靚抽王

2014八大爛尾事件頒獎典禮

Ads by Google

每年都有幾千條熱門新聞,有啲滿地花生,有啲令你嘅人生充滿希望,有啲就爛尾收場……不過爛還爛,都有佢爛嘅藝術,正如大文豪話齋,人生覺得最爛的事情,未必是最糟,因為最糟的,可能一直就在眼前而未曾發現……於是我哋精選咗八個好有機會爛尾嘅事件,頒番個豬肉獎,等大家拍吓手掌囉! 

 

前言:為咗表示今次頒獎禮係由提名委員(唔係公民提名)選出得獎事件,我哋特登邀請咗突首司儀陸百狗為我哋主持今次嘅頒獎禮。
1.胡杏兒離巢


陸百狗:咳,各位市民好。大家都知,呢排我……好忙,唔好意思(聲音急促),首先我哋頒第一個爛尾獎,就係胡杏兒離開 TVB嘞。查實呢單嘢只係胡冏單方面話想出外闖闖啫,家吓 HKTV強攻,大台又點會肯放人?所以正如我成日都講啦:離巢同唔離巢之間有好大嘅空間。
2.周融移民


陸百狗:反佔中勇士周融話如果佔中成功,佢就移民。家吓佔領行動都發生咗成個月,好多人都好關心佢嘅移民手續搞成點。不過,據我對呢位老兄嘅人格了解,佢大可能學我講:「我絕對冇講過要移民。」所以呢單花生騷大概都會爛尾收場。
3.亞洲小姐


陸百狗:電視牌呢啲嘢,一向都係一男子(即係某個同我同名嘅人)話晒事,所以我不嬲都支持亞記不斷重播嘅。但係佢呢期出唔到糧,進入「去屎坑都冇廁紙用」嘅狀態,仲取消埋內地亞姐喺香港住緊嘅酒店……大佬,租間酒店買啲廁紙,都唔使萬四蚊啦。萬四蚊都冇嘅人係冇話事權㗎,唔好話搞亞姐,間電視台都執得啦。
4.徹查七警


陸百狗:將示威者拖去暗角打鑊嘅七警,停職之後大家都坐定定睇佢哋會得到乜嘢下場,點知早前竟然由「刑事調查」降格為「內部調查」。呢單天怒人怨嘅嘢,極有可能爛尾收場不了了之。唔通真係個調查處理咗,個調查就唔存在?
5.徹查七警
陸百狗:早前傳言滿天飛嘅鋒菲戀情,近排又傳佢哋分開。咁又係,對佢哋嚟講,分分合合好平常,就如同每年過年都要拜年一樣。不過年輕人唔好絕望,分咗第日都仲有機會合番嘅。

6.蔣志光重出樂壇


陸百狗:近日蔣志光喺大台劇《老表,你好 hea!》度唱張學友嘅〈愛是永恆〉,令人聽出耳油,網上點擊率有成幾萬個。不過蔣志光唔好未富先驕,咁就覺得可以唱番歌。因為係人都知大台其實不乏能人異士,只係佢哋專打自己人,同事三分憎,唔會俾雞會你啫。
7. HKTV輸到 PK
陸百狗: HKTV終於開台,哇,好多大台睇唔到嘅優質劇集呀!仲成個臉書啲人都討論緊佢哋嘅開台劇㖭。記憶中,冇市民想 HKTV輸,係得王晶同埋大台想佢死啫,但係恐怕呢單嘢佢哋嘅期待會落空囉!
8. 689下台


陸百狗:香港民怨四起,連田少都忍唔住要出聲聲討 689,搞到俾人踢走。但係大家都知, 689臉皮有成尺厚,係「不會辭職,會繼續做好行政長官工作」的。今日頒嘅獎係咁多,我返去陪老婆抽涼氣啦!
部分圖片來源:高登討論區、香港網絡大典

撰文:娛文樂

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()