插圖:祝健中

八卦陣

曹貴子平買《都市日報》

Ads by Google

商人黃浩二○一三年中收購免費報章《都市日報》,作價兩億,進身傳媒大亨之列。商界年初流傳佢有意賣盤,最近更傳出黃浩以五千萬賣咗《都市》一半股權,買家係康健國際醫療集團創辦人曹貴子醫生,如果屬實,黃浩咪即係蝕住賣?我哋嘗試過搵雙方求證,黃浩唔聽電話又唔覆 WhatsApp,曹貴子一聽到話係《壹週刊》查詢,就話開緊會極速 cut線。

黃浩收購《都市》初期,曾經話過打算起自家廠房同買印刷機,計計埋埋起碼投資六億,之後亦曾經有消息指,有紅色財團打算用十二億收購,不過黃浩當時話無意賣斷,錯過咗放盤嘅好時機。
《都市》中人一直估計,黃浩買返嚟都係想執靚盤數,轉手賣番出去執一筆,所以舊年成立咗「動新聞」部門,可惜做做吓發覺唔對路所以減產,轉型做網上電視台,製作有贊助及低成本嘅財經、娛樂同生活節目。今年農曆新年後,《都市》業績欠佳裁員,有傳當時離職員工超過十人。如果曹貴子真係入股,《都市》會唔會進行大改革,令人耳目一新呢?

沉默遊行 李偲嫣大叫


李偲嫣(中)忍足全程,去到警察總部即刻停低大嗌支持屈穎妍,為時一分鐘,程介南(紅圈示)上前勸告佢先肯停低。(曾春南攝)

周融嘅捍衞言論自由關注組,本週日搞咗個撐屈穎妍遊行。大會講明沉默遊行,唔叫口號,李偲嫣、傅振中唔執輸先抽吓水,去到警察總部停低大嗌支持屈穎妍,叫咗接近一分鐘,成條遊行人龍都郁唔到。大會負責人之一程介南上前叫停佢哋表示不滿:「我哋係沉默,唔該向前行。」
話就話遊行支持言論自由,但有啲參加者擺明對言論自由有篩選,知道某攝影記者來自《蘋果日報》,就大叫話唔俾影相,又話登咗佢個樣就要告人。究竟佢哋叫住支持言論自由嘅口號,點先算自由呢?

本土派用強國貨

「肖友懷事件」引發極大爭議,有網民擔心一旦酌情批出居港權俾「三非(父母及本人均非港人)」嘅懷仔,將會鼓勵更多人偷渡來港、逾期居留,亦有人質疑協助懷仔嘅陳婉嫻明知議題敏感,竟然高調開記招,搞到懷仔受盡輿論壓力。
上星期六,香港本土力量、熱血公民嘅成員同幾十個網民走去陳婉嫻黃大仙辦事處示威,抗議佢協助「三非」兒童申請居港。其後改到孔教學院大成小學,抗議校方早前表態考慮俾佢入學。佢哋不斷大叫「陳婉嫻,落地獄」、「肖友懷,返大陸」等口號,但係喇叭上面竟然印有「製造廠商:廣東省中山市歐美聲音響器材廠」。本土派用大陸貨,好似唔係好夠「本土」喎。




陳婉嫻協助「三非」男童肖友懷(右)申請居港,大搞記者會,卒之搞到滿城風雨,令懷仔受盡壓力。


本土派去大成小學抗議校方考慮俾懷仔就讀,但係所用嘅喇叭係大陸貨,唔多「本土」喎……(郭永強攝) 飛行 apps玩死民航處


《 Flightradar24》可以實時睇到飛機升降情況,但連累民航處收到大量使用者查詢。

呢排成日落大雨,好多人上唔到飛機滯留機場,唔少飛機迷利用一個手機應用程式《 Flightradar24》,𥄫實跑道情況,追蹤飛機升降。反對興建機場第三跑嘅民間組織,都用咗呢個 apps一張大量航班停泊喺跑道側嘅畫面,批評機管局冇做好規劃興建中場客運廊,搞到飛機打晒蛇餅,仲要花千幾億起第三條跑道。
有政府新聞官話,呢個 apps令佢哋收多咗唔少查詢,有市民會打去民航處問,點解某班機喺上空盤旋咁耐都未着陸。呢個 apps由兩個瑞典飛機迷開發,連外國機場都同佢哋合作提供資訊,三月德國漢莎航空旗下廉航喺法國南部阿爾卑斯山區墜毀,都有搵呢個 apps幫手。

mailto:centipede@nextmedia.com

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()