「我好憎記者,甚至想打你哋!」這是樂壇天后容祖兒爸爸容錦輝,見到本刊說的第一句話。
53歲,屋邨長大,容錦輝說話喜歡夾雜粗口,他承認過去幾年做生意,其間因為周轉問題,問個女借錢:「總共 73萬,唔係出面所講嘅過百萬。」
俾人貼街招,傳聞欠 30萬賭債,容錦輝火起:「如果我真係爭你 30萬,我俾你劏,俾你殺,麻煩帶個債主嚟搵我。」
一張離奇追債街招,親生兒要公開斷親,父女從此陌路。唔介意全世界當自己係衰人,除了……
「你可以搵嫲嫲,可以搵姑姐,你起碼了解件事先(追債),你冇了解就做呢個動作(斷親),我三個小朋友,最錫係佢,但令到我個心最唔舒服,亦都係佢。」容錦輝說。

從來唔爛賭

願意坐低做訪問,容錦輝講到明唔想傷害任何人,亦唔想提某人的名字,只想還自己一個公道,尤其是最近被指欠下三十萬賭債的報導。
「恕我講句粗口,邊個話我爛賭,我會××佢,如果你認為買六合彩叫爛賭,買場波,百零二百蚊叫爛賭,我麻雀唔鍾意打,一年打唔到三次,新年係陪吓啲兄弟姊妹打,就算過澳門都係食嘢,(點解俾人貼街招?)呢個係懸案,如果我真係爭你三十萬,我俾你劏,俾你殺,麻煩帶個債主嚟搵我。」
至於被指問某人借了過百萬,容錦輝說只有七十三萬,而多筆債務中,最高金額是二十五萬。
「第一次係○○年,因為要轉工,要清還之前問安泰人壽所借嘅糧,原本同會計部傾好分期還,但件事俾傳媒知道,我個 ex ex打嚟問我咩事,後來邊個邊個主動幫我還錢,嗰度有七萬蚊。我每次過到關就算,如果唔係,後面加個零啦!出面話我欠債纍纍,又話幫我還過好多大債,打本俾我做生意,出面唔知,以為我攞咗你幾百萬。」


無緣無故俾人貼街招,「你貼葵涌、你貼荃灣,可以影響到我,你貼灣仔貼銅鑼灣,你究竟想影響佢,定影響我?」據了解,有關追數街招,在跑馬地區已被張貼了兩個星期,才給傳媒發現。 

06年,容祖兒曾經寫 blog細說父女情,「早年我同佢關係 OK,阿邊個要去北角跟杜麗莎學唱歌,會早到上我公司食早餐。」但一切已成過去。 

被指欠稅,是容錦輝 01年與稅局就稅項問題一直糾纏,直至最近達成共識分期攤還,連同罰息合共 64,576元,每月還 1,500元:「我驚稅局落我釘,加上我想申請信用咭,所以 9月 18日俾錢做份『還評報告』,證明我冇欠銀行、財務公司一分錢。」

律師做證

一一年,因為生意失敗要二十五萬應急,容錦輝被安排到某人公司的會議室,在經理人、律師見證下簽署承諾書,承認自己未曾盡過父親責任,今後亦不能再借,否則要一次過清還所有欠債。
「我做生意,全部用自己錢,只係期間周轉有問題,要問佢借,最後一次(借)我接受唔到,我一個大男人,人要面,樹要皮,出到公司律師,我又唔係郁啲就叩門攬腳!」
簽完字,容錦輝說被某人「強烈溝通了半個鐘」,被勸止再從商,兩人亦是最後一次見面。
「當時我個心好唔舒服,我同自己講,有咩事,自己頂啦!我之後冇再做生意,轉做中港車司機,因為我應承過你,我幫唔到你,都唔會拖累你。」
提到公開斷親,容錦輝變得激動:「親生老豆?你使唔使咁高調,大家講完(斷親), forget啦,有朝一日,我兩腳一伸,你有心嘅,你嚟鞠個躬。」


容祖兒九九年尾出道,容錦輝說過去十四年,唯一令某人丟架的事,是○七年因保護被懷疑在超市偷竊的母親,跟超市職員起衝突,最後被判刑事恐嚇留有案底。 

左腳斷韌帶,右腳大髀生粉瘤,手上還有大堆因為糖尿及心臟問題,到政府醫院的覆診紙。 

了斷關係


同前前妻余金鳳 95年離婚,「係我貪玩,亦冇考慮到後果,所以第一段婚姻絕對係我錯。」到 07年再婚,同樣離婚收場:「我前妻係北方人,唔習慣香港生活,有抑鬱,大家決定放手,我哋關係唔差,經常通電話。」 

自問有手有腳唔會餓死,但七月初因為左腳斷韌帶,從此失業。
「睇咗兩個月跌打都唔好,到九月睇西醫先知咁大件事,醫生話就算駁得番,因為韌帶會縮,唔會好似以前咁靈活。」
容錦輝出示到政府醫院睇醫生證明,另外還有多張覆診紙:「我有高血壓、脂肪肝、輕微糖尿病同心臟病,醫生話想過到六十歲,就要減肥,另外右腳生咗個粉瘤,要排期割,但唔知排到幾時。」
冇工做,周身病痛,要養阿媽,還要照顧與第二任妻子所生的七歲細仔,容錦輝承認有經濟壓力,但會自己面對。
「今次點解行出嚟,真係想大家做個了斷,你好好過你生活,最緊要你開心,你健康,就得㗎嘞!佢今時今日得來不易,我唔想攻擊佢,佢始終係我親生女,三個小朋友中,我可以話係最錫佢,因為我得一個女,但,令到我個心最唔舒服,亦都係佢,始終……做人父母,唔會記個小朋友點唔啱!」容錦輝哽咽說。


撰文、攝影:娛樂組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()