一齣《老表》令捱足三十年的蔣志光爆紅,拍住「老婆」韋綺珊喺今年台慶孭重飛,吐氣揚眉。 

探熱針

蔣志光光復台慶 韋綺珊闊太生活

Ads by Google

在八十年代樂壇風光期入行的蔣志光,橫跨兩個世紀,近日終在《老表,你好 hea!》發圍,挑機歌神唱《愛是永恒》,又與老拍檔韋綺珊再唱經典作《相逢何必曾相識》,拍住翻生。 53歲的蔣志光被八、九十後當新星熱捧,無綫打蛇隨棍上,捉住二人做武器,光復台慶收視。
有爆紅光環,但蔣志光無抓緊時間吸水,得閒打書釘、探舊街坊,淡泊名利;至於住豪宅又跳拉丁舞少奶奶韋綺珊,則選擇搏到盡。

八年絕跡台慶

綠葉王蔣志光在《老表》發揮功力,熱爆網絡,被網民要求光復樂壇。多年來當對方係草的無綫,亦改態度,要「封咪」十五年的蔣志光孖住「老婆」韋綺珊做台慶壓軸武器;未光復樂壇,先光復去年收視下滑至廿九點的台慶。
在無綫廿年,蔣志光過往甚少參與台慶演出,就算有份,亦只獲派柴娃娃跳舞助興,揸咪唱歌一定冇份;對上一次做台慶,已是○六年拍住阮兆祥、王祖藍等男藝員,反串扮女人跳勁舞,八年來絕跡「萬千星輝賀台慶」。
「公司見蔣志光呢排咁 hit,仲要係贏到一班八、九十後嘅歡心,我哋冇晒呢班後生觀眾好耐,所以台慶會安排《老表》班演員做一 part趣劇,蔣志光仲會同韋綺珊合唱《相逢何必曾相識》;佢冇正式响熒幕前唱歌起碼十五年,今次企番出嚟唱,至少吸引到班後生觀眾捧場,可以幫到收視。」一名無綫人爆。


場地提供: Phillip Wain導師: Manuel Olivares Munoz by Phillip Wain髮型: Gary Sun@portfolio化妝: Gary Chung@portfolio 

嫁商人,生埋兩個女的韋綺珊,居於月租四萬的太子道福怡大廈,一直過住生活無憂的少奶奶生活。 

打書釘唔宣傳

正當網民同 Chilam都急 call蔣志光復出樂壇,當事人則一副我獨醒態度。
入行以來只做過四次專訪的蔣志光,上週六(十一月八日)悠閒地去書店打書釘、行唱片鋪,去灣仔街市搵舊街坊吹水,你有你熱捧,他照舊寫意過。
「公司想谷佢,仲諗住好似鄭俊弘咁唱埋劇集主題曲;不過蔣志光唔係你俾佢唱,佢就𦧲飯應,佢話除非有公司肯俾佢做到自己鍾意嘅歌,但又照顧到市場唔令老闆蝕錢,佢先考慮復出樂壇。無綫份糧連埋爆騷都過二萬蚊,每年仲收緊《相逢》嘅作曲作詞版稅,夠養妻兒,蔣志光唔強求名利,好知足。」知情者說。


懶理近期紅爆,唔追名逐利的蔣志光上週六( 8/11)寧願獨自行街,攞住本文學書打書釘大半個鐘,都唔接訪問谷自己,更有指他嫌錢腥,唔趁熱接騷。 


慳家的蔣志光,與家人租住銅鑼灣唐樓已經滿足。

曾住灣仔的他,再殺落灣仔街市入貨。佢一出現麵包鋪,班收銀阿姐即圍住佢起哄。有 fans撐,蔣志光只以一個含蓄的笑容回報。 

轟香港冇樂壇,只有娛樂圈的他,當日行埋唱片鋪。但全程只搵外地爵士樂唱片,本地嗰啲眼尾都唔望。 

喺街市捉住菜檔舊街坊吹水,對方猛同蔣志光講:「我有捧你場呀!」 

06年台慶在無綫廿年,蔣志光唱歌強項無用武之地。 06年參演台慶,跟十幾個男藝員反串扮女人跳勁舞後,台慶表演冇再玩。 

復出做舞后

同蔣志光一齊「復活」,九五年下嫁黃姓商人後便做少奶奶的韋綺珊,家住月租四萬的太子道豪宅,閒時學跳舞消磨時間,沒料到客串《老表》會爆出。台上三分鐘,台下十年功,闊太韋綺珊準備十足。
「我搵營養師幫我 keep fit,每日飲三公升水排毒,又跳五粒鐘舞。我唔識睇中文,陳永業幫我錄低晒劇本內容,自己再將對白譯番英文拼音。」
食住個勢,戰鬥格韋綺珊迅速「賣身」予糖妹經理人,又答應高志森女友焦媛明年初演出歌舞劇,登台騷排山倒海。唔想齋唱,年過半百的韋綺珊苦練拉丁舞 Salsa,做埋舞后。
「幾十歲咁爆都幾開心,屋企人成日窒我:明星喎,唔好自己落街買嘢!」韋綺珊說。


接棒 長女唱爆咪韋綺珊唱得,同佢一個餅印的十八歲大女 Natasha(黃凱珊)遺傳母親天分,唱功一樣勁,並準備入樂壇一闖。 

12年 Natasha在九展舉行的全港校際唱歌比賽贏得冠軍。翌年她以表演嘉賓身份再度出現,有過百學生 fans湧到台上打氣。

在 YouTube找到 Natasha自彈自唱演出,歌聲同佢媽咪一樣聽出耳油。

「燒衣」版除呢兩句「相逢何必曾燒衣,在這一息間相遇奈何橋」係編劇集體創作,其餘由蔣志光一手包辦,又食胡。 

未拍過劇的韋綺珊,去年因被蔣志光加王祖藍夾擊𦧲功,才答應處女演出,結果爆紅。 

挑機吳若希跳舞當日,韋綺珊自爆近期最愛唱吳若希 hit歌《越難越愛》,仲攞出佢用英文拼音的廣東話歌詞即場唱,挑機後輩,證明唔 out!

撰文、攝影:娛樂組

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()