《今天,我把媽媽 unfriend了》全片只有 3個人參與,他們因看到部分佔領學生與家人關係變差,因而拍片希望表達兩代之間即使有矛盾,依然是一家人。

Ads by Google

爆 Like王
《我把媽媽 unfriend了》撐學生 監製:我阿媽反佔中
我要真普選、你要袋住先,意見不合導致 fb出現 unfriend潮,朋友可以唔做,但係同家人唔啱傾又點算好?
短片《今天,我把媽媽 unfriend了》就講出咗部份人心聲,免傷和氣,只好按一下 unfriend。短片引發激烈討論,有人感動亦有人鬧,原來導演和女主角都有親身經歷,拍片係想帶出 unfriend咗依然係一家人的核心訊息。係囉,媽咪唔只係 friend咁簡單嘅!


F:《 FACE》  B:監製 B19  T:導演曾達恩  W:主角 Whitney

F:連家人都 unfriend表示爭拗問題已好嚴重?
B:其實好多佔領人士係俾屋企人趕出嚟,冇咗屋企人支持好慘!呢個運動完結之後,你都要面對番屋企人,點相處呢?其實 unfriend咗你,心裏面都係一家人嚟。我阿媽係反佔中義工,我只係問咗句冇錢收做嚟做乜,佢就鬧我,咁唔講囉!佢哋唔知咩係真普選,唔知咩係公民提名,淨係覺得我霸住條路,當然覺得係暴民啦、廢青啦,但我覺得透過呢個運動佢哋亦會了解多啲,好似片入面嘅對白講,唔會即時了解嘅。

F:有冇同家人意見分歧嘅經驗呢?
T:同嫲嫲嗌過交,佢由鄉下落嚟,見過六七暴動、見過六四,係會覺得抗爭好危險,政府唔會讓步,所以我會盡量買啲中立啲嘅報紙俾佢睇呀,盡量睇有線呀,帶過成家人嚟金鐘佔領區,當佢哋睇過原來唔係好混亂呀、好暴力呀,其實係好和平,嫲嫲亦開始理解,覺得我哋做得啱,佢成日睇住新聞,放棄咗睇《老表,你好 hea》已係好大改變喇!

短片出街後引來極大迴響,有網友回應表示同媽媽兩星期冇偈傾,但仍多得父母供書教學。網上圖片

有網友則認為 unfriend屋企人會令家人更加對立。
F:會計劃拍套用長輩角度睇雨傘運動嘅片?
T:今次條片係講兩代人之間未必認同對方價值觀,想話俾上一代知,呢一代嘅價值觀已經唔同咗,要搵食之外希望可以得到更多理想,可能你覺得唔係好現實,但你亦係時候尊重我哋。有藍絲覺得呢條片好惡毒,叫啲學生 unfriend阿媽,其實都唔係咁意思,所以拍下一條片前,我諗要聽多啲佢哋(上一代)嘅意見先。

F: unfriend家人係正確做法嗎?
W:我都唔鼓勵 unfriend,因為睇多啲訊息至知道呢個世界係點,我通常睇完嬲完就算。有個親戚曾經 inbox我傾佔中問題,大家意見唔同,但 share互相睇法,雖然亦有激動位,但傾完我都冇事嘅。爸爸媽媽亦睇過呢條片,話 proud of我去做咗呢件事,所以溝通多啲避開吓敏感話題,就唔使 unfriend啦。

導演曾達恩曾拍過 25分鐘微電影《香港人踢入世界盃》,同樣講兩代矛盾,兒子愛踢波,媽媽認為冇前途,點解決?網上圖片

另一套較為人熟悉的短片《致我曾深愛的那個你》亦是 B19和曾達恩的作品,綠茶定可樂的情節,睇過一定記得。網上圖片

採訪、撰文:娛樂組
攝影:楊學

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()