事,但依家佢想俾生意人做都無人吼,就真係要照吓鏡啦!

爆哥乜料

金融界撈家,穿梭黑白政商界,朋友遍布旺角至中環,每星期都八到唔同料,同《壹》仔讀者過吓癮!

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()