本身斯斯文文校服 look,一見鋼架即刻跳上去自娛,而師兄就幫忙睇位!其實佢哋全部嚟自本地 street workout組織 BARKIDS。

Ads by Google

Main Camp
街頭練肌團大熱 瘦仔半年變肌男
大台《老表,你好 hea!》入面飾演 Mario嘅張繼聰幾乎每集剝衫騷肌,跳騎呢健身舞兼猜震波枚,最厲害係佢街頭健身,令人嘆為觀止!
其實這種街頭健身喺香港已經日漸多人玩,好處只要喺有鋼架嘅公園就隨時可以做,所以吸引大班中學生迷玩,中六仔都要做爆肌型男! 


其實𠵱家好多區都見到街頭極限健身蹤影,上週四( 6日),在天水圍的天秀公園內嘅鋼架區,便聚咗 10多名學生,雖然已經入黑,但大部分人都脫去上衣,麒麟臂加谷爆胸肌超注目,之後齊齊跳上架做出如體操男神阮馬素嘅高難度花式。
張繼聰都玩

電視圖片

連張繼聰都喺《老表》做街頭極限健身指定動作 human flag,唔知又會唔會掀起一股「人旗旋風」呢?
潮玩 workout

網上圖片

連品牌 adidas都同街頭極限健身玩 crossover,好多潮人都開始學玩!
「做完 2隻手震晒」
現就讀天水圍中六嘅 Peter係其中一玩家,雖只玩咗幾個月,但身形已超 fit,「自己喺度只玩咗半年,本身係瘦底,成日俾人恰,但自從每星期嚟玩 3晚,身形開始大隻,第一次參加,教練就叫做 5組 50吓的不同形式掌上壓,頭幾次做完第 2日兩隻手震晒!咁耐加埋有過百同學嚟過玩,但大部分都頂唔順放棄,走淨約 20人,不過做到今日成績,真係好有滿足感!」
10個嚟操嘅學員, 9個都係想大隻,現讀中五嘅 King則承認,「我以前體育科體能完全唔合格,引體上升同掌上壓都唔達標,最憎上體育課,屋企人知我嚟操,開頭都唔睇好,話算啦,操咩呀!但見到我有成果,都大力支持,我仲打算大學報體育系!」
捽泥防跣


班學生冇錢買鎂粉,就會喺公園捽啲泥上手防跣。果然夠 organic!
逼爆公園


BARKIDS喺天水圍天秀公園每晚訓練起碼有近 20名學生,仲有住到香港仔咁遠都照嚟操。


Peter  workout年資半年
天水圍香港中文大學校友會聯會張煊昌中學
我以前只可以做 3吓引體上升,𠵱家可以做到 30幾吓!


King  workout年資 1年
伊利沙伯中學舊生會湯國華中學
我以前體育科肥佬,𠵱家輕鬆達標,我希望大學升讀體育系。
極限健身速學 3招


單槓 moon walk
先練好引體上升,之後再懸空練習 MJ Moon Walk經典舞步,之後可再加上行樓梯等動作。


人旗 Human Flag
人旗( Human Flag)需要好強全身力量,因為做呢個動作,重心會偏埋一邊,所以全身包括腹、腰、臀、前臂、背部、大小腿都要用力同繃緊,達至反地心吸力效果。


前水平 Front Lever
呢個動作基本係 80%力量、 20%技巧,同樣建議要先練好引體上升,重點係手臂同身體成 90度。
東歐佬玩先


街頭極限健身( street workout) 90年代在俄羅斯、烏克蘭等地興起,由於可以在公園免費玩,所以歐美、香港都大熱,係潮人玩意!

撰文:彭家駿
攝影:何榮亮

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()