陳嘉容只敢為親戚和好朋友睇症,然後提議湯水食療。

Ads by Google

名氣生活
學中醫益老友 陳嘉容做大長今
一般人有空餘時間,都會去學外語、烹飪、或者什麼、什麼運動。名模陳嘉容就夠另類,用了大半年時間去學中醫,「我由細到大對西藥都有 side effect,所以人愈大對中醫愈有興趣,對自己身體有幫助,亦可以幫埋身體朋友、屋企人。」
究竟陳嘉容這個模版大長今醫術如何?我哋搵咗另一個名模 Ana R.以身試醫,睇吓佢掂唔掂先! 


舌診最尷尬
陳嘉容( Eunis)說中醫課程要學把脈和舌診,「中醫入面有四氣五味,望、聞、問、切好緊要,睇吓對方嘅氣息,把吓脈。」不過 Eunis話最尷尬是舌診,「通常我會尷尬啲,叫屋企人、朋友伸條脷俾我睇,睇脷可以見到你身體狀況,如果條脷好紅,身體入面就好熱氣,好多火;如果條脷紫色,可能係身體入面有瘀血、好濕滯。」
問 Eunis會不會執藥?她即緊張地說:「講到執藥,我未到家,要繼續努力。我嘅程度只可以幫屋企人、好 close嘅朋友睇症,介紹佢哋飲啲養生食療湯水。」好似今次為 Ana診症後, Eunis就為她準備了淮山百合薏米水鴨湯,「 Ana面色比較白,唔夠血,皮膚較乾燥,佢有啲肝火,主要因為個人好攰、瞓得唔好已經有一段時間。」 Eunis說 Ana最緊要去肝火、去濕,要滋陰,「淮山健脾益胃,百合、水鴨滋陰,薏米去水,比較適合佢。」

上月尾 Ana三十五歲生日,丈夫為她搞晚宴, Ana說開始飲中藥調理身體,準備造人。

鬼妹飲涼茶
對於 Eunis的診斷, Ana亦話講得好中,原來她對中醫並不陌生,「我媽媽係韓國人,爸爸係西班牙人,從小我就睇類似中醫嘅醫生,把脈、飲涼茶已習以為常。十幾歲時我就有劇烈頭痛,西醫一直醫唔好,中醫話我係血糖問題,幫我調理就好番,所以我更加信中醫,而家每次初起感冒,經期小腹唔舒服,都會飲涼茶。」但 Ana的英籍丈夫 Brad只信西藥,每月花四、五千元買各種維他命, Ana卻不以為然,「我覺得維他命吃得多,會令營養不平衡,食西藥亦會令胃口變差。」
雖然 Ana覺得中藥很好,但有時亦令她頗為難,「而家已經有中藥粉,但有時做嘢,好難帶埋熱水去沖,尤其同外國人開會時,佢哋見到中藥就會問長問短,好驚訝我會食中藥。」 Brad更投訴中藥有怪味道。
不過她也贊成中醫比西醫更能治本,正如 Eunis說中醫是調理身體內在,雖然反應沒西藥快,但就清得更徹底,她還教 Ana一套簡單的自我療法:「我哋起身照鏡,可以睇番自己面色,如果偏青、偏白,代表你血氣唔夠,要食啲紅棗,加埋黨參同北芪補番氣,咁就更加有力。」
望診
望診除觀面色,還包括舌診,由此了解患者的臟腑虛實; Eunis睇完 Ana條脷就話:「條脷有啲白色脷苔,比較濕滑,但兩邊較紅,明顯有虛火,個人好濕熱。」

Ana邊伸脷邊說:「妳是不是要吻我?要問過我老公喎!」之後又尷尬地做鬼臉。
問診


Eunis細心地問對方的生活習慣,身體狀況, Ana說:「我覺得入面好熱、好乾,已經飲好多水,可能經常要飛,成日要化妝,壓力又大。」
切診


切診是用手把脈或按腹部診察是否有異常, Ana的脈象比較浮, Eunis解釋說:「佢心肝無事,但係脾弱少少。」
淮山百合薏米水鴨湯
材料:
新鮮淮山一條 百合三兩
薏米三兩 果皮 水鴨一隻

做法:
新鮮淮山去皮切件,百合薏米洗淨泡水兩小時,把所有材料放入煲內,水滾後轉文火煲兩小時三十分鐘。


撰文:李美媚
攝影:黃志明、葉志明
協力:鄭子瑩
場地提供: A Project Interior Design
nextb@nextmedia.com

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()