由中六學生發起的自修室,每晚都坐無虛席,在場嘅同學都好自律,離場必定清理垃圾。

Ads by Google

佔中滿月,回想起啱啱抗爭時硬食警方催淚彈同胡椒噴霧,到最近一個個帳幕的夏慤道,相信冇人會再話香港學生淨係識吃喝玩樂。
個多月嘅佔中運動,物資源源不絕,糧水充足,已經到 10月,適逢中期試,金鐘夏慤道仲出現有學生自製自修室,唔只有燈有 WiFi,仲有一班 U仔自組大專義教團開班補習,究竟呢個五星級補習社有幾乜乜乜? 


我要真 WiFi
呢個年代,冇 WiFi仲慘過冇水飲,上網搵資料做功課又好,睇吓有冇警察打到嚟都好。金鐘自修室有無限 WiFi供應,想知密碼就要搵管理員啦!

自揼書枱


劉江華,二零一四沉默是金嘅代表詞,除咗用嚟形容政府學聯會議上嘅佢零發言做紙板人,仲可以形容一班默默耕耘嘅揼木義工。呢班義工每晚一釘一鎚整枱整凳,將一個本來得十幾個位嘅自修室擴建做可以坐二百二十人,仲整埋帳幕同光管,做搭棚嘅蘇師傅(白圈)話:「我同幾個義工,收集一啲廢置傢俬,再運嚟現場,我再揼成枱凳,畀同學溫書用,我淨係識做呢啲!」
4點鐘小魚 sir
一班中學雞面對 mid-term甚至 DSE都未驚過,為真普選日日出嚟瞓,身為 U仔點會唔滾動。就讀中大新聞系 Yr.2嘅小魚(白圈),就自發喺十月頭組成大專義教團,希望免費幫佔中嘅中學生補習。佢哋每日最早四點鐘就殺落金鐘,一補就補到凌晨。小魚話喺 fb專頁已有百多名大專同學撐報名義教,當中仲唔只大學生,就算係博士生、大學教授、中學老師、甚至補習名師都有,總之你諗到嘅科都有人教,小魚就話:「我自己都有 mid-term有 paper,但見到一班中學生嚟緊考 DSE都出嚟,唔幫佢嘅,過唔到自己嗰關。」

你諗到嘅科都有大專生義教,仲會喺自修室入口放上時間表,想補咩科就要睇時間!
神秘中六男主管自修室
傳說中將十幾個位嘅自修閣,變成𠵱家咁大兼咁有規模的夏慤道自修室嘅神奇小子阿雞(為怕學校秋後算賬,唔出樣),原來只係中六生。
不過自修室嘅一切秩序規矩都係佢話事,阿雞話:「最初啲木枱係理大生自製,我係第一批用嚟溫書,後來發現根本唔夠用,所以就發起搞個大型自修室啦!為咗易管理,我仲做咗管理員,試過有人攞啲過期朱古力想請學生食,我就立即阻止,又怕便衣警察混入影響溫書,所以一定要有規有矩。」想見吓神一樣嘅男人,落去啦!
教科書乜乜乜
有籃絲大叔話好鍾意食水果,榴槤乜乜乜……,同樣黃絲學生同大專生將唔同科嘅教科書, past paper乜乜乜,捐畀在場抗爭學生,當然仲有唔少漫畫,俾同學仔鬆一鬆。
仲有喺自修室範圍係唔可以食嘢㗎!想食就要去自修室食用區食。如果你整污糟晒引老鼠,咁……暗角見啦!

暗角發電機


暗角,唔只可以攞嚟打人嘅,仲可以收埋發電機添。喺中信橋橋底暗角位有三部發電機,默默供電俾自修室,等大家有燈溫書。據知幾部發電機係幾位支持集會嘅工程師捐出,佢哋仲每日定時到場入埋油!
抗爭標語 遍 U開花
要 fight低小圈子選舉制度,淨係喺金鐘旺角抗爭當然唔夠,最緊要係要將抗爭帶入校園,遍地開花先最 good,早前便有理大仔喺理大用英文字母識別嘅各大樓發揮小宇宙,整成「李 C煙」、「 Democracy」,又放廿幾三十把遮俾畢業生影相。可惜喺咁多家長、達官貴人入理工睇畢業禮嘅日子,呢啲咁「大逆不道」嘢當然要請走。自由發聲?理大仔睇吓田北「神」就知啦!

有理大生爆料指咁有創意嘅傑作係由理大罷課委員會,於一星期前策劃,據知佢哋趁深宵校園無人,快閃帶埋長梯將有關標語貼上,本刊致電罷委會,對方卻否認係經手人。


科大抽 689水
科大有博士生自發訂購 689把黃遮,俾畢業生借用影相,勁有霸氣。

中大水塔插旗
除咗理大、科大,超過十間大專院校都有掛「我要真普選」旗,校方越拆我越掛。
借遮影相


有學生自設理大民主照相館,有黃遮借俾畢業生留照,可惜第二日連同標語就被保安以安全理由清場。
3萬 like 康暉戀開埋 HeHe專頁


如果自問淨係想做鍵盤戰士撐佔中, fb一樣有無限空間。之前台灣反服貿,學生領袖林飛帆陳為廷被惡搞做 HeHe(即同志),仲開埋 fb page。今次佔中亦捧起咗學聯一對金童玉男周永康、岑敖暉, fb page仲有成 3萬人 like,雖然大家明知流料,不過照樣將爆笑 Hehe情延續!
之鋒都玩埋


除了 Alexter有 page,有網友亦幫另外兩位學生領袖,學民思潮黃之鋒及黎汶洛開 Hehe fb page!
唔少 Alexter(網友幫周永康、岑敖暉洋名 Alex同 Lester嘅合稱)粉絲畫埋二人嘅 boy love畫作,好有心!


撰文:校園組
攝影:何榮亮

創作者介紹

明星八掛大分享★☆

tvb4life 發表在 痞客邦 PIXNET 留言(0) 人氣()