真人騷

路芙出櫃:我係一個 die hard攣嘅基督徒  Peter仔騷價升 18倍

Ads by Google

作為看有線 YMC台、聽《恐怖熱線》長大的一代,路芙對我來說一點也不陌生。電視台和電台生涯加埋假假哋二十年,一套大台劇難道真的就可以帶來翻天覆地改變?訪問路芙之前,我本來不相信。
路芙(原名曾潔)親身解畫,原來入屋的威力真係唔到你唔信:「以前我講鬼故,最多都係聽開班聽眾識我;做司儀,班 fans覺得我唯一功能都係介紹個歌手出場,去到邊透明慣,直至套劇出街,竟然有師奶買嘢俾我飲、細路離遠叫我 Peter仔,最得人驚係有人 mark我唱歌、唔係做主持囉。三個鐘主持 fee,𠵱家竟然 10分鐘已經袋落袋,我先至知,原來以前搵嗰啲叫辛苦錢嚟!」
以前 180分鐘的酬勞,現在 10分鐘已經賺得到,這條算術很簡單,騷價暴脹 18倍!教過幼稚園中文、做過電話銷售、曾經加入唱片公司帶過歌手劉文娟,然後被前商台高層、 YMC台長 Hugo發掘做主持、講鬼故, 25歲入行、捱到 47歲才終於等到一個成名機會、由咪後走到幕前演台慶劇,開播兩周已經騷價升 18倍,播多兩週仲得了?
換着第二個,可能早就鬆毛鬆翼,可是作為路芙,作為一個自稱是 die hard攣的基督徒,她說一諗多咗就會輸:「我咁嘅年紀可以有人去搵我拍劇、仲要係一套咁好嘅劇、遇到一班咁好嘅演員、仲要突然間變咗台慶劇,對我嚟講,呢件事已經賺得好緊要!唔好諗紅唔紅,嚟緊會點、騷錢會唔會加?一諗就輸咗啦!」
二十多年才等到第一個事業高潮着實不易,依然能保持鎮定更是難得,不過呢一下我心裡在盤算的是,路芙說的到底是「 die hard攣」定還是「 die hard基督徒」呢?

 

叫我唱歌?唔係吓嘛!


第一次做電視劇,感受到電視台入屋威力未?
電視台威力真係好強,我住馬鞍山大型屋苑,尤其感覺到。我做電台做得耐咗,唔係好多人知我咩樣,本來識我係得樓下實 Q,前個星期做《勁爆》記招,我真係咁大個人第一次俾師奶同細路認得,最得意係啲師奶會買支嘢我飲,驚我做騷會口乾咁。最搞笑係簽名,以前都有簽名,不過好少,嗰日個師奶自己帶支筆俾我簽名,我話借嚟簽埋其他人得唔得,佢話送咗支筆俾我喎,突然間恩賜咗!唔使啦,簽完俾番你啦。以前做節目、做司儀,我對觀眾嚟講係 nobody,因為有咗電視,佢哋竟然對我產生興趣。喺我住嘅地方,個花王開始日日同我講劇情,以前我話阿媽鍾意邊隻花、想要隻花苗都係難問啲,今日佢直情搵個盆俾我、送埋上我屋企,完全係兩個世界。

工作機會有冇多咗?
未多咗嘢做住,但最明顯一個分別係,啲人唔係 mark我做司儀,係唱歌喎!我都忍唔住問,乜嚟真㗎?
說明一個事實,最緊要有名氣,睇唔睇得同唱唔唱得唔重要!
又唔係喎,我不嬲覺得做呢行睇唔睇得好緊要,唔使要靚,但一定要受落。唱唔唱得,就真係未必重要,最緊要唔好走音囉。對上嗰次我唱咗十分鐘都冇,已經收到一次 MC fee!幾開心呀件事。即係你會覺得,我做得咁辛苦做咩啫?呢啲嘢你問阿 Bob最清楚,做 MC一個騷閒閒哋兩個鐘、一晚仲要走幾場,成壇嘢氣氛旨意你一個,真係攰死㗎!有咗小小所謂名氣,咪就係十分鐘已經可以賺到平時由頭帶到尾嘅辛苦錢囉!

幾多歲入行?
做咗幾多年至終於體會到成名好處?
我入行做樂意唱片宣傳先,第一個帶嘅歌手係劉文娟。做做吓行得多,識咗 Hugo。你搞清楚,網上面嘅資料係錯㗎,我絕對唔係 36歲,其實我 47歲,啤梨(葉文輝)仲要細我兩三年。

想唔想再紅啲?再賺多啲?
我呢樣嘢就真係靠宗教信仰、交俾神。講真,喺我咁嘅年紀可以有人去搵我拍劇,仲要係一套咁好嘅劇、遇到一班咁好嘅演員、仲要突然間變咗台慶劇,對我嚟講,呢件事已經賺得好緊要。對我嚟講,唔好諗紅唔紅,嚟緊會點、騷錢會唔會加,一諗就輸㗎啦!
一世人淨係認真過一次
聽聞因為你把聲靚,曾經遇上瘋狂追求者?
一千零一次,當時我都未做呢行,做緊報紙 sales專賣分類廣告。咁 sell客就梗係唔會好似𠵱家咁粗豪啦,有一個客間唔中會聯絡,隔咗幾個星期,佢話我把聲好聽,想約我出嚟飲嘢喎。我咪問囉,點解要出嚟呢?我把聲好聽啫,同現實係兩個世界喎!聲靚同個人可以好大反差㗎,我勸你都係算罷啦,咪死推囉,最終冇見到。費事佢傷心啦,以為出嚟見嗰個係 Stephy!

現在有冇拍拖?
冇,寧願同成班朋友一齊玩。

上一段感情係幾時?
我一世人淨係認真過一次,十四年喇,兩年前分開咗,好難講會唔會走番埋一齊,大家根本就係相處到,但係得一樣嘢解決唔到,就係夠唔夠愛。
係女仔嚟?
女仔,呢樣嘢一直唔係秘密,我一直係個 die hard攣嘅基督徒。

幾大個開始信教?
我一出世就要信,唔係信仰係規矩,因為我阿爸係牧師、我阿媽係傳教。唔好話信唔信,一出世就係指定動作,由阿爸親自幫我祝福。我細個係冇得選擇,直至中四有得揀喇,我毅然唔再返教會。因為我喺教會見到太多古靈精怪嘅人。

有幾古靈精怪?
嗰啲青年團契,好多哥哥姐姐返嚟溝仔溝女,都唔係信主,溝到就走,溝唔到都走!最嬲係一次,爸爸大腸癌,我入醫院探佢,我阿媽同我講,教會其中一個牧師講嘢好黑心囉。佢同我老竇講,阿牧師,你年紀又大過我、𠵱家又生 cancer,應該都醫唔好喇,不如交定間教會俾我啦。你身為一個牧師,竟然咁講嘢?我發覺好多人會認會啲人好即係個宗教好,其實我哋忽略咗,要信嘅係主,唔係人。
你爸爸間教會接受你性向嗎?
你父母又接受你性向嗎?
爸爸媽媽最好係從來都唔會過問,佢哋幫我背負好多壓力。我阿爸四、五年前先至走,走咗之後阿媽先至話我知,其實阿爸喺背後幫我背負咗好多壓力,而從來都冇出過聲。好多人都同佢講,你個女同性戀、男人頭又講鬼故,有冇搞錯?阿媽話,老竇叫佢唔好講。

你憎唔憎呢班人?
我唔憎佢哋,我由出世就係咁,我阿爸咁話我就話嬲啫,唔識啲人我又做咩要嘥時間嬲佢啫?我真正介意嘅人,從來無怪罪過我、談論過我,更加唔會唔接受我。最近咋嘛,我做報紙訪問講到性取向,我擺喺屋企俾阿媽睇,真係未見過咁 funny嘅八十歲阿婆:「佢講你呀!話你鍾意女仔,真係好好笑,我都估到你㗎喇,細細個已經唔鍾意着裙!」呢個感覺最正,就係佢從來唔會當一回事。

可以面對家人,咁聖經同教徒又點面對?
好多人鍾意 quote聖經,咁聖經又係唔係真係咁理解呢?其實聖經唔係用中文寫、唔係用英文寫,係用阿拉伯文寫,你點知你一定理解得啱?就算你話我係有罪、話同性戀係病,耶穌都講過,問清楚你自己,若果你完全無罪,就攞個石頭去打個妓女啦。就算我真係有罪、同性戀真係病,我就當我係病咗囉,邊個冇病啫?邊個話同性戀呢個病大過你個病?點解有病你唔可以去愛惜對方?前提係佢真係一個病。
最恐怖係啲人冇品!
點解會同個 14年女友分開?
愛情、家庭、事業、友情,每個人都有一套衡量標準,我係要一齊昇華嘅人,缺一不可、每日都要兼顧到,相差唔好太遠。我個朋友唔係,一支箭擺晒喺事業度,其他嘢跌到落零分、跌到落負分都可以,乜嘢都可以唔理,嗰下令我哋離得最遠。
14年感情,分開嘅決定好難?
一定會,我哋雙方都有挽留過,但係大家嘅力量唔同,所以我話不如靜一靜,你去攞你想要嘅嘢先啦。到𠵱家,我哋都係 best friend,當冇嗰個感情負擔,細微嘅磨擦就少咗好多,最簡單,我哋兩個,我係嗰個想佢每晚打電話嗰個,我係師奶嚟㗎,會提佢夠鐘食嘢、係時候要唞下,佢一概都聽唔到。
你覺得兩個人有機會走番埋一齊?
因為大家都轉變緊,我睇住佢唔係淨係掛住工作,開始識得抽番啲時間去享受下人生。我嘅轉變係,真正發現咗,其實佢真係好好、好好。好老實,大家相處咁耐,都係想對方過得開心,呢一下我覺得佢開心咗,佢又覺得我開心咗,咁咪夠囉。未來發展會如何,係唔係真係可以一齊番,我交俾個神安排。
做咗咁多年人、講咗咁多年鬼故,你覺得鬼恐怖啲,還是人恐怖啲?
大奸大惡我未見過、假人我就見唔少,佢假啫,又未至於嚇親我。
阿 Bob同我講過一段歷史,話一個曾經好紅嘅歌手當佢透明,份稿遞過去對方無伸手接,睇住張紙飄下飄下飄到落地下,嗰下佢真係好嬲。
咁佢真係唔好彩喇……


阿 Bob唔好彩?
唔係呀,我話個歌手,又係同一個人、嗰次係倒數騷,一嚟到自己掂行掂過,叫個助手嚟同我哋溝通。我照足助手意思搵咗個咪嘴帶開半咪,佢講嘢入錯踏住唱歌聲篤爆自己咪緊嘴。喂,我跟足指示照計無事㗎,換着第二個歌手都係自己覺得 sad啫,佢唔係喎,一落台見到我就全粗口、中英夾雜狂鬧。其實嗰一下,現場有十幾個記者都目擊住。

點解事後無上過報?
可能佢當時太紅啦,我嘅心態又唔係怪啲記者唔幫我。老老實實,一個人 EQ低,你打人你鬧人,你咪鬧囉,樣衰嘅係你咋嘛、騷緊俾人睇你最醜樣一面係你咋嘛。你幾時見過黎耀祥發癲?幾時會見到郭晉安發癲呢?就算係劉德華,一世人最大醜聞係咩?都係結婚咋嘛!有幾錯啫?所以話冇品就係冇品,冇品嘅人遲早會俾人揭穿。
紅的代價
可以體現一個人紅不紅的,除了騷價,還有新聞,當路芙 90年代被斬新聞都被翻舊賬重新報導,呢啲咪紅囉。
「當時我做製作公司,入邨幫公司做嘢,照計入得邨,公司應該疏通好晒,點知走嚟幾個𡃁仔話要收錢。我話俾啲時間我去同老闆傾,一個星期後就已經出事。就喺山林道公司,一落樓就俾人斬。三刀,手臂、手掌、仲有大脾。」
已經廿年,路芙右手依然不能扣鈕、揸筷子從此要用左手,明顯影響一世,呢位基督徒仍然話要感謝神:「我哋行嘅每一步路都係由神 handle,唔係佢要我俾人斬,而係佢要我因為呢件事睇到更多。當年因為咁保險公司賠俾我三萬銀,我一半俾屋企,一半自己去咗美加 working holiday兩年。我阿爸係窮牧師,從來無辦法負擔我出國,但係我嗰兩年睇到嘅、學到嘅,一世受用。」

1.少女時代

2.校服時代

3.長髮時代

4. YMC時代

5.初吻時代
《忽然 1周》圖片

6.恐怖時代

7.老表時代
電視畫面

撰文:朱小博
攝影:范仲良

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()