face.jpg

 

上月 19日蔣志光帶埋韋綺珊為《老表》宣傳,雖然在劇中超搶,不過兩人冇刻意扮鬼扮馬搶鏡,安份做好綠葉角色。

Ads by Google

封面
零應酬 嫌錢腥 揭蔣志光勁慳生活
《老表,你好 hea!》雖然最高收視 30點都過唔到,不過一班好戲老薑卻全部彈起。當中以 53歲蔣志光最爆,劇中同韋綺珊合唱〈相逄何必曾相識〉,令 90後巴打們驚為天人,再回帶先知當年呢首 hit歌橫掃樂壇。
蔣志光喺大台隱世 23年做綠葉,在大台有「獨家村」之稱,今日再度爆紅,換轉第二個實仆到出嚟開騷搵快錢,點知蔣志光原來超脫俗。「唔係每個人都咁恨搵錢。我係一個家庭生活行先嘅人。」平凡日子,蔣志光過着慳家生活,唔貪財唔埋堆,簡直大台清流啦!

53歲蔣志光最近因為喺《老表,你好 hea!》中先唱〈愛是永恆〉再同韋綺珊合唱〈相逢何必曾相識〉,令一眾巴打醒覺呢位喺大台豹隱 23年嘅綠葉王原來咁唱得。只係有料唔使四圍講,唱得蔣志光偏偏懶得唱。

先 solo獨唱
其實未唱〈相逢〉前,蔣志光先在劇中扮唱學友嘅〈愛是永恒〉,令好多人先醒起佢原來係歌手出身。
電視畫面

再合唱
上週四( 6日)蔣志光同韋綺珊於《老表》中再開腔唱〈相逢何必曾相識〉, 90後聽出耳油, 70後就回味!
電視畫面
唔恨出騷賺錢
現忙拍《張保仔》的蔣志光,年尾仲要北上拍外景。對於最近翻 hit,蔣志光相當淡薄冇自 high。他說:「我 12月仲要上去拍《張保仔》,係有人搵我出騷,但我睇下時間先啦!想等熱鬧過咗先,打鐵趁熱唔係我嘅性格。唔係每個人都咁恨搵錢,如果我要搵錢,唔會𠵱家冇車冇樓啦。(恨唔恨攞獎?)有冇獎對我嚟講冇意義。我哋呢代完結㗎喇!要睇下一代上唔上到嚟先最重要,唔係每一個人要為錢去做一個奴隸。」

妻兒齊食大排檔
唔埋堆零應酬,蔣志光話寧願多啲時間陪屋企人,早年本刊就發現蔣志光跟家人到大排檔開餐,點菜飲啤酒冇停口。

自稱冇車冇樓的蔣志光,家住銅鑼灣禮怡大廈,樓齡同蔣一樣係 53年,月租約$25,000!

慳搭電車
其實做咗綠葉咁多年,蔣平時生活都好平淡,着背心攞環保袋坐電車,你同我一樣。

蔣志光熱愛跑步,每日唔使開工都會到跑馬地運動場練習。
《蘋果日報》圖片

陳山聰出名愛長跑,但原來最初是蔣志光教他跑步方法,又提供唔夠體力可以食鹽補充。
《蘋果日報》圖片
出過 6隻碟
蔣志光 85年出道,至 93年間共出過 6隻大碟,在當年唔算活躍,不過出道時亦唱過唔少廣告歌,唔見樣都見聲!

蔣志光之前在《老》劇中扮林子祥唱〈真的漢子〉,又係入型入格。
電視畫面

1.蔣志光以扮林子祥腔出名,當年用阿 Lam腔拍廣告, 85年仲被阿 Lam邀請當演唱會嘉賓,但全程著住猩猩衫。
網上圖片

2. 87年推出首張 EP《拯救地球》嶄露頭角,但轉會後的〈相逢何必曾賞識〉才橫 j掃樂壇。
網上圖片

3.蔣志光唔只唱得,外形亦生鬼,經常拍廣告。最經典為 89年的麥當勞廣告,片中連續 20秒 rap,令一眾網民翻煲。網上圖片

4.除〈相逢何必曾賞識〉外, 91年同羅大佑合唱〈皇后大道東〉亦係街知巷聞,為當年經典的政治題材歌曲。

5. 91年蔣志光淡出樂壇,之後喺大台開始其演員生涯,第一套演出作品為《與郎共舞》。
網上圖片
蔣志光唔恨出騷搵銀,就連私生活亦十分低調。平時除返工外,最愛家庭生活聚天倫或到跑馬地球場練跑,而且非必要應酬一定不出席,連劇集慶功宴都絕跡。「慶功宴呢幾個鐘,我覺得家庭生活重要啲。其他嘢我可以放棄,但係屋企人嘅嘢我唔會答。」
雖身為顧家好男人,但圈中曾傳佢同向海嵐因合作拍劇而撻着,仲誇到生埋私生子,可信性成疑。入行 29年的蔣志光處之泰然說:「點會傳出咁嘅嘢?我哋一直冇來往。我係基督徒嚟,係就係,唔係就唔係。大家拍過一套《花樣中年》,但從來冇接觸。」正氣到呢!

今日 VIP
蔣志光其實一直有鋪唱歌癮,上週接受大台訪問,就自爆現愛唱 blues同 jazz,但蔣向本刊表示:「唱過一兩次咋!」
電視畫面

24年前一曲唱到開巷,韋綺珊回憶說:「嗰時(約 20年前)佢話唔想再唱,咁就冇再唱,最後一次合作都差唔多 20年前!」
韋綺珊講蔣志光

10年韋綺珊舉行演唱會時,曾邀蔣志光做嘉賓,但蔣都婉拒。
《蘋果日報》圖片

韋綺珊同蔣志光合唱〈相〉曲而成為好友,雖然彼此冇再合作成 20年,但間中都有見面飯聚,好友唔使日日見嘅!

當年首歌咁 hit係咪好多登台?係咪好好搵?
韋:多數唱 annual dinner上台一定要唱呢首。嗰陣最少有 5位數接近 6位,唱半個鐘大約 5首歌啦。

接咗幾多個登台?
韋:唔記得喇!後尾佢唔係咁鍾意唱呢啲 annual dinner,咁就剩番我一個唱囉,我都唔知點解。

幾時再上台一齊唱?有幾多個騷接咗?
韋:最快應該係台慶啦,但商演要睇志光喇。因為佢要返大陸拍《張保仔》,可能都要下年,其實呢樣好睇佢自己。
傳向海嵐為佢生仔?
圈中有傳向海嵐曾跟蔣志光撻着,仲有埋私生子,雖然得啖笑,但蔣斬釘話:「係就係,唔係就唔係,我哋基督徒冇嘢唔講得!」

轉往內地發展後,向海嵐在朱玲玲老公羅康瑞旗下瑞安集團做公關!
《壹週刊》圖片

88年攞港姐冠軍的向海嵐,近年雖然淡出香港,但喺內地仍有不少演出機會。
網上圖片
美好的 90年

〈相逢何必曾相識〉當年咁 hit都竟然攞唔到〈金曲金獎〉,不過就攞到商台「我最喜愛的歌曲大獎」,亦係港台十大中文金曲。

蔣志光同韋綺珊的〈相逢何必曾相識〉於 1990年推出,當時香港樂壇超風光,歌星爭崩頭兼觀眾爭住睇, 90年大台頒獎禮,你識幾多個?

劉德華〈再會了〉
當年啱啱 30歲嘅劉華, chok嘅程度勁過今日嘅林峯同霆鋒,佢首〈再會了〉橫掃 MK界。

梅艷芳、倫永亮〈心仍是冷〉
當年係電視劇《愛有明天》主題曲,不過首歌就仲有人記得,但套劇就冇人知喇!

林憶蓮〈前塵〉
當年成功打造都市女郎形像,〈前塵〉喺總選攞到金曲獎,追住葉倩文打。

葉倩文〈焚心以火〉
〈焚心以火〉為電影《秦俑》主題曲,估唔到擊敗〈相逢何必曾相識〉攞到大台「金曲金獎」。

李克勤〈眷戀〉
當年出道最搶唔係唱歌,而係佢個髮型,好多人跟㗎!

關淑怡〈愛恨纏綿〉
當年 24歲,一個字索。

草蜢〈失戀〉
食住梅艷芳徒弟個朵,又冇乜對手, 90年代基本上自動當選。

張學友〈只願一生愛一人〉
當年同劉德華鬥到甩脾, 90年就係輸畀華仔。
最受歡迎新人獎

金獎:黎明
備受大台力捧,首〈相逢在雨中〉唱 K之選。

銀獎:曾航生
𠵱家喺大台做茄,但當年同何婉盈首〈再見亦是朋友〉, hit嘅程度拍得住〈相逢何必曾相識〉。

銅獎:吳婉芳
首〈煙花雪〉幾 hit㗎,當年亦屬索女一名,但好快嫁畀胡兆熾家族後人胡家驊。
當年台灣歌開始喺香港大 hit,仲特登整個「最受歡迎國語歌」獎。

張洪量
〈你知道我在等你嗎〉

童安格
〈耶利亞女郎〉

伍思凱
〈特別的愛給特別的你〉

採訪、撰文:娛樂組 攝影:娛樂突發組 美術:溫倩盈

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()